Karoa 96

Iesu bona Lohia ta mai ena Kohu Momo

IESU be Ierusalem ia lao henia totona Perea tanona ia rakaia hanai neganai, tau matamatana ta ia heau lao, ia vairanai ena tuina ia hadaia. Idia gwau ia be lohia ta, reana badina be ia be mai ena dagi badana dubu lalonai eiava ia be kota badana ena memba ta dainai. Danu, ia be mai ena kohu momo. Ia ese Iesu ia nanadaia, ia gwau: “Hadibaia tauna namona e, dahaka lau karaia, lau mauri hanaihanai abia totona?”

Iesu ia gwau: “Badina dahaka oi hereva lau be namo? Tau ta ia namo lasi, Dirava sibona mo.” Unai tau ese unai hereva “namona” ia gwauraia Iesu ena dagi ladana bamona, unai dainai Iesu ese ia hamaoroa unai bamona dagi ladana be Dirava sibona ena.

Iesu ma ia gwau: “Bema mauri oi ura neganai, taravatu do oi badinaia.”

Tau ia gwau: “Edena taravatu?”

Iesu ese taravatu ima, Taravatu Ten amo ia gwauraidia, ia gwau: “Oi alaia lasi, oi heudahanai lasi, oi henaoa lasi, oi samania koikoi lasi. Oiemu tamana oiemu sinana dekenai oi matauraia.” Bena taravatu hereadaena ta ia gwauraia, ia gwau: “Oiemu badibadinai tauna dekenai oi lalokau henia, oi sibona dekenai oi lalokau henia bamona.”

Mai ena momokani ida unai tau ia gwau: “Lau mero neganai ia mai bona harihari, inai taravatu ibounai lau makohia lasi.” Ma ia gwau: “Ma dahaka dohore lau karaia?”

Unai bamona ia henanadai dainai, Iesu ese ia ura henia. To ia itaia ena kohu ia laloa bada, unai dainai ia hamaoroa, ia gwau: “Gau tamona oi karaia lasi, oi lao, oiemu kohu oi hoia, ogogami taudia dekenai oi henia, gabeai kohu namona do oi davaria guba dekenai, oi mai, lauegu murinai oi raka.”

Unai tau ia toreisi, bena mai ena lalohisihisi ida ia raka oho. Ena kohu momo ia laloa bada dainai, kohu korikori ena namo ia diba lasi. Iesu ese ia raraia mai ena hebogahisi ida, bena ia gwau: “Kohu momo taudia Dirava ena Basileia idia vareai dala be mai hekwarahi bada!”

Ena hahediba taudia ese unai hereva idia hoalaia, to Iesu ena hereva ma ta idia hoalaia bada. Ia gwau: “Kamelo be nila ena matuna dekenai ia vareai be haraga, to kohu momo tauna Dirava ena Basileia iduara dekenai vareai totona be ia auka.”

Idia nanadaia, idia gwau: “Daika mauri ia davaria diba?”

Iesu ia raraidia, ia gwau: “Taunimanima idia karaia diba lasi, to Dirava ia diba, badina be Dirava ese gau ibounai ia karaia diba.”

Petro ia diba edia lalohadai be unai kohu momo tauna ena lalohadai bamona lasi, unai dainai ia gwau: “Ai be gau ibounai ai rakatania, vadaeni oiemu murina dekenai ai raka. Unai dainai ai be dahaka do ai abia?”

Iesu ese ia gwauhamata henidia, ia gwau: “Umui lau hamaoroa momokani, lauegu murina dekenai umui raka taudia, be gau ibounai karaia matamata ena neganai, Taunimanima ena Natuna ena terona diaridiari dekenai do ia helai neganai, terona 12 dekenai do umui helai, Israela edia iduhu 12 dekenai dohore umui kota henia.” Oibe, Iesu ia hahedinaraia, tanobada dekenai gau iboudiai karaia matamata neganai, gau iboudiai do idia namo, Eden umana dekenai idia namo hegeregerena. Danu, Petro bona hahediba taudia oredia be Keriso ida tanobada ena Paradaiso do idia lohiaia hebou. Momokani, unai bamona davana namo hereana abia totona edia gau iboudiai idia rakatanidia be maoro!

To, hari inai negai danu davana namodia ita abidia diba. Iesu ia gwau: “Bema tau ta ena ruma ia rakatania, o iena tadikakana, o taihuna, o sinana, o tamana, o natuna, o tano. Bema lau dainai bona Sivarai Namo dainai inai gaudia ia rakatania, hari inai mauri neganai, iena gau do ia habadaia nega 100 bamona, ruma, tadikakana, taihuna, sinana, natuna, tano, bona taunimanima do idia hahisia, bona gabeai, vaira neganai mauri hanaihanai do ia abia.”

Unai hegeregerena, ena hahediba taudia be idia lao gabudia iboudiai dekediai, edia Keristen orea taudia edia hetura karana ese varavara korikoridia edia hetura karana ia hereaia. Unai lohia mai ena kohu momo ese unai davana namona bona mauri hanaihanai Dirava ena guba Basileiana lalonai ia abidia lasi.

Unai murinai Iesu ia gwau: “To idia guna taudia momo be do idia gabeai, bona idia gabeai taudia momo be do idia guna.”

Unai ena anina be inai: Taunimanima momo, unai lohia mai ena kohu momo bamona, tomadiho ena dagi o hahenamo idia abia “guna” taudia, be Basileia lalonai do idia vareai lasi. Do idia “gabeai.” To taunimanima momo, Iesu ena hahediba taudia bona ma haida, Farisea taudia ese idia dadaraidia bona “gabeai taudia” idia gwauraidia taudia, be do idia “guna.” Anina be hahenamo namona do idia abia​—Basileia lalonai Keriso ida do idia lohia hebou. Mareko 10:​17-31; Mataio 19:​16-30; Luka 18:​18-30.

▪ Unai tau matamatana be edena bamona lohiana?

▪ Dahaka dainai Iesu ia ura lasi unai tau ese ia ia gwauraia “Hahediba tauna namona”?

▪ Unai lohia ena sivarai ese edena bamona ia hahedinaraia, ta ena kohu momo ese ia hakererea diba?

▪ Iesu ese ena hahediba taudia dahaka davana namodia ia gwauhamata henidia?

▪ Edena bamona guna taudia do idia gabe, bona gabe taudia do idia guna?