Karoa 66

Kalaga Ariana Dekenai

IESU ia bapatiso murinai, lagani toi lalodiai taunimanima hutuma ese ena hoa karadia idia itaia, bena ena kara idauidau be tano ibounai dekenai idia sivarailaidia. Taunimanima be Kalaga Ariana totona Ierusalem dekenai idia hebou neganai, Iesu idia tahua. Idia gwau: “Iesu be edeseni?”

Iesu idia hepapahuahulaia bada. Haida idia gwau: “Ia be tau namona.” Ma haida idia gwau: “Lasi, ia ese taunimanima ia hakaudia kerere.” Aria ena matamanai unai bamona hereva momo idia gwauraia. To ta ena lalona ia goada lasi Iesu ia gwauraia hedinarai, badina be Iuda gunalaia taudia ese do idia hadikadia garina idia gari dainai.

Aria dinadia haida idia ore murinai, Iesu ia ginidae. Dubu ai ia daekau, bena ia hadibadia matamaia neganai, taunimanima ese ena hadibaia dalana idia hoalaia. Tomadiho ena sikuli dekenai ia lao lasi dainai, Iuda taudia idia gwau: “Inai tau be ia sikuli lasi, to edena bamona ia diba momo?”

Iesu ia hamaorodia, ia gwau: “Lauegu hadibaia herevadia be lauegu lasi, to lau ia siaia Diravana ena. Tau ta bema ia ura Dirava ena ura ia karaia neganai, ia ese lauegu hadibaia herevadia do ia diba, Dirava dekena amo idia mai, o lau sibona dekena amo.” Iesu ena hahediba herevadia be Dirava ena taravatu hegeregerena, unai dainai ia hedinarai goevagoeva ia ese Dirava hanamoa dalana ia tahua, sibona ena lasi. Iesu ia nanadaidia, ia gwau: “Mose ese taravatu ia henia umui dekenai, ani?” Bena ia gwau henidia, ia gwau: “Umui be taravatu umui badinaia lasi.”

Bena ia nanadaidia, ia gwau: “Dahaka dainai lau umui alaia dalana umui tahua?”

Aria dekenai idia mai taudia momo idia diba lasi haida be unai bamona idia karaia toho. Idia laloa ta ia ura lasi Iesu do ia alaia, badina ia be hadibaia tauna namo hereana. Unai dainai idia nanadaia, idia gwau: “Oi kavakava a? Daika ia ura oi do ia alaia?”

Ena be hutuma idia diba lasi, to Iuda gunalaia taudia idia ura Iesu do idia alaia. Lagani ta mai kahana gunanai, Sabati dinana ai tau ta ia hamauria neganai, idia ura idia alaia. Unai dainai Iesu ia hamaorodia, ia gwau: “Dina Sabati dekenai mero ta ena kopina do umui utua, Mose ena taravatu do umui makohia garina, to edena bamona lau be umui badu henia, Dina Sabati dekenai tau ta lau hanamoa momokani dainai? Gau edia toana sibona dekena amo do umui kota henia lasi, to do umui kota henia mai maoromaoro danu.”

Bena Ierusalem taudia haida idia gwau: “Do idia alaia gwauraia tauna be inai, ani? To ia be iniseni ia haroro bona hereva ta idia gwau henia lasi ia dekenai. Sedira hanua lohia taudia edia lalona dekenai idia diba vadaeni ia be Keriso?” Ierusalem taudia idia laloa Iesu be Keriso lasi. Edia lalohadai ena badina be inai bamona idia gwauraia, idia gwau: “Inai tau ena mai gabuna be ita diba, to Keriso do ia mai neganai be tau ta do ia diba lasi ia be edena gabu amo ia mai.”

Iesu ia hereva henidia, ia gwau: “Umui diba lau, bona lau mai gabuna danu umui diba, a? Lau be lau sibona egu ura dekenai lau mai lasi. Lau ia siaia Diravana be momokani, to umui be umui diba lasi ia. Lau be lau diba ia, badina be ia dekena amo lau mai, bona ia ese lau ia siaia.” Bena Iesu idia dogoatao toho, reana dibura rumana ai do idia koua totona eiava do idia alaia totona, to idia hegeregere lasi badina ena mase negana be do lasi.

To, taunimanima momo ese Iesu idia abidadama henia. Unai bamona idia karaia be maoro, badina gohu ena ranu kopina latanai ia raka, lai bada bona hurehure badadia ia hadokodia, hoa dalana ai paraoa haida bona gwaurume haida amo hutuma ia ubudia, gorere taudia ia hamauridia, aena mase taudia ia hanamodia, matakepulu taudia edia matadia ia kehodia, lepra taudia ia hanamodia, bona mase taudia ia hatoredia isi. Unai dainai idia henanadai, idia gwau: “Keriso do ia mai neganai, ia ese toa do ia karaia neganai, inai tau do ia hanaia, a?”

Iesu unai bamona idia herevalaia neganai, Farisea taudia idia kamonai, bena idia bona hahelaga taudia ese hesiai taudia idia siaidia Iesu idia dogoatao totona. Ioane 7:​11-32.

▪ Iesu be edena negai aria dekenai ia ginidae, bona taunimanima ese edena bamona idia herevalaia?

▪ Dahaka dainai haida idia gwau ia kavakava?

▪ Ierusalem taudia ese Iesu edena bamona idia laloa?

▪ Dahaka dainai momo ese Iesu idia abidadama henia?