Karoa 77

Kohu bona Moni Herevadia

TAUNIMANIMA idia diba Iesu be Farisea tauna ta ena ruma dekenai ia aniani. Unai dainai idia momo herea be ruma murimurinai Iesu idia naria noho. Ruma amo ia raka lasi neganai, mai edia ura bada ida Iesu idia hakala henia, to Farisea taudia ese Iesu idia badu henia bona iena hereva kererena ta idia tahua.

Iesu be ena hahediba taudia ia hereva henidia guna, ia gwau: “Umui naria namonamo Farisea taudia edia koikoi kara dekenai.” Ruma ai ia aniani neganai, Farisea taudia edia tomadiho karadia koikoidia idia hedinarai goevagoeva. Ena be edia helaga karadia amo edia kara dika idia hunia toho, to gabeai idia hedinarai. Iesu ia gwau: “Koua gaudia ibounai do idia hedinarai, bona hunia gaudia ibounai be do idia diba.”

Unai murinai, ia ese edia lalona ia hagoadaia, guna ena aposetolo 12 edia lalona ia hagoadaia hegeregerena. Ia gwau: “Tauanina do idia alaia diba, to mase murinai gau ta do idia karaia diba lasi taudia dekenai do umui gari lasi.” Iesu ese ena hahediba taudia ia hamaorodia, Dirava ese manu maragina ta ia laloaboio lasi hegeregerena, ia ese idia danu do ia laloaboio lasi. Ma ia gwau: “Dubu edia biaguna bona hanua edia lohia bona siahu taudia edia vairana dekenai umui do idia hakaua neganai . . . do umui gwauraia herevadia be Lauma Helaga ese do ia hadibaia umui dekenai.”

Taunimanima edia huanai tau ta ese Iesu ia noia, ia gwau: “Hadibaia tauna e, mani emu kara lauegu kakana dekenai do oi hereva henia, do oi hamaoroa, aiemai tamana ena kohu haria dekena amo lauegu kahana do ia henia.” Mose ena Taravatu hegeregerena, natuna ginigunana ese ahuna rua ia abia, unai dainai idia hepapahuahulaia be badina lasi. To hari tau ia laloa ena ahuna korikorina sibona ia abia be hegeregere lasi.

Iesu ia ura lasi unai hepapahuahu lalonai ia vareai. Ia gwau: “Tau e, daika ia gwau lau be kota karaia tauna o umui emui kohu haria tauna?” Bena hebou taudia ia sisiba henidia, ia gwau: “Do umui naria namonamo, kohu dekenai do umui ura henia dikadika garina. Badina taunimanima edia mauri badina be kohu momo dekenai lasi, lasi momokani.” Oibe, ena be tau ta be mai ena kohu momo to do ia masetania. Unai hereva habadaia totona, bona ladana namona Dirava dekenai ia karaia lasi tauna ena kerere hahedinaraia totona, Iesu ese parabole ta ia henidia, ia gwau:

“Kohu momo tauna ena uma aniani be momo herea. Vadaeni inai bamona ia laloa, ia gwau, ‘Lau be edena bamona do lau karaia? Badina be egu uma aniani ibounai be haboua gabuna lasi.’ Ma ia gwau, ‘Inai bamona do lau karaia, egu aniani haboua ruma do lau kokia, badadia haida do lau haginia, vadaeni egu uma aniani bona egu kohu ibounai unuseni do lau haboua. Vadaeni egu laumana dekenai do lau hamaoroa, do lau gwau, “Egu laumana e, oiemu kohu be momo herea, lagani momo ena hegeregerena. Do oi laga-ani, do oi aniani, do oi inuinu, do oi moale.” ’ To Dirava ese ia hereva henia ia dekenai, ia gwau: ‘Kavakava tauna! Hari hanuaboi emu laumana oi dekena amo do lau kokia, vadaeni inai oi haboua kohudia be daika ese do ia abia?’ ”

Dokonai Iesu ia gwau: “Ena kohu sibona dekenai ia haboua to Dirava dekenai ia be gau momo ia henia lasi tauna be unai bamona.” Ena be hahediba taudia ese kohu momo idia haboua toho lasi, to mauri ena hekwarahi ese idia veria diba, Iehova ena hesiai gaukara do idia manokalaia totona. Unai dainai, guna ororo dekenai ia gwauraia sisibana be hari ia gwauraia lou. Ena hahediba taudia ia hamaorodia, ia gwau:

“Unai dainai lau hamaoroa umui dekenai, emui lalona idia hekwarahi lasi emui mauri totona, dahaka do umui ania. O emui tauanina totona, dahaka dabua do umui karaia. . . . Manu, ena ladana galo mani umui laloa, aniani gaudia idia hadoa lasi, idia geia lasi, idia be gau ta lasi, haboua gabuna lasi. To Dirava ese idia ia ubua noho. . . . Herahera mani do umui laloa, edena bamona idia vara. Idia gaukara lasi, dabua idia turia lasi. To umui lau hamaoroa, Solomona mai ena dabua namodia ibounai, to ena hairaina be idia ta hegeregere lasi. . . .

“Unai dainai, aniani gaudia bona inuinu gaudia umui tahua lasi, bona emui lalona do idia daradara lasi. Badina unai gaudia be tanobada bese ibounai ese idia tahua. Bona emui Tamana be ia diba umui ura gaudia be unai. To Dirava ena Basileia do umui tahua, vadaeni unai gaudia ibounai be do ia henia umui dekenai.”

Iesu ena hereva be mai anina bada ogogami negana lalonai. Tauanina gaudia ia lalo-hekwarahilaia bona lauma gaudia ia tahua momo lasi tauna ese ia hahedinaraia ena abidadama ia maragi; ia laloa Dirava ese Iena hesiai taudia ia naridia diba lasi. Luka 12:​1-31; Deuteronomi 21:17.

▪ Dahaka dainai unai tau ese ena ahuna ia nanadailaia reana, bona Iesu ena sisiba be dahaka?

▪ Iesu ese edena parabole ia gwauraia, bona ena anina be dahaka?

▪ Iesu ese edena sisiba ia gwauraia lou, bona dahaka dainai unai sisiba be mai anina?