Karoa 33

Isaia ena Peroveta Herevana Ia Hamomokania

IESU ese sivarai ia kamonai, Farisea taudia bona Herod ena orea taudia be ia do idia hamasea dalana idia tahua, bena ia mai ena hahediba taudia ida idia lao Galilea Gohuna dekenai. Hutuma be Iudea bona gabu idauidau amo idia mai ia dekenai. Gorere taudia hutuma ia hamauridia vadaeni dainai, gorere taudia iboudiai idia aru mai Iesu do idia daua toho totona.

Hutuma idia mai dainai, Iesu ese ena hahediba taudia ia hamaorodia vanagi ta do idia atoa hegaegae, bena, bema hutuma ese ena gaukara dalana idia koua, vanagi amo do ia hadibadia diba eiava idau gabuna ta dekenai do idia bara lao diba ma haida hamauridia totona.

Hahediba tauna Mataio ia gwau, Iesu ena kara ese ‘Isaia, peroveta tauna, ena hereva ia hamomokania vadaeni.’ Bena unai peroveta herevana ia gwauraia; ia gwau:

“Itaia, lauegu hesiai tauna be inai, lau abia hidi vadaeni, egu lalokau, lau moale ia dekenai. Egu Lauma be ia latanai do lau atoa, ia ese kota maoromaoro karaia dalana be bese ibounai dekenai do ia gwauraia. Do ia heai lasi, do ia boiboi lasi. Hanua edia huanai iena boiboi do idia kamonai lasi. Siriho manokana be ia ese do ia makohia lasi, lahi manokana do ia habodoa lasi, ela bona kota maoromaoro karaia dalana do ia kwalimu momokani. Iena ladana dainai be bese ibounai do idia naria mai laloa namona danu.”

Momokani, Iesu be Dirava ena hesiai tauna, ia lalokau henia bona ia lalo-namo henia tauna. Bona kota maoromaoro karaia dalana, tomadiho herevadia koikoidia ese idia hunia dalana, be Iesu ese ia hahedinaraia goevagoeva. Farisea taudia ese Dirava ena taravatu ena anina idia mogea dainai, Sabati dinana ai gorere tauna idia durua diba lasi! Dirava ena hahemaoro maoromaoro ia gwauraia hedinarai goevagoeva neganai, Iesu ese anina lasi taravatudia edia metau be taunimanima edia amo ia kokidia. Unai dainai tomadiho gunalaia taudia ese Iesu idia hamasea toho.

Inai hereva, “do ia heai lasi, do ia boiboi lasi. Hanua edia huanai iena boiboi do idia kamonai lasi,” ena anina be dahaka? Iesu ese taunimanima ia hamauridia neganai, ia hamaorodia, “iena sivarai do idia herevalaia lasi.” Ia ura lasi taunimanima be mai rege bada ida ena kara be ariara dekenai do idia boiboilaia eiava idia mogea vadaeni sivaraidia be taunimanima ta ta dekenai do idia gwauraia.

Iesu ese ena sivarai namona ia harorolai henidia taudia be siriho manokana ta bamona, taunimanima ese idia moia gauna, bona idia be lamepa ena uiki ena lahi manokana bamona, ia bodo gwauraia gauna. Iesu be unai bamona taudia ia hadikadia lasi, to mai ena manau bona mai ena hebogahisi ida unai manau taudia ia hagoadadia. Momokani, bese iboudiai ese Iesu idia naria diba; ia be edia helaro! Mataio 12:​15-21; Mareko 3:​7-12; Isaia 42:​1-4.

▪ Edena bamona Iesu ese hahemaoro goevagoeva ia hahedinaraia goevagoeva, ia heai lasi, bona ia boiboi badabada lasi?

▪ Edena taudia be siriho manokana bona lahi ena uiki manokana bamona, bona Iesu ese edena bamona ia kara henidia?