Karoa 88

Kohu Momo Tauna bona Lasaro

IESU ese kohu bona moni gaukaralaidia dalana maorona iena hahediba taudia ia hamaorodia, ia gwau Dirava bona kohu danu nega tamona edia hesiai gaukara ita karaia diba lasi. Farisea taudia ese unai hereva idia kamonai danu, bena Iesu idia kirikirilaia badina be moni idia laloa bada. Unai dainai Iesu ese ia hamaorodia, ia gwau: “Umui be taunimanima edia vairana dekenai umui sibona dekenai umui hanamoa, to Dirava be emui lalona ia diba. Badina be taunimanima ese idia hanamoa gaudia be Dirava ese ia ura henia lasi.”

Nega ia ginidae vadaeni, tanobada ena kohu momo taudia, politik ena siahu bada taudia, bona tomadiho gunalaia taudia hadihodia totona. To, idia diba lauma gaudia dekenai idia dabu taudia be do idia abidia isi. Iesu ese unai ia herevalaia, Farisea taudia dekenai inai bamona ia hereva neganai:

“Mose ena taravatu bona peroveta taudia edia hereva ese umui idia hakaua ia mai bona Ioane [Bapatiso] ena nega. Unai nega dekena amo Dirava ena Basileia ena Sivarai Namona be idia harorolaia noho, bona taunimanima ibounai be mai edia goada ibounai idia vareai noho. Guba bona tanobada do idia boio be mai ena dala, to Taravatu ena koma ta do ia boio be dala lasi.”

Taravatu hadibaia taudia bona Farisea taudia idia hekokoroku, badina be Mose ena Taravatu idia badinaia dainai. Mani oi laloa lou, Ierusalem dekenai Iesu ese matakepulu tauna ta ena matana ia kehoa neganai, mai edia hekokoroku ida idia gwau: “Ai be Mose ena diba tahua taudia. Ai be ai diba Dirava ese Mose ia hereva henia.” To Mose ena Taravatu ese ena anina ta ia hagugurua vadaeni; lalo-manau taudia ia hakaudia lao, Dirava ese ia abia hidi Pavapavana, Iesu Keriso dekenai. Ioane ese ena hesiai gaukarana ia hamatamaia negana amo, taunimanima idauidau, lalo-manau bona ogogami taudia danu, idia gaukara goada Dirava ena Basileia taudia ai do idia lao totona.

Unai negai Mose ena Taravatu ia guguru noho dainai, Dirava ese ia kokia gwauraia. Taravatu henunai idia noho taudia be badina idauidau dainai edia headava idia hadokoa diba, to hari Iesu ia gwau: “Ena adavana ia negea, vadaeni hahine ta ma ia adavaia tauna be heudahanai tauna, bona ia negea hahinena ia adavaia tauna danu heudahanai tauna.” Unai bamona hereva ese Farisea taudia ia habadudia, badina idia gwau badina idauidau dainai taunimanima ese edia headava idia hadokoa diba.

Unai murinai Iesu ese parabole ta Farisea taudia ia henidia. Tatau rua ia herevalaidia, Dirava ese edia dagi o edia noho ia haidaua vaitani. Inai gau rua mani oi tahua: Unai tatau rua ese edena taudia idia laulaulaidia, bona edia noho ia idau vaitani ena anina be dahaka?

Iesu ia gwau: “Kohu momo tauna ta ia noho, dabua kakakaka bona namo herea danu ia karaia noho, bona dina ibounai ia moale bona aniani namodia sibona ia ania. Ena ruma iduara dekenai noinoi tauna ta, ena ladana be Lasaro, ia hekure noho, ena tauanina ibounai be toto ese ia koua. Ena ura be kohu momo tauna ena aniani momoru do ia ania. Sisia danu idia lao, iena toto idia demaria noho.”

Inai parabole lalonai, kohu momo tauna ese Iuda tomadiho gunalaia taudia, Farisea taudia, taravatu hadibaia taudia, Sadukea taudia, bona hahelaga taudia badadia, ia laulaulaidia. Lauma dalanai hahenamo momo idia abia bona dala momo idia kehoa idia edia, bona edia kara be kohu momo tauna ena kara bamona. Edia dabua kakakakadia ese edia dagi namona idia laulaulaia, bona edia dabua namo hereadia ese idia laulaulaia gauna be, sibodia idia gwauraia kara maoromaoro taudia.

