Karoa 44

Lai Gubana Ia Hadokoa

UNAI dina dekenai Iesu ese gaukara momo ia karaia. Kone dekenai hutuma ia hadibadia, bena ena parabole edia anina be ena hahediba taudia mo sibodia dekenai ia gwauraia hedinarai. Adorahi ai, ena hahediba taudia ia hamaorodia, ia gwau: “Davara unai kahanai ita hanaia lao.”

Galilea Gohuna ena mairiveina kahanai be provinsi ta ladana Hanua Gwauta. Unai hanuadia ai, Greek taudia edia kara idia badinaia taudia momo idia noho, bona Iuda taudia momo danu. Murinai karoa ese do ia hahedinaraia, unuseniai Iesu ese kara momo ia karaia lasi, badina be unuseniai haida ese idia koua dainai ia noho daudau diba lasi.

Vadaeni, Iesu ese ena hahediba taudia ia hamaorodia gohu unai kahanai do idia hanai lao, bena idia ida vanagi ai idia lao. Kone idia heautania neganai, haida ese idia itadia, bena sibodia edia vanagi ai idia gui, idia bamodia. Idia heau henia gabuna be daudau lasi. Galilea Gohuna be bada lasi, ena lata be kilomita 21 bamona bona ena lababa be kilomita 12 bamona.

Gaukara bada dainai Iesu ia hesiku. Unai dainai, kone idia heautania neganai, vanagi ai ia hekure bena ia mahuta mase. Ena aposetolo haida, Galilea Gohuna ai haoda gaukarana idia manadalaia taudia, ese vanagi idia haheaua.

Galilea Gohuna kahirakahira dekenai be ororo. Nega haida lai bada be ororo amo ia toa badabada dainai lai gubadia be gohu dekenai idia vara. Iesu bona ena hahediba taudia idia heau neganai, unai bamona ia vara dainai ena hahediba taudia idia hekwarahi bada. Gohu hurehuredia ese vanagi idia botaia dikadika, bona vanagi lalonai idia roho vareai dainai, ia mutu gwauraia. To Iesu ia mahuta noho!

Unai taria karana idia manadalaia taudia idia hekwarahi bada vanagi taria totona. Guna, lai gubadia negadiai vanagi idia taria, to inai negai idia be hegeregere lasi. Do idia mase garina idia gari, unai dainai Iesu idia haoa. Idia gwau: ‘Biaguna e, oi laloa lasi, a? Ita maloa inai! Mani ita oi hamauria, do ita mase garina! ’

Bena Iesu ia toreisi, lai bona hurehure ia haganidia, ia gwau: “Umui doko, umui maino noho.” Vadaeni, lai ia doko bona davara ia namo lou. Bena ena hahediba taudia ia nanadaidia, ia gwau: ‘Dahaka dainai umui gari bada? Emui abidadama be lasi, a?’

Unai neganai idia gari dikadika. Idia hereva heheni, idia gwau: “Inai tau be daika? Ia ese lai bona hurehure dekenai ia hereva henia, vadaeni ena hereva idia kamonai.”

Iesu ese siahu bada herea ia hahedinaraia unai! Ita moale diba, badina ita diba iseda Pavapava ena siahu ia hegeregere, lai bona davara ia biagudia. Basileia lalonai do ia lohia neganai, taunimanima ese lai bona davara garina do idia gari lasi, badina unai gau ese do idia hadikadia lasi.

Lai gubana ia doko murinai, Iesu bona ena hahediba taudia be gohu ena mairiveina kahanai idia ginidae. Lai gubana ia vara matama neganai, idia bamodia taudia be reana kone dekenai idia giroa lou dainai dika idia davaria lasi. Mareko 4:35–5:1; Mataio 8:​18, 23-27; Luka 8:​22-26.

▪ Hanua Gwauta be dahaka, bona ia be edeseniai?

▪ Dahaka dainai Galilea Gohuna dekenai lai gubadia idia vara?

▪ Hahediba taudia ese vanagi idia taria diba lasi neganai, dahaka idia karaia?