Karoa 7

Iesu bona Hisiu edia Toana Tahua Taudia

HISIU edia toana tahua taudia haida be mairiveina kahana amo idia mai; unai taudia idia gwau hisiu edia toana edia anina idia gwauraia hedinarai diba. Edia hanua dekenai idia noho neganai, hisiu matamatana ta idia itaia, bena kilomita handred momo ai idia gavaia ela bona Ierusalem dekenai idia ginidae.

Idia ginidae neganai, idia henanadai, idia gwau: “Iuda taudia edia king harihari ia vara be edeseni? Badina be iena hisiu dina daekau kahana dekenai ai itaia vadaeni, bona ia dekenai tomadiho henia totona ai mai.”

King Herod ese unai hereva ia kamonai neganai, ia laloa momo. Unai dainai hahelaga taudia badadia ia boiridia, Keriso do ia vara gabuna ia nanadailaidia. Baibel ena hereva hegeregerena idia haere, idia gwau: “Betelehema, Iudea dekenai.” Bena Herod ese hisiu edia toana tahua taudia ia boiridia bona ia hamaorodia, ia gwau: “Umui lao, mero maragina umui tahua goadagoada, bona do umui davaria neganai, umui mai, hadibaia lau, vadaeni lau danu do lau mai, lau tomadiho henia.” To, Herod ena ura korikorina be idau; ia ura unai mero do ia hamasea!

Herod idia rakatania murinai, hoa gauna ta ia vara; guna idia itaia hisiuna ese ia gunalaidia. Ia be hisiu idauna ta, lauma ta ese ia gaukaralaia ia hakaudia totona. Vadaeni hisiu idia gavaia ela bona Iosef bona Maria idia noholaia rumana ataiai ia gini.

Unai tatau be ruma lalonai idia vareai neganai, Maria mai ena natuna maragina, Iesu, idia davaridia, bena Iesu idia goru diho henia. Bena edia herahera gaudia idia henia, golo, muramura mai bonana bona dahua muramurana. Gabeai, Herod hadibaia totona idia lou lao gwauraia neganai, Dirava ese nihi ta ai ia hamaorodia unai bamona do idia karaia lasi. Unai dainai idau dala amo edia hanua idia lou henia.

Daika ese unai hisiu amo unai tatau ia hakaudia? Mani inai oi laloa, unai hisiu ese ia hakaudia maoromaoro lasi Iesu dekenai, Betelehem dekenai. To, Ierusalem dekenai ia hakaudia lao guna, King Herod dekenai; unai tau ia ura Iesu do ia hamasea. Bema Dirava ese unai tatau ia hamaorodia lasi Herod do idia hadibaia lasi, Herod ese Iesu hamasea dalana do ia davaria. Unai dainai ita diba, Dirava ena inai tauna, Satana Diabolo, Iesu hamasea dalana ia tahua tauna unai, ese unai hisiu ia gaukaralaia iena ura hagugurua totona. Mataio 2:​1-12; Mika 5:2.

▪ Dahaka ese ia hahedinaraia hisiu edia toana tahua taudia idia itaia hisiuna be idau?

▪ Idia ese Iesu edeseniai idia davaria?

▪ Dahaka dainai ita diba Satana ese unai hisiu ia gaukaralaia ia hakaudia totona?