Karoa 52

Iesu ese Hoa Dalana amo Hutuma Ia Ubudia

APOSETOLO 12 be Galilea ai idia karaia haroro gaukarana idia moalelaia. Idia haorea murinai, Iesu dekenai idia lou lao, bona edia sivarai iboudiai idia hamaoroa. Unai be Ioane ia mase murinai. Iesu ia itaia idia hesiku bona taunimanima hutuma idia mai idia lao dainai edia aniani negana be lasi, unai dainai ia hamaorodia, ia gwau: “Umui mai, taunimanima noho lasi gabuna ita lao, ita laga-ani sisina.”

Kaperanaum kahirakahira dekenai, vanagi ai idia gui, taunimanima idia noho lasi gabuna ta idia lao, Betesaida unai kahanai. To idia lao neganai, hutuma ese idia itadia bona ma haida ese edia lao sivaraina idia kamonai. Unai dainai idia iboudiai be kone dekenai idia heau lao, Iesu bona aposetolo idia lao gabuna dekenai idia ginidae guna.

Vanagi amo ia diho neganai, Iesu ese hutuma bada ia itadia, bona ia bogadia hisi, badina be idia be mamoe hegeregeredia, mai edia naria tauna lasi. Unai dainai edia gorere taudia ia hamauridia bona hereva momo ia hadibadia.

Dina ia diho gwauraia neganai, hahediba taudia be Iesu dekenai idia lao, idia gwau: “Inai be aniani lasi gabuna, hanuaboi be kahirakahira ia mai. Hutuma oi siaia lao namo, idia lao uma bona hanua maragidia, aniani haida idia hoia, idia ania.”

To Iesu ia gwau: “Umui sibona ese aniani umui henia idia dekenai.” Iesu ia diba dahaka do ia karaia, to Filipo ia tohoa totona, ia gwau: “Ita be edeseni aniani gaudia do ita hoia, inai taunimanima do ita ubua totona?”

Filipo ia laloa dala be lasi. Tatau iboudiai be 5,000 bona hahine bona natudia danu idia noho, iboudiai be 10,000 mai kahana! Filipo ia gwau: “200 kina dekenai aniani gaudia do ita hoia to do ia hegeregere lasi, sisina sisina sibona do idia ania.”

Reana Andrea ia ura ia hahedinaraia dala be lasi hutuma do idia ubudia, unai dainai ia gwau: “Mero maragi ta iniseniai, ia be mai ena paraoa maragidia 5 bona gwarume maragi rua, to unai be edena bamona do ita karaia, taunimanima be momo herea?”

Unai be lagani 32 C.E. ai ia vara, Paseka negana be kahirakahira neganai. Unai be tubutubu negana danu, unai dainai rei matamata be momo. Iesu ese ena hahediba taudia ia hamaorodia, hutuma idia hamaorodia, rei dekenai idia helai diho, haida 50 amo, haida 100 amo. Bena paraoa ima bona gwarume rua ia abidia, ena matana ia negea gubai, ia guriguri. Bena paraoa bona gwarume ia makohidia, hahediba taudia ia henidia, bena taunimanima dekenai idia hariharilaidia. Hoa gauna inai, taunimanima iboudiai idia aniani ela bona idia boga kunu!

Unai murinai, Iesu ese ena hahediba taudia ia hamaorodia, ia gwau: “Aniani orena do umui haboua, kahana maragimaragi ta do ia boio lasi.” Idia haboua neganai bosea 12 idia hahonudia! Mataio 14⁠:​13-21; Mareko 6⁠:​30-44; Luka 9⁠:​10-17; Ioane 6⁠:​1-13.

▪ Dahaka dainai Iesu ese taunimanima idia noho lasi gabuna ta ia tahua ena hahediba taudia totona?

▪ Ena hahediba taudia be edeseni ia laohaidia, bona dahaka dainai unuseniai idia laga-ani diba lasi?

▪ Dina ia diho neganai, hahediba taudia be dahaka idia gwau, to Iesu ese taunimanima edena bamona ia ubudia?