Karoa 72

Iesu ese Hahediba Taudia 70 Ia Siaidia

LAGANI 32 C.E. lalonai, Kalaga Ariana ia ore murinai, Iesu mai ena hahediba taudia ida be Ierusalem kahirakahira dekenai idia do noho. Iena bapatiso negana ela bona unai nega, lagani toi idia ore vadaeni. Unai murinai, Iesu be hua 6 lalodiai Iudea bona Perea dekenai ia haroro ela bona ia mase.

Guna, lagani 30 C.E. ena Paseka Ariana murinai, Iesu be hua 8 bamona Iudea ai ia haroro. To lagani 31 C.E. ai Paseka Ariana dekenai ia lao neganai, Iuda taudia idia hamasea toho dainai ia lao Galilea, bena lagani ta mai kahana unuseniai ia haroro. Unai nega lalonai, taunimanima momo ia hadibadia namonamo bona haroro taudia ai ia halaodia. Vadaeni, lagani 32 C.E. ai, haroro gaukarana badana be Iudea tanona ai ia hamatamaia.

Hahediba taudia 70 ia abidia hidi, bena rua rua amo ia siaidia lao haroro totona. Iesu mai ena aposetolo ida do idia lao hanuadia dekediai idia lao guna.

Iesu ia hamaorodia lasi dubu dekenai do idia lao, to ia hamaorodia taunimanima edia ruma dekenai do idia lao; ia gwau: “Do umui daekau rumana dekenai do umui hereva, do umui gwau, ‘Maino inai ruma dekenai do ia noho.’ Unai ruma dekenai bema maino tauna ta ia noho, emui maino be iena latanai do ia noho.” Dahaka do idia harorolaia? Iesu ia gwau: “Do umui gwau, ‘Dirava ena Basileia be umui dekenai kahirakahira ia ginidae.’ ” Buka ta ladana Matthew Henry’s Commentary ese edia kara be inai bamona ia herevalaia: “Edia Biaguna bamona, idia lao gabudia dekenai, ruma ta ruma ta dekenai idia haroro.”

Iesu ese ia hadibadia herevadia be lagani ta gunanai ena aposetolo 12 ia hadibadia herevadia hegeregeredia. Unai tatau 70 ia hamaorodia haida ese do idia abidia dae lasi. Ia hegaegaelaidia ruma taudia haroro henidia totona, bona siahu ia henidia gorere taudia hamauridia totona. Unai dainai, gabeai, Iesu be unai gabu dekenai do ia ginidae neganai, taunimanima momo do idia ura bada hahediba taudia edia Biaguna do idia hedavari henia, badina unai hoa karadia idia karaia diba dainai.

Unai tatau 70 idia haroro bena Iesu be idia murinai ia haroro. Nega kwadogina lalonai edia gaukara idia haorea bena Iesu dekenai idia giroa bona mai edia moale ida idia hamaoroa, idia gwau: “Lohiabada e, lauma dikadia ese aiemai hereva idia kamonai, oiemu ladana dainai.” Iesu ese edia hereva ia moalelaia, bena ia gwau: “Lau be Satani lau itaia, kevaru bamona guba dekena amo ia moru. Lau ese siahu lau henia umui dekenai, gaigai bona doadoa do umui moia.”

Unai neganai, Iesu ia diba nega dokona ai Dirava ena Basileia do ia vara murinai, Satana mai ena demoni ida be guba amo do ia negedia. Taunimanima ese demoni idia luludia diba; unai ese ia hamomokania unai kara guba dekenai do ia vara diba danu. Unai dainai Iesu ia gwau, momokani Satana be guba amo do ia moru. Unai tatau 70 ese siahu idia abia, gaigai bona doadoa ese idia laulaulaidia gaudia idia moidia totona. To, Iesu ia gwau: “Gau tamona, lauma dikadia ese umui dekenai idia kamonai henia be do umui moalelaia lasi, to inai sibona mo do umui moalelaia​—umui emui ladana be guba dekenai ia torea vadaeni.”

Iesu ia moale bada bona taunimanima vairadiai ena Tamana ia hanamoa, badina ia ese unai lalo-manau hesiai taudia ia gaukaralaidia unai siahu karadia karaia totona. Bena ena hahediba taudia dekenai ia gwau: “Inai gaudia umui itaia taudia emui matana be idia namo vadaeni. Badina be peroveta taudia bona king momo herea idia ura umui ese umui itaia gaudia do idia itaia, to idia itaia lasi, bona umui ese umui kamonai herevadia do idia kamonaia, to idia kamonaia lasi.” Luka 10:​1-24; Mataio 10:​1-42; Apokalupo 12:​7-12.

▪ Iesu ena haroro laganidia ginigunadia toiosi lalodiai edeseniai ia haroro, bona unai murinai hua 6 lalodiai edeseniai ia haroro?

▪ Iesu ese tatau 70 edeseniai ia siaidia haroro totona?

▪ Dahaka dainai Iesu ia gwau, Satana ia itaia guba amo ia moru vadaeni?

▪ Unai tatau 70 ese gaigai bona doadoa idia moidia, ena anina be dahaka?