Karoa 112

Iesu ena Paseka Ginigabena be Ia Kahirakahira

TUESDAY, Nisan 11 ai, Olive Ororona dekenai Iesu ese aposetolo ia hadibadia momo. Ena hereva ia hadokoa gwauraia neganai, dina ia diho. Unai murinai ena aposetolo ia hamaorodia, ia gwau: “Umui diba, dina rua do idia ore, Paseka ena aria do idia karaia. Unai neganai Taunimanima ena Natuna ena mase dala do idia karaia, do idia hasatauroa.”

Bena Wednesday, Nisan 12 ai, Iesu be ena aposetolo ida idia laga-ani. Ia diba tomadiho gunalaia taudia ese do idia hamasea dalana idia tahua, badina be Tuesday ai taunimanima vairadiai ia gwau henidia dainai. Unai dainai, Wednesday ai ia be taunimanima vairadiai ia hedinarai lasi, badina ia ura lasi kerere ta do ia vara bena Thursday hanuaboi ai ia be dala lasi Paseka Ariana be ena aposetolo ida do idia karaia.

Hahelaga taudia bona hanua tau badadia ese hahelaga tauna badana ladana Kaiafa ena ruma ai idia hebou. Idia badu badina be Tuesday ai Iesu ese ia gwau henidia, unai dainai palani idia karaia, tiriki karana amo do idia dogoatao bena do idia hamasea. To idia gwau: “Aria dinanai be lasi, taunimanima ese heatu do idia havaraia garina.” Hanua taudia idia gari henidia, badina be idia ese Iesu idia lalo-namo henia dainai.

Iesu do idia alaia mase dalana idia herevalaia hebou noho lalonai, tau ta be idia dekenai ia lao. Idia hoa badina ia be Iesu ena aposetolo ta, Iuda Iskariote unai! Satana ese lalohadai ia henia, iena Biaguna do ia samania totona. Iuda ia hereva henidia, ia gwau: “Bema Iesu ena mase dala lau karaia, dahaka do umui henia lau dekenai?” Mai edia moale ida idia gwau siliva moni 30 do idia henia; Mose ena Taravatu hegeregerena unai be hegui hesiai tauna ta ena davana. Unai murinai Iuda ese Iesu do ia hadikaia negana namona, taunimanima idia noho lasi negana, ia tahua.

Wednesday, dina ia diho neganai, Nisan 13 ia matamaia. Pura gunanai, Friday dekenai, Iesu be Ieriko amo ia mai, unai dainai Wednesday hanuaboi be ena nega namba 6 bona ena nega ginigabena Betania dekenai do ia mahuta. Kerukeru, Thursday ai, gau haida Paseka Ariana totona do idia karaia hegaegae bena dina do ia diho neganai, aria negana do ia matamaia bona Paseka ena mamoe natuna do idia alaia bona ibounai be lahi dekenai do idia gabua. Aria be edeseniai do idia ania, bona daidia ese do idia hegaegaelaia?

Iesu be unai gaudia ia gwauraidia hedinarai guna lasi, reana badina ia ura lasi Iuda be unai do ia diba bena hahelaga taudia do ia hadibadia, bena Paseka Ariana neganai Iesu do idia dogoatao. Thursday, adorahi neganai reana, Iesu ese Petro bona Ioane be Betania amo ia siaidia, ia gwau: “Umui lao, Paseka do umui karaia hegaegae, vadaeni do ita ania.”

Idia ruaosi idia gwau: “Edeseni do ai karaia hegaegae?”

Bena Iesu ese ia hamaorodia, ia gwau: “Hanua badana dekenai do umui raka vareai, tau ta hodu ta ia huaia do umui itaia, vadaeni ia do ia daekau rumana dekenai umui daekau. Vadaeni unai ruma ena biaguna do umui hereva henia, do umui gwau, ‘Hadibaia tauna ia gwau, vadivadi daiutu be edeseni, egu diba tahua taudia danu Paseka do ai ania?’ Vadaeni ia ese ataiai daiutu badana ta do ia hadibaia umui dekenai, ia hegaegae vadaeni. Unuseni Paseka do umui karaia hegaegae.”

Reana unai ruma biaguna be Iesu ena hahediba taudia ta bona ia diba Iesu ese do ia noia iena ruma dekenai unai aria badana do idia karaia. Petro bona Ioane be Ierusalem dekenai idia ginidae neganai, Iesu ese ia gwauraidia guna gaudia idia davaridia. Unai dainai, idia ruaosi ese mamoe bona gau iboudiai Paseka totona idia karaia hegaegae, Iesu bona iena aposetolo 12 be Paseka Ariana do idia karaia hebou totona. Mataio 26:​1-5, 14-19; Mareko 14:​1, 2, 10-16; Luka 22:​1-13; Esodo 21:32.

▪ Wednesday ai, Iesu ese dahaka ia karaia, bona badina be dahaka?

▪ Dahaka dainai tomadiho gunalaia taudia be hahelaga tauna badana ena ruma ai idia hebou, bona dahaka dainai Iuda be idia dekenai ia lao?

▪ Thursday ai, Iesu ese daidia ia siaidia Ierusalem dekenai, bona dahaka totona?

▪ Ia siaidia taudia ese dahaka idia davaria? Edena bamona unai ese ia hahedinaraia Iesu be mai ena siahu idauna?