Karoa 60

Keriso be Basileia ai Do Ia Abia Hairaina Idia Itaia

IESU be Kaisarea Filipi tanona ai ia ginidae, bena ena aposetolo bona taunimanima hutuma ia hadibadia noho neganai, inai hoa herevana ia gwauraia, ia gwau: “Umui lau hamaoroa momokani, haida idia gini inai be do idia mase lasi ela bona Taunimanima ena Natuna do idia itaia, mai ena Basileia danu do ia mai.”

Hahediba taudia ese ena hereva ena anina idia daradaralaia. Dina 6 murinai, Iesu ese Petro, Iakobo, bona Ioane be ororo badana dekenai ia hakaudia daekau. Reana unai be hanuaboi, badina hahediba taudia edia matana idia mahuta. Iesu ia guriguri lalonai, idia vairanai ena toana be ia idau. Iena vairana ia diaridiari dina bamona, bona ena dabua ia kurokuro momokani diari bamona.

Bena taunimanima rua be idia vairadiai idia hedinarai, idia laloa idia be “Mose bona Elia.” Idia ruaosi be Iesu ida idia herevahereva, ‘Ierusalem dekenai do ia mase sivaraina’ idia herevalaia. Edia hereva ese ia hamomokania, namo lasi Iesu ese ena mase dikana amo ia siri toho, Petro ia ura bamona.

Hahediba taudia idia noga momokani, bena idia raraidia bona idia kamonai mai edia hoa ida. Ena be unai be matahanai sibona, to ia be gau korikori bamona dainai Petro ese Iesu ia hereva henia, ia gwau: “Lohiabada e, iniseni ita noho be namo herea. Bema oi ura, palai ruma toi do ai karaia, ta oiemu, ta Mose ena, ta Elia ena.”

Petro ia hereva noho lalonai, ori mai diaridiarina ese ia koudia, bona gado ta ori lalona amo ia mai, ia gwau: “Egu Natuna be inai, lauegu lalokau tauna. Lauegu lalona ia moale ia dekenai. Iena hereva do umui kamonai henia.” Unai hereva idia kamonai neganai, hahediba taudia idia goru diho. To Iesu ia gwau: “Umui toreisi, umui gari lasi.” Edia kwarana idia abia isi neganai, ta idia itaia lasi, Iesu sibona ia noho.

Dabai, ororo amo idia diho neganai, Iesu ia haganidia, ia gwau: “Umui itaia [matahanaina] be tau ta dekenai do umui hamaoroa lasi ela bona Taunimanima ena Natuna be mase dekena amo do ia toreisi lou.” Elia be matahanai lalonai ia hedinarai dainai, hahediba taudia idia henanadai, idia gwau: “Badina be dahaka taravatu hadibaia taudia idia gwau Elia be do ia mai guna?”

Iesu ia gwau: “Elia be ia mai vadaeni, to idia be idia diba lasi ia.” Ioane Bapatiso ia herevalaia unai, badina Elia bona Ioane edia gaukara be hegeregere. Elia ese Elisaia ena dala ia lailaia hegeregerena, Ioane ese Keriso ena dala ia lailaia.

Unai matahanai ese Iesu bona hahediba taudia edia lalodia ia hagoadaia! Basileia lalonai do ia abia hairaina ia hedinarai. Pura gunana dekenai Iesu ia gwauhamata hegeregerena, matahanai amo ‘Taunimanima ena Natuna idia itaia, mai ena Basileia danu ia mai.’ Iesu ia mase murinai, Petro ia gwau: ‘Aiemai matana dekena amo iena hairaina ai itaia, Iesu danu ororo helagana dekenai ai noho neganai.’

Farisea taudia ese Iesu idia hamaoroa idia ura toa ta iena amo do idia itaia, unai amo do ia hamomokania ia be Dirava ese ia abia hidi pavapavana, Buka Helaga ese ia gwauhamatalaia tauna unai. Unai toa ia hahedinarai henidia lasi. To ena hahediba taudia korikoridia ese Iesu ena toana ia idau neganai idia itaia; unai ese Basileia ena peroveta herevadia ia hamomokanidia. Unai dainai, Petro be gabeai ia gwau: “Unai dainai ai daradara lasi momokani, to ai diba peroveta taudia edia hereva be momokani.” Mataio 16:​13, Mataio 16:28–17:13; Mareko 9:​1-13; Luka 9:​27-37; 2 Petero 1:​16-19.

▪ Idia do mase lasi neganai, haida ese Keriso edena bamona idia itaia, mai ena Basileia ida ia mai?

▪ Matahanai lalonai, Mose bona Elia be Iesu ida dahaka idia herevalaia?

▪ Dahaka dainai unai matahanai ese hahediba taudia edia lalodia ia hagoadaia?