Karoa 91

Iesu ese Lasaro Ia Hatorea Isi Lou

IESU bona ia ida idia raka hebou taudia be Lasaro ena gara ai idia ginidae neganai, Iesu ia gwau: “Nadi umui kokia.” Ena gara be kohua ta, nadi badana amo ena iduara idia koua.

Mareta ese Iesu do ia karaia karana ia diba lasi dainai, ia gwau: “Lohiabada e, ia bodaga vadaeni, badina be dina 4 ia mase vadaeni.”

To Iesu ia gwau: “Edena bamona? Oi lau hamaoroa guna ani, bema oi abidadama henia, be Dirava ena hairaina do oi itaia?”

Vadaeni, nadi badana idia kokia, bena Iesu ese ena matana ia negea, guba ia itaia, ia guriguri, ia gwau: “Egu Tamana e, lau hanamoa oi, badina be oi ese lau oi kamonai henia noho. Lau diba oi be nega ibounai oi kamonai henia lau. Gau tamona, inai taunimanima lau dekenai idia gini hagegea lau laloa. Idia dainai lau hereva inai bamona, lau be oi ese oi siaia, do idia abia dae totona.” Taunimanima vairadiai Iesu ia guriguri, badina ia ura idia diba, ia karaia gwauraia karana be Dirava ena amo ia abia siahuna amo ia karaia. Bena ia boiboi badabada, ia gwau: “Lasaro e, oi mai murimuri dekenai.”

Vadaeni Lasaro ia raka lasi. Ena aena bona ena imana idia kumia dabuana bona ena vairana idia kumia dabuana be idia do noho. Iesu ia gwau: “Kumia dabua umui kokia, umui rakatania.”

Maria bona Mareta edia lalona hanamoa totona idia mai taudia momo ese unai hoa karana idia itaia neganai, Iesu idia abidadama henia. To ma haida be Farisea taudia dekediai idia lao, Iesu ena kara idia hamaorolaidia. Maoromaoro Farisea taudia bona hahelaga taudia ese Iuda kaunsolo taudia badadia idia boiridia, edia kota badana, Sanhedrin, dekenai idia hebou totona.

Sanhedrin dekenai idia hebou taudia be inai: hahelaga tauna badana ladana Kaiafa, Farisea taudia, Sadukea taudia, hahelaga taudia, bona hahelaga taudia badadia gunadia. Idia gwau: “Edena bamona do ita karaia, badina be unai tau ese toa momo ia karaia? Bema ita dogoatao lasi, taunimanima ibounai ese do idia abidadama henia, vadaeni Roma taudia do idia mai, iseda Dubu Helaga bona iseda bese do idia hadikaia ore.”

Ena be unai tomadiho gunalaia taudia idia diba Iesu ese “toa momo ia karaia,” to idia laloa momo gauna tamona be, sibodia edia dagi bona sibodia edia siahu. Iesu ese Lasaro ia hatorea isi lou neganai, unai ese Sadukea taudia edia hereva ia hakoikoia momokani, badina be idia gwau toreisi lou be lasi.

Kaiafa, reana ia be Sadukea tauna, ia hereva, ia gwau: “Umui be gau ta umui diba lasi, umui laloa lasi, namona be taunimanima dainai tau tamona ia mase to namo lasi iseda bese ibounai idia hadikaia ore.”

Dirava ese Kaiafa ia hasiahua unai hereva do ia gwauraia, badina be gabeai aposetolo Ioane ia gwau: “ [Kaiafa] be unai bamona ia hereva, sibona ena ura dekenai lasi.” Kaiafa ia laloa ena hereva ena anina be inai: Namona be Iesu idia hamasea, edia dagi o edia siahu do ia hadikaia garina. To Ioane ia gwau, ‘Kaiafa ia gwau, Iesu be ena bese sibona dainai do ia mase lasi, to Dirava ena natuna iboudiai be orea tamona lalonai do ia gogodia totona.’ Bona momokani, unai negai Dirava ena ura be ena Natuna do ia mase taunimanima iboudiai edia mauri davana karaia totona.

Kaiafa ese Sanhedrin taudia edia lalodia ia ania, Iesu do idia hamasea dalana idia tahua totona. To Iesu ese unai gabu ia rakatania, reana badina be Sanhedrin tauna ta ladana Nikodemo, Iesu ia lalo-namo henia tauna, ese edia palani ia hadibaia dainai. Ioane 11:​38-54.

▪ Dahaka dainai Iesu be taunimanima vairadiai ia guriguri, Lasaro ia hatorea isi lou gwauraia neganai?

▪ Unai toreisi lou idia itaia taudia be dahaka idia karaia?

▪ Dahaka ese ia hahedinaraia, Sanhedrin taudia be kara dika taudia?

▪ Kaiafa ena ura korikorina be dahaka, to Dirava ese ia hasiahua dahaka do ia perovetalaia totona?