Karoa 18

Ioane Do Ia Maragi, Iesu Do Ia Bada

LAGANI 30 C.E. ena Paseka murinai, Iesu bona ena hahediba taudia ese Ierusalem idia rakatania bena Iudea dekenai idia lao taunimanima bapatisodia totona. Lagani ta ia lao vadaeni, Ioane Bapatiso ese unai gaukara ia hamatamaia, bona ena hahediba taudia haida ese idia bamoa noho.

Iesu ese taunimanima ia bapatisodia lasi, to ena oda hegeregerena ena hahediba taudia ese. Idia karaia bapatisona bona Ioane ese ia karaia bapatisona edia anina be tamona; ia be Dirava ena Taravatu idia utua Iuda taudia be edia kara dika amo idia helalo-kerehai ena toana. To, Iesu be mase amo ia toreisi lou murinai, ena hahediba taudia ia hamaorodia idia be bapatiso mai anina idauna do idia karaia. Hari inai negai Keristen bapatisona be toa ta, ia hahedinaraia bapatiso tauna ese Iehova Dirava ia gwauhamata henia ena ura do ia karaia hanaihanai.

Ena be Iesu be ena haroro gaukara ia hamatamaia neganai ia be Ioane ida idia gaukara hebou lasi, to ruaosi ese gaukara tamona idia karaia​—taunimanima idia hadibadia bona helalokerehai taudia idia bapatisodia. To Ioane ena hahediba taudia ese Iesu idia mama henia bona idia maumauraia ia dekenai; idia gwau: “Rabi e, . . . ia bapatiso karaia noho. Bona taunimanima ibounai ia dekenai idia lao noho.”

Ioane ese Iesu ia mama henia lasi, to ena gaukara ia moalelaia bona ia ura ena hahediba taudia danu do idia moalelaia. Ia hamaorodia, ia gwau: “Umui danu umui diba lau gwau lau be Keriso lasi, to iena vairana dekenai lau mai guna totona Dirava ese lau ia siaia vadaeni.” Bena parabole namona ta ia gwauraia, ia gwau: “Headava matamata hahine be headava matamata tauna ese ia biagua. To headava matamata tauna ena turana be ia gini noho, ia hakala, vadaeni headava matamata tauna ena gadona ia kamonai neganai ia moale bada. Unai dainai, lauegu moale be ia momokani vadaeni.”

Ioane be Headava Matamata Tauna ena turana dainai, hua 6 idia lao vadaeni, ia be mai ena moale ida ena hahediba taudia ia hakaudia lao Iesu dekenai. Gabeai idia haida be Dirava ese ena lauma helaga amo ia horodia, guba dekenai Keriso ena headava matamata hahinena oreana taudia ai do idia lao diba totona. Ioane ia ura ena hahediba taudia oredia danu ese Iesu do idia gavaia, badina Dirava ese ia siaia, Keriso ena dala ia lailaia totona. Ioane Bapatiso ia gwau: “Ia be do ia bada, lau be do lau maragi.”

Iesu ena hahediba tauna matamatana, Ioane, guna ia danu be Ioane Bapatiso ena hahediba tauna ta, be Iesu ena matamana bona Iena hahemauri siahuna badana ia gwauraia, ia gwau: “Atai ai dekena amo ia mai tauna be ibounai edia biaguna . . . Tamana ese ena Natuna ia lalokau henia, bona gau ibounai iena imana dekenai ia atoa vadaeni. Ena Natuna ia abidadama henia tauna ese mauri hanaihanai do ia abia, to ena Natuna ia kamonai henia lasi tauna be mauri do ia itaia lasi, to Dirava ena badu be iena latanai do ia noho.”

Ioane Bapatiso ese sibona ena gaukara do ia maragi herevana ia gwauraia, bena nega sisina murinai King Herod ese dibura rumana lalonai ia koua, badina be ena kakana Filipo ena adavana, Herodia ia abia iena neganai, Ioane ese ia samania taunimanima vairadiai. Iesu ese unai sivarai ia kamonai neganai, ia mai ena hahediba taudia ida be Iudea idia rakatania, idia lao Galilea. Ioane 3:22–4:3; Kara 19:4; Mataio 28:19; 2 Korinto 11:2; Mareko 1:14; 6:​17-20.

▪ Iesu ia do mase lasi neganai ena oda hegeregerena idia karaia bapatisona ena anina be dahaka? Ena toreisi lou murinai idia karaia bapatisona ena anina be dahaka?

▪ Edena bamona Ioane ese ia hahedinaraia ena hahediba taudia edia maumau be anina lasi?

▪ Dahaka dainai Herod ese Ioane dibura rumana lalonai ia koua?