Karoa 113

Lalo-Manau Karana Paseka Ginigabena Ai

IESU ese ia hadibadia hegeregerena, Petro bona Ioane be Ierusalem dekenai idia ginidae vadaeni, Paseka Ariana hegaegaelaia totona. Gabeai, dina be kahirakahira ia diho neganai Iesu bona aposetolo oredia 10 be Olive Ororona amo idia diho, Kidron Kourana idia rakaia hanai bona Ierusalem lalonai idia raka vareai. Unai murinai Iesu ese Ierusalem hanuana dina ai ia itaia lou lasi ela bona ia toreisi lou murinai.

Bena Iesu bona ena bamodia be Paseka Ariana do idia karaia rumana dekenai idia lao. Vadavada amo idia daekau, atai daiutuna ta ai idia vareai. Unuseniai gau iboudiai idia hegaegae vadaeni idia sibodia ese Paseka Ariana do idia karaia totona. Iesu ese unai nega ia naria vadaeni mai ena moale ida; ia gwau: “Lau ura bada hari inai Paseka do ita ania hebou guna, gabeai hisihisi do lau davaria.”

Paseka Ariana idia karaia taudia edia kara be uaina kapusi 4 idia inua. Iesu ese kapusi ihatoina ia abia murinai, ia guriguri bena ia gwau: “Inai be umui abia, ibounai do umui inua. Badina be lau hamaoroa umui dekenai, lau be uaina do lau inua lou lasi ela bona Dirava ena Basileia do ia ginidae.”

Idia aniani noho lalonai, Iesu ia toreisi, ena dabua ta ia kokia, tauele ta ia abia, bena disi ta ai ranu ia bubua. Unai negai Iuda taudia edia kara be, ruma biaguna ese ena hesiai tauna ta ia hagania ia boiridia taudia edia aedia do ia huria. To unai negai ruma biaguna ia noho lasi dainai, Iesu ese edia aedia ia huria. Aposetolo ese unai idia karaia diba, to idia do mama heheni dainai, idia ta ese ia karaia lasi. Iesu ese edia aedia ia huria matamaia neganai idia hemarai.

Iesu ese Petro ena aena ia huria gwauraia neganai, Petro ese ia koua toho, ia gwau: “Egu aena be do oi huria lasi, lasi momokani.”

To Iesu ia gwau: “Bema oi lau huria lasi, oi be lau danu oi noho diba lasi.”

Bena Petro ia gwau: “Lohiabada e, lauegu aena sibona lasi, lauegu imana bona lauegu kwarana danu.”

To Iesu ia gwau: “Ia digu vadaeni tauna be, bema ena aena sibona do lau huria, be ena tauanina ibounai ia goeva. Umui danu umui goeva, to umui ibounai lasi.” Unai bamona ia hereva badina ia diba Iuda Iskariote ese dala ia karaia noho ia hadikaia totona.

Iesu ese aposetolo 12, do ia samania tauna, Iuda, danu edia aedia ia huria vadaeni, bena ena dabua ia karaia lou, ia helai lou. Bena ia nanadaidia, ia gwau: “Umui dekenai lau karaia gauna ena anina be umui diba, a? Umui gwauraia lau be hadibaia tauna bona Lohiabada. Unai be umui hereva maoro, badina tauna be lau inai. Unai dainai, lau inai umui emui Lohiabada bona hadibaia tauna, to emui aena lau huria, umui danu ta ta emui aena do umui huria be namo. Badina be dala lau hedinaraia vadaeni umui dekenai, vadaeni umui ese danu lau karaia bamona do umui karaia. Momokani, momokani umui lau hamaoroa, gaukara merona ese ena biaguna ia hanaia lasi, bona hesiai tauna ese ia siaia tauna ia hanaia lasi. Inai bema umui diba bona bema umui karaia, be do umui namo.”

Lalo-manau ena anina ia hadibadia goevagoeva unai! Ena aposetolo ese dagi bada idia tