Karoa 11

Ioane ese Dala Ia Lailaia

IESU ena lagani be 12 neganai dubu lalonai hahediba taudia ia henanadai henidia, bena ma lagani 17 idia ore murinai, lagani 29 C.E. ai, Iesu ena kakana lahaina, Ioane, be Ioridane Sinavaina kahanai ia haroro loaloa.

Ioane ena toana bona ena hereva be taunimanima ese idia hoalaia. Ena dabua be kamelo ena huina, bona ena gaba gauna be boromakau ena kopina. Ena aniani be kwadi bona uda ena hani. Ia haroro, ia gwau: “Emui lalona umui giroa, badina be Dirava ena Basileia be kahirakahira ia mai.”

Unai hereva ese kamonai taudia edia lalona ia hamarerea. Idia momo idia diba, namona be edia mauri dalana gunana amo do idia helalo-kerehai. Unai dainai Ioridane kahana hanuadia iboudiai amo bona Ierusalem amo taunimanima hutuma idia lao Ioane dekenai, bena Ioridane Sinavaina lalonai ia bapatisodia.

Unai bapatiso be toa ta, ia hahedinaraia edia lalona idia giroa vadaeni bona idia sori Dirava ena Taravatu idia utua dainai. Unai dainai, Farisea taudia bona Sadukea taudia haida be Ioridane dekenai idia lao neganai, Ioane ese ia gwau henidia, ia gwau: “Gaigai edia natudia e, . . . lalona giroa ena anina umui hedinaraia! Bona emui lalona dekenai umui hereva lasi, ‘Aiemai tamana be Aberahamo,’ badina be umui lau hamaoroa, Dirava be mai ena siahu inai nadi dekena amo ena natudia do ia havaraia Aberahamo ena. Harihari ira be au edia ramuna dekenai idia atoa hegaegae. Unai dainai huahua namodia idia atoa lasi au ibounai be do idia utua, lahi dekenai do idia negea.”

Taunimanima momo ese Ioane idia herevalaia dainai, Farisea taudia ese hahelaga taudia bona Levi oreana taudia haida idia siaidia ia dekenai. Idia nanadaia, idia gwau: “Oi be daika?”

Ioane ia gwau: “Lau be Keriso lasi.”

Idia nanadaia, idia gwau: “Sedira, oi be Elia, a?”

Ia haere, ia gwau: “Lau be Elia lasi.”

Ma idia gwau: “Ai naria noho Peroveta Tauna be oi, a?”

Ia gwau: “Lasi.”

Bena idia nanadaia lou, idia gwau: “Oi be daika? Oiemu haere be ai idia siaia mai taudia dekenai do ai hamaoroa. Oi sibona oiemu sivarai be mani oi gwauraia.”

Ioane ia gwau: “Lau be, gado ta taunimanima idia noho lasi tano dekenai ia boiboi noho, ia gwau, Lohiabada ena dala umui karaia hegaegae. Inai be Isaia, peroveta tauna, ena hereva hegeregerena.”

Ma idia nanadaia lou, idia gwau: “Bema oi be Keriso lasi, Elia lasi, bona unai ai naria noho Peroveta Tauna lasi, badina dahaka bapatiso oi karaia noho?”

Ioane ia haere, ia gwau: “Lau be ranu dekenai bapatiso lau henia, to umui emui huanai, umui diba lasi tauna ta ia gini noho. Ia be lauegu murinai do ia mai.”

Ioane ese dala ia lailaia, anina be taunimanima edia lalona ia hegaegaelaia, Mesia do idia abia dae totona. Ia herevalaia, ia gwau: “Lauegu murina dekenai do ia mai tauna be lauegu siahu do ia hanaia. Lau be namo lasi iena tamaka do lau abia loaloa.” Ma ia gwau: “Lauegu murina dekenai do ia mai tauna be ia bada, to lau be maragi. Badina lau be do lau vara lasi neganai, ia be guna ia noho vadaeni.”

Ioane ena hereva, “Dirava ena Basileia be kahirakahira ia mai” herevana, amo taunimanima ia hadibadia, Iehova ese ia abia hidi Pavapavana, Iesu Keriso, ese ena gaukara ia hamatamaia gwauraia. Ioane 1:​6-8, 15-28; Mataio 3:​1-12; Luka 3:​1-18; Kara 19:4.

▪ Ioane be edena bamona tauna?

▪ Dahaka dainai Ioane ese taunimanima ia bapatisodia?

▪ Dahaka dainai Ioane ia gwau Basileia ia mai kahirakahira vadaeni?