Karoa 38

Ioane Ia Abidadama Lasi A?

IOANE Bapatiso be lagani tamona lalonai dibura rumana ai ia noho, bena sivarai ia kamonai Nain dekenai Iesu ese vabu ta ena natuna ia hatorea isi. To Ioane ia ura Iesu sibona ena hereva do ia kamonai, unai dainai ena hahediba taudia rua ia siaidia, Iesu do idia nanadaia, do idia gwau: “Do ia mai tauna be oi, o idau tauna ta do ita naria?”

Reana Ioane ena henanadai oi hoalaia, badina lagani rua bamona idia ore vadaeni, Iesu ia bapatisoa neganai, Dirava ena lauma helaga ia itaia Iesu dekenai ia diho bona Dirava ena gadona ia kamonai, Iesu ia hamaoroa ia lalo-namo henia. Reana haida idia laloa Ioane ena abidadama ia manoka ia lao, unai dainai unai bamona ia henanadai. To ia be unai bamona lasi. Bema Ioane ena abidadama ia goada lasi, Iesu ese ia gwauraia namo lasi, to ia gwauraia namo. Vadaeni, dahaka dainai Ioane be unai bamona ia henanadai?

Reana Ioane ia ura Iesu ese ia hamaoroa Ia be Mesia. Ioane be dibura rumana ai ia noho dainai, unai hereva bema ia kamonai unai ese ena lalona do ia hagoadaia. To Ioane ena henanadai be mai ena badina ma ta. Ia ura diba, Iesu murinai ma ta be iena gabu abia tauna bamona do ia mai, bona idia perovetalaia gaudia, Mesia ese do ia karaia karadia, do ia hagugurudia, eiava.

Ioane ia diba, Baibel ena peroveta herevadia hegeregeredia, Dirava ese ia horoa Tauna be pavapava ai do ia lao, taunimanima edia hahemauri tauna unai. Ena be Iesu ia bapatiso bona hua momo idia ore vadaeni, to Ioane be dibura rumana ai ia do noho. Unai dainai Ioane ena henanadai ena anina be inai bamona: ‘Oi ese Dirava ena Basileia do oi haginia, eiava ma ta do ai naria, oi murinai do ia mai bona Mesia ena hairai idia perovetalaia herevadia do ia hagugurudia, a?’

Iesu ese Ioane ena hahediba taudia ia hamaorodia lasi, ‘Oibe, idia perovetalaia tauna be lau!’ Lasi, to ena siahu karadia ia hahedinarai henidia​—gorere idauidau taudia momo ia hamauridia. Bena ia hamaorodia, ia gwau: “Umui lao, umui itaia bona umui kamonai karadia Ioane dekenai do umui hamaoroa. Matakepulu taudia edia matana idia kehoa, aena dika taudia idia raka namonamo, lepera taudia idia goeva, taia kudima taudia idia kamonai, mase taudia idia toreisi, bona ogogami taudia Sivarai Namo idia kamonai henia.”

Reana Ioane ia laloa namona be Iesu ese dibura rumana amo ia ruhaia nege, to unai hereva amo Iesu ese ia hamaoroa hoa karadia momo ia karaia vadaeni, namo lasi Ioane ia laloa ma haida do ia karaia be namo.

Ioane ena hahediba taudia idia raka oho neganai, Iesu ese hutuma ia hamaorodia, Ioane be Iehova ena “gwaukau tauna,” Malaki 3:1 ese ia perovetalaia tauna, bona peroveta tauna Elia danu, Malaki 4:​5, 6 ese ia perovetalaia tauna. Bena Ioane ia hanamoa, ia gwau peroveta taudia gunadia ta ese Ioane ia hereaia lasi. Ia gwau:

“Umui lau hamaoroa momokani, hahine edia bogana dekena amo idia vara taudia ibounai be ta ese Ioane ia hanaia lasi, to Guba Basileia lalonai, tau maragina ese Ioane ia hanaia. Ioane Bapatiso ena haroro nega ia mai bona harihari Guba Basileia be taunimanima ese idia heatu henia noho, bona heatu taudia ese idia ura dogoatao momokani.”

Unai hereva amo Iesu ese ia hahedinaraia Ioane be guba Basileiana lalonai do ia noho lasi, badina be Basileia lalonai gabe tauna ese Ioane ia hereaia. Ioane ese Iesu ena dala ia lailaia, to Keriso ese Basileia iena hahediba taudia edia ia do gwauhamatalaia lasi neganai, Ioane ia mase; unai gwauhamata hegeregerena ia ida Basileia lalonai do idia lohia hebou. Unai dainai Iesu ia gwau Ioane be guba Basileiana lalonai do ia noho lasi. To Ioane be tanobada ai do ia mauri noho Dirava ena Basileia henunai. Luka 7:​18-30; Mataio 11:​2-15.

▪ Dahaka dainai Ioane ese Iesu ia nanadaia: ‘Do ia mai tauna be oi, o idau tauna ta do ai naria?’

▪ Iesu ia gwau Ioane ese edena peroveta herevadia ia hagugurudia?

▪ Dahaka dainai Ioane Bapatiso be Iesu ida guba lalonai do ia noho lasi?