Karoa 15

Iesu ena Hoa Karana Ginigunana

ANDREA, Petro, Ioane, Filipo, Natanaela, bona reana Iakobo danu be Iesu ena hahediba taudia ginigunadia ai idia lao, bena dina ta o rua murinai ia ida edia provinsi, Galilea, idia lou henia. Natanaela ena hanua, Kana, dekenai headava ariana ta dekenai idia lao gwauraia. Unai ororo hanuana be Iesu ena hanua Nasaret kahirakahira dekenai.

Iesu ena sinana Maria danu be ia lao bona aria taudia ia hesiai henidia, badina be ia be headava matamata taudia edia bese ena turana ta dainai. Uaina ia ore neganai Iesu ia hamaoroa, ia gwau: “Edia uaina ia ore vadaeni.”

Maria ia ura Iesu ese ia durudia, to Iesu ese ia haere henia, ia gwau: “Hahine e, lau dekenai be dahaka oi karaia?” Iesu be Dirava ese ia makaia Pavapavana dainai, iena varavara eiava iena turadia ese idia oda henia be maoro lasi. Unai dainai Maria ese hesiai taudia ia hamaorodia, ia gwau: “Umui dekenai ia hamaoroa gauna be do umui karaia.”

Hodu badadia 6 idia helai noho; ta ta edia anina be lita 100 bamona. Iesu ese hesiai taudia ia oda henidia hodu be ranu amo do idia hahonudia. Idia hahonudia momokani, bena Iesu ia gwau: “Harihari umui bubua, bona do umui abia lao aria biaguna dekenai.”

Aria biaguna ese uaina ia inua neganai, ia laloa ena mamina be namo herea, ia diba lasi Iesu ese hoa dalana amo ia karaia. Bena headava tauna ia hereva henia, ia gwau: “Taunimanima ibounai ese uaina namo herea idia atoa diho guna, vadaeni vadivadi taudia ese momo idia inua murinai, be uaina sisina ia namo idia atoa diho. To oi be uaina namo herea oi dogoatao vadaeni, ia mai bona harihari.”

Unai be Iesu ese ia karaia hoa karana ginigunana, bona ena hahediba taudia ese idia itaia neganai, edia abidadama ia goada. Unai murinai, Iesu mai ena sinana ida, bona ena tadina bona ena hahediba taudia ida, idia lao Kaperanaum. Ioane 2:​1-12.

▪ Edena negai headava ariana be Kana dekenai idia karaia?

▪ Dahaka dainai Iesu ese ena sinana ena hereva ia moalelaia lasi?

▪ Iesu ese dahaka hoa karana ia karaia, bona unai kara dainai haida be dahaka idia laloa?