Unai kohu momo tauna bamona taudia ese ladana maragi taudia mai edia ogogami idia lalo-dika henidia, idia gwauraidia ‛am ha·’aʹrets, anina be tano taudia. Noinoi tauna Lasaro ese unai taudia ia laulaulaidia. Tomadiho gunalaia taudia ese lauma aniani bona hahenamo idia henidia lasi; idia laloa idia be lauma dalanai idia gorere, bona sisia sibodia idia bamodia be namo, Lasaro mai ena toto momo hegeregerena. To, Lasaro bamona taudia ese lauma aniani hitolona idia hitolo dainai ruma iduarana ai idia noho, idia ura kohu momo tauna ena pata amo ia moru lauma aniani momoruna do idia ania.

Unai murinai Iesu ia gwau Dirava ese unai tatau ruaosi edia noho ia haidaua. Edena bamona ia haidaua, bona unai ese dahaka ia laulaulaia?

Ruaosi edia Noho Ia Haidaudia

Kohu momo tauna ese tomadiho gunalaia taudia ia laulaulaidia, lauma dalanai idia be mai edia hahenamo momo bona dala momo idia kehoa idia edia. Lasaro ese ladana maragi taudia ia laulaulaidia, lauma aniani hitolona idia hitolo. Ena sivarai orena ai, Iesu ese ruaosi edia noho idia idau dalana ia herevalaia.

Ia gwau: “Noinoi tauna ia mase, vadaeni aneru ese ia abia, Aberahamo ena kemena dekenai ia abia lao. Kohu momo tauna danu ia mase, vadaeni idia guria. Mase gabuna dekenai ia hisihisi noho neganai, ena matana ia negea daekau, daudau dekenai Aberahamo ia itaia, Lasaro danu be ena kemena dekenai.”

Kohu momo tauna bona Lasaro be taunimanima korikoridia lasi, to taunimanima edia orea rua idia laulaulaidia, unai dainai edia mase danu ese gau ta ia laulaulaia. Unai be dahaka?

Iesu ia gwau vadaeni gau haida idia idau vadaeni. Ia gwau Mose ena taravatu bona peroveta taudia edia hereva idia noho ela bona Ioane Bapatiso ena nega, to unai murinai Dirava ena Basileia ena sivarai idia harorolaia. Unai hegeregerena, Ioane bona Iesu Keriso edia haroro dainai, kohu momo tauna bona Lasaro ese edia noho gunadia idia masetanidia.

Unai Lasaro bamona taudia mai edia manau, helalo-kerehai taudia, be edia noho gunana idia masetania dalana be inai: Guna lauma dalanai idia hitolo bona tomadiho gunalaia taudia edia lauma aniani momoruna idia tahua, to gabeai Dirava ena hahenamo idia abia. Iesu ese Dirava ena hereva momokani ia hadibadia bena idia dabu lasi. Unai amo Abraham Badana, Iehova Dirava, ese ena kemena dekenai ia abidia dae bona ia hanamodia.

To, kohu momo tauna bamona taudia ese Dirava ena badu idia davaria, badina Iesu ese ia harorolaia Basileia sivaraina be nega ibounai idia dadaraia. Unai dainai edia noho gunana mai ena hahenamo idia masetania. Unai negai hisihisi bada idia ania. Kohu momo tauna ena hereva mani oi kamonai, ia gwau:

“Aberahamo e, egu tamana e, oi bogahisihisi lau dekenai. Mani Lasaro oi siaia, ena imana kwakikwakina ranu dekenai ia atoa diho, egu malana sibona ia mai hapariparia. Badina lau be inai lahi ena siahu dekenai hisihisi lau abia noho.” Dirava ena hahemaoro herevadia siahudia, Iesu ena hahediba taudia ese idia harorolaia herevadia, ese kohu momo tauna bamona taudia edia lalodia idia hahisidia bada. Idia ura hahediba taudia ese unai hereva do idia harorolaia lou lasi, bena hisihisi amo do idia laga-ani sisina.

To “Aberahamo ia gwau, ‘Egu natuna e, oi laloa, oiemu mauri nega lalonai gau namodia oi abia, bona Lasaro be gau dikadia ia abia. Harihari ia be moale ia abia, to oi be unai hisihisi oi abia. Bona inai danu, iseda huana dekenai be guri badana ta ia noho, vadaeni inai gabu dekena amo ta unuseni do ia hanaia diba lasi, bona unai gabu dekena amo ta iniseni do ia mai diba lasi.’ ”

Dirava ese Lasaro bamona taudia bona kohu momo tauna bamona taudia edia noho unai bamona ia haidaua be maoro momokani! Hua haida murinai, Pentekoste 33 C.E. ai, unai ia karaia, Taravatu gunana gwauhamatana ia kokia bena gwauhamata matamatana be ena gabu ai ia atoa neganai. Unai neganai ia hedinarai goevagoeva, Dirava ese Iesu ena hahediba taudia ia lalo-namo henidia, Farisea taudia bona tomadiho gunalaia taudia ma haida ia lalo-namo henidia lasi. Unai “guri badana,” kohu momo tauna bamona taudia bona Iesu ena hahediba taudia padadiai ia noho gurina, ese Dirava ena hahemaoro maoromaorona, ia haidaua diba lasi gauna, ia laulaulaia.

Kohu momo tauna ese “Aberahamo” ia noia, ia gwau: “Egu tamana e, . . . Lasaro do oi siaia egu tamana ena ruma dekenai do ia lao, badina egu tadikakana be 5.” Unai amo kohu momo tauna ia hahedinaraia ia be mai ena tamana idauna ta danu, Satana Diabolo unai. Ia ura Lasaro ese Dirava ena hahemaoro herevadia ia hamanokadia, ena ‘tadikaka 5,’ ena tomadiho turadia unai, be “inai hisihisi gabuna” dekenai do idia mai garina.

“To Aberahamo ia gwau, ‘Mose bona peroveta taudia edia hereva be idia dekenai, idia sibona dekenai do idia kamonai henia.’ ” Oibe, bema ena ‘tadikaka 5’ idia ura unai hisihisi do idia abia lasi, namona be Mose bona Peroveta Taudia edia hereva, idia hahedinaraia Iesu be Mesia herevadia, idia kamonai henidia bona ena hahediba taudia ai idia lao. To kohu momo tauna ia gwau: “Lasi, Aberahamo, egu tamana e, bema tau ta mase dekena amo ia lao idia dekenai be do idia laloa namonamo.”

To Abraham ia gwau: “Idia be Mose bona peroveta taudia dekenai bema idia kamonai henia lasi, mase dekena amo ta bema ia toreisi danu do idia kamonai henia lasi.” Dirava ese toa eiava siahu karadia idaudia do ia henidia lasi edia lalona veria totona. Iena hahenamo idia abia totona, namona be Buka Helaga idia duahia bona idia badinaia. Luka 16:​14-31; Ioane 9:​28, 29; Mataio 19:​3-9; Galatia 3:24; Kolose 2:14; Ioane 8:44.

▪ Dahaka dainai kohu momo tauna bona Lasaro edia mase ese gau ta idia laulaulaia sibona, bona dahaka idia laulaulaia?

▪ Iesu ia gwau, Ioane ese ena hesiai gaukara ia hamatamaia neganai, dahaka gau idia idau?

▪ Iesu ia mase murinai Dirava ese dahaka ia kokia, bona unai ena anina be dahaka headava hadokoa karana dekenai?

▪ Iesu ena parabole lalonai, kohu momo tauna bona Lasaro ese edena taudia idia laulaulaidia?

▪ Kohu momo tauna ese ia ania hisihisina be dahaka, bona ia noinoi edena dala amo do idia hadokoa?

▪ “Guri badana” ese dahaka ia laulaulaia?

▪ Kohu momo tauna ena tamana korikorina be daika, bona ena tadikaka 5 be daidia?