Karoa 12

Iesu ena Bapatiso

IOANE ia haroro matamaia, bena hua 6 murinai, Iesu ena mauri laganidia be 30 neganai, ia be Ioane dekenai ia lao, Ioridane dekenai, badina be ia ura Ioane ese do ia bapatisoa.

To Ioane ia ura lasi, ia gwau: “Bema oi ese lau oi bapatiso henia be namo. Badina dahaka lau dekenai oi mai?” Ia diba iena varavara Iesu be Dirava ena Natuna hereadaena. Gunaguna, Iesu be Maria ena bogana lalonai ia noho neganai, Maria ese Elisabeta ia vadivadi henia neganai, Ioane be ena sinana ena bogana lalonai ia marere mai ena moale ida! Gabeai ena sinana ese unai ia hamaorolaia. Ma ia hamaoroa, aneru ta ese Iesu ena vara ia gwauraia guna, bena ena vara hanuaboina ai aneru be mamoe naria taudia dekediai idia hedinarai.

Unai dainai Ioane ia diba Iesu. Bona Ioane ia diba iena bapatiso be hegeregere lasi Iesu dekenai, badina be unai bapatiso be edia kara dika amo idia helalo-kerehai taudia edia. To, ena be Ioane ese ia gwauatao, to Iesu ia gwau: “Mani oi karaia, badina be inai bamona dala dekenai Dirava ena ura gauna be do ita karaia.”

Dahaka dainai Iesu be bapatiso ia abia be maoro? Badina be iena bapatiso be helalo-kerehai ena toana lasi, to ena Tamana ena ura karaia totona sibona ia henia karana ena toana. Guna ia be kapenta ta, to nega ia ginidae vadaeni haroro gaukarana do ia karaia; Dirava ese ia siaia ena badina ta be unai. Reana Ioane ia laloa Iesu do ia bapatisoa neganai hoa gauna ta do ia vara.

Gabeai Ioane ia gwau: “Dirava ese ranu dekenai bapatiso karaia totona lau ia siaia. Unai neganai Dirava ese lau ia hadibaia, ia gwau, ‘Tauna be oi ese do oi itaia, Lauma Helaga be do ia diho, bona ia latanai do ia kamokau. Inai tauna ese Lauma Helaga dekena amo taunimanima do ia bapatiso henidia.’ ” Unai dainai, Iesu be ranu amo ia daekau neganai, Ioane ese “Dirava ena Lauma ia itaia, pune bamona ia diho, ia dekenai ia helai” neganai, reana unai ia hoalaia lasi.

Iesu ese bapatiso ia abia noho lalonai, unai mo sibona ia vara lasi, to “guba be ia kehoa” iena danu. Anina be, iena lalohadai gunana ia abia lou, guna guba lalonai ia noho neganai ia abia lalohadaina unai. Iena mauri gunana, Iehova Dirava ena lauma natuna ta hegeregerena ia abia maurina, bona tanobada ai ia do vara lasi neganai Dirava ese ia hamaoroa herevadia iboudiai danu, be ia ese ia lalodia lou.

To danu, bapatiso ia abia neganai, gado ta guba amo ia boiboi, ia gwau: “Inai be lauegu Natuna, egu lalokau, lau moale bada ia dekenai.” Unai be Dirava ena gadona. Unai dainai ita diba Iesu be Dirava ena Natuna; ia be Dirava lasi, haida idia hereva bamona.

Iesu be tanobada ai ia vara neganai, ia be Dirava ena natuna, tau ginigunana Adam hegeregerena. Hahediba tauna Luka ese Iesu ena bapatiso ia gwauraia, bena ia gwau: “Ena gaukara ia hamatamaia neganai Iesu ena vara lagani be 30 bamona. Taunimanima idia gwau Iesu be Iosepa ena natuna. Edia bese be inai: Heli, . . . Davida, . . . Aberahamo, . . . Noa, . . . Adamu, Dirava.”

Adam be Dirava ena natuna; unai hegeregerena Iesu danu be Dirava ena natuna, to Iesu ese taunimanima iboudiai ia hereadia. Unai ia hedinarai goevagoeva iena mauri sivaraina ita tahua neganai. Bapatiso ia abia neganai, Iesu be lauma dalanai Dirava ena Natuna ai ia lao. Unai neganai Dirava ese dala ia kehoa Iesu ena, unai dala amo ena tanobada maurina, boubou gauna hegeregerena, do ia atoa diho taunimanima hamauridia totona bena guba dekenai do ia giroa lou. Mataio 3:​13-17; Luka 3:​21-38; 1:​34-36, 44; 2:​10-14; Ioane 1:​32-34; Heberu 10:​5-9.

▪ Dahaka dainai Ioane ia diba Iesu?

▪ Dahaka dainai, ena be Iesu ia kara dika lasi, to bapatiso ia abia?

▪ Ioane be dahaka ia diba dainai, Dirava ena lauma be Iesu dekenai ia diho mai neganai ia hoa lasi reana?