Karoa 89

Iudea Dekenai Ia Lao Ta Hamauria Totona

PURA haida idia lao vadaeni, Ierusalem dekenai, Dubu Hahelagaia Ariana neganai, Iuda taudia ese Iesu idia hamasea gwauraia. Unai dainai mirigini kahanai ia lao, Galilea Gohuna kahirakahira dekenai.

Bena vanegai, Ierusalem ia lou henia noho neganai, Perea provinsi ena hanua lalodiai ia haroro, Ioridane Sinavaina ena mairiveina kahanai. Kohu momo tauna bona Lasaro edia parabole ia gwauraia murinai, Galilea ai ia gwauraia vadaeni herevadia be ena hahediba taudia ia hadibadia noho.

Ia hamaorodia, ia namo lasi bema ta ese Dirava ena “mero maragi ta” ia hahekwakwanaia. Ia gwau: “Tau unai bamona dekenai be namo iena aiona dekenai nadi badana idia kwatua, idia negea davara lalonai.” Danu, ia gwau namona be ta ese ma ta ena kara dika ia gwauatao; ia gwau: “Dina tamona dekenai nega 7 bema [tadikaka] ia hadikaia oi dekenai, vadaeni nega 7 bema ia giroa mai oi dekenai, do ia gwau, ‘Lau be, egu lalona lau giroa inai,’ vadaeni ena dika do oi gwauatao.”

Hahediba taudia ese Iesu idia noia, idia gwau: “Aiemai abidadama oi habadaia.” Ia gwau: “Emui abidadama bema mastadi ena uhena bamona, umui ese inai au badana bema umui hereva henia, umui gwau, ‘Oi sibona do oi abia isi, davara dekenai oi sibona do oi hadoa,’ vadaeni ia be do ia kamonai henia umui dekenai.” Unai hegeregerena, abidadama maragi ese anina bada ia havaraia diba.

Bena Iesu ese hereva ta ia gwauraia, siahu ibounai Diravana ena hesiai tauna ena lalohadai maorona hahedinaraia totona. Ia gwau: “Umui daika emu hesiai tauna tano makohia gaukara o mamoe naria gaukara dekena amo hanua dekenai do ia ginidae neganai do oi hamaoroa, do oi gwau, ‘Oi mai helai diho haraga, oi aniani?’ Lasi, oi be do oi gwau, ‘Egu aniani oi nadua, emu rami do oi kwatua, egu hesiai do oi lao henia ia lao bona do lau aniani ore bona do lau inuinu ore, unai murinai oi do oi aniani bona do oi inuinu,’ ani? Oi be hesiai tauna dekenai oi hanamoa, oi hereva henia gaukaradia ia karaia dainai, a? Lasi. Unai dainai, umui danu, umui dekenai Dirava ia hereva karadia ibounai do umui karaia, vadaeni do umui gwau, ‘Ai be hesiai taudia namodia lasi, badina be ai dekenai idia hereva karadia sibona ai karaia vadaeni.’ ” Unai dainai, namo lasi Dirava ena hesiai taudia idia laloa Dirava idia hesiai henia neganai idia durua unai. To namona be inai idia laloa: Dirava ese ia abidadama henidia dainai ena hesiai gaukara lalonai ia hagaukaradia be hahenamo ta idia dekenai.

Iesu ese unai sivarai ia gwauraia murinai, gwaukau tauna ta ia ginidae. Iudea ena hanua ladana Betania ena hahine rua, Maria bona Mareta, Lasaro ena taihudia, ese idia siaia. Ia gwau: “Lohiabada e, oiemu lalokau tauna be ia gorere noho.”

Iesu ia gwau: “Inai gorere be mase gauna lasi, to ia be Dirava hanamoa totona. Dirava ena Natuna ese hairai do ia abia inai kara dainai.” Dina rua murinai, ena hahediba taudia ia hamaorodia, ia gwau: “Iudea dekenai ita giroa lou.” Idia gwau: “Rabi e, vanegai Iuda taudia ese nadi dekena amo oi idia hodoa toho, harihari unai gabu dekenai do oi giroa lou, a?”

Iesu ia haere, ia gwau: “Dina ta ena hora be 12 lasi, ani? Dinai ia loaloa tauna be kerere do ia davaria lasi, ani? Badina be ia ese inai tanobada ena diarina ia itaia. To hanuaboi neganai ia loaloa tauna be kerere ia davaria, badina iena lalona dekenai diari be lasi.”

Iesu ena hereva ena anina be inai: “Dina ta ena hora” anina be Dirava ese ia gwauraia negana, unai nega lalonai Iesu be tanobada dekenai do ia gaukara. Unai nega ia do ore lasi, unai dainai ta ese ia hadikaia diba lasi. Namona be unai dina ena diari negana orena ai ia gaukara, badina gabeai, ena inai taudia do idia hamasea negana be “hanuaboi” bamona.

Iesu ma ia gwau: “Iseda turana Lasaro be ia mahuta noho, to lau lao, do lau haoa.”

Hahediba taudia idia laloa Lasaro do ia namo lou, badina be ia mahuta namonamo. Unai dainai, idia gwau: “Lohiabada e, bema ia mahuta be do ia namo lou.”

Bena Iesu ia hamaorodia goevagoeva, ia gwau: “Lasaro be ia mase vadaeni, bona umui totona lau moale, lau be unuseniai lasi, badina unai dekena amo do umui hamomokania lau dekenai. Vadaeni ita lao ia dekenai.”

Ena be Toma ia diba Iudea ai Iesu do idia hamasea reana, to ia ura do ia durua noho. Unai dainai hahediba taudia oredia ia hamaorodia, ia gwau: “Ita danu ita lao, ia danu do ita mase hebou.” Unai dainai, ena be idia danu do idia mase reana, to Iesu idia bamoa, Lasaro hamauria totona Iudea dekenai ia lao neganai. Luka 13:22; 17:​1-10; Ioane 10:​22, 31, 40-42; 11:​1-16.

▪ Vanegai, Iesu be edeseniai ia haroro noho?

▪ Iesu ese edena hahediba herevadia ia gwauraia lou, bona edena hereva hegeregerena ia gwauraia bona ia amo dahaka ia hadibadia?

▪ Iesu be dahaka sivarai ia kamonai, bona “dina” bona “hanuaboi” herevadia edia anina be dahaka?

▪ Toma ia gwau: “Ita danu ita lao, ia danu do ita mase hebou”; ena hereva ena anina be dahaka?