42

Iesu ese Farisea Taudia Ia Gwau Henidia

IESU ia gwau, bema Satana ena siahu amo demoni ia luludia, anina be Satana ia parara. Ma ia gwau: “Bema au be ia namo, ena huahua danu be do ia namo. Bema au be ia dika, ena huahua danu be do ia dika. Badina be ena huahua dekena amo au do umui diba.”

Demoni luludia karana be huahua namona; unai dainai bema ta ia gwau Iesu ese Satana ia hesiai henia dainai unai bamona ia karaia, unai be kavakava herevana. Bema huahua ia namo, ena au ia dika lasi. To, Farisea taudia edia huahua dikadia, edia samani herevadia koikoidia bona edia inai karadia unai, ese idia hahedinaraia idia dika. Iesu ia gwau: “Gaigai edia natudia e! Umui be mai emui dika dainai, edena bamona hereva namodia do umui gwauraia diba? Tau ena lalona ia honu momokani gaudia dekena amo ena uduna ia hereva.”

Iseda hereva ese iseda lalona edia anina idia hahedinaraia dainai, iseda hereva dainai ita idia hahemaoro henia diba. Iesu ia gwau: “Umui lau hamaoroa, hereva kava ibounai taunimanima ese do idia gwauraia be Kota karaia dinanai edia davana do idia abia. Badina be emu hereva ese do idia hanamoa oi, bona emu hereva ese do idia hadikaia oi.”

Ena be Iesu ese siahu karadia momo ia karaia, to taravatu hadibaia taudia bona Farisea taudia ese idia hamaoroa, idia gwau: “Hadibaia tauna e, ai ura be oi dekena amo toa ta do ai itaia.” Ena be idia ese edia matadia amo Iesu ena siahu karadia idia itadia lasi reana, to taunimanima momo ese idia itadia bona unai idia gorea diba lasi. Unai dainai Iesu ese Iuda gunalaia taudia ia hamaorodia, ia gwau: “Inai nega noho Dirava laloa lasi taudia be dika momokani! Umui ese toa ta umui tahua, a? Lasi, toa ta do lau hedinaraia lasi umui dekenai. Toa be tamona sibona, Iona, peroveta tauna ena toa.”

Iesu ese ena hereva ena anina ia gwauraia, ia gwau: “Iona bamona, dina toi hanuaboi toi gwarume badana ena bogana lalonai ia noho, unai bamona Taunimanima ena Natuna danu dina toi hanuaboi toi tano lalonai do ia noho.” Gwarume ese Iona ia hadonoa, bena gabeai gwarume bogana amo ia lasi, mase amo ia toreisi lou bamona. Unai hegeregerena, Iesu ia gwau, do ia mase bena dina ihatoina ai do ia toreisi lou. To gabeai Iesu ia toreisi lou murinai, Iuda gunalaia taudia ese ‘Iona ena toa’ idia do dadaraia.

Iesu ia gwau, kota badana dinanai, Nineve taudia, guna Iona ena haroro dainai idia helalo-kerehai taudia, ese Iuda taudia do idia samanidia, Iesu idia dadaraia dainai. Ma ia gwau, guna Sieba ena kwini be gabu daudauna amo ia mai Solomon ena aonega herevadia kamonai totona, bona ia itaia gaudia bona ia kamonai herevadia ia hoalaidia, “to iniseniai tau ta ese Solomona ia hanaia.”

Bena Iesu ese tau ta ia parabolelaia, lauma dikana ta ese ia rakatania murinai, gau namodia be ena lalona dekenai ia atodia lasi dainai, lauma dikadia ma 7 idia vareai. Iesu ia gwau unai bamona do ia vara unai uru dikana dekenai. Dirava ese Israel besena ia hagoevaia bona ia hamaoromaoroa​—hegeregere lauma dikana ese unai tau ia rakatania bamona. To unai bese taudia ese Dirava ena peroveta taudia bona Keriso danu idia dadaraia dainai, idia hahedinaraia matamana ai edia dika be taina maragi, to dokona ai edia dika be bada herea.

Iesu ia do hereva noho lalonai, ena sinana bona ena tadina idia ginidae. Unai dainai ta ese Iesu ia hamaoroa, ia gwau: “Oiemu sinana bona oiemu tadina be unai, murimuri dekenai idia gini noho oi dekenai idia hereva gwauraia.”

Iesu ia gwau: “Lauegu sinana bona lauegu tadina be daika?” Bena ena hahediba taudia ia duanaidia, ia gwau: “Lauegu sinana bona lauegu tadina be inai. Badina be lauegu Tamana, guba dekenai ia noho, ena ura idia karaia taudia, idia sibona be lauegu tadina, bona lauegu taihuna, bona lauegu sinana.” Unai hereva amo Iesu ese ia hahedinaraia ena varavara ia lalokau henidia maragi, ena hahediba taudia ia lalokau henidia bada. Mataio 12:​33-50; Mareko 3:​31-35; Luka 8:​19-21.

▪ Farisea taudia ese dahaka idia karaia dainai au bona huahua idia hanamodia lasi?

▪ ‘Iona ena toa’ be dahaka, bona edena bamona idia dadaraia?

▪ Edena dala ai Israel besena, Iesu ena negai, be lauma dikana ese ia rakatania tauna bamona?

▪ Edena bamona Iesu ese ia hahedinaraia ena hahediba taudia ia lalokau henidia bada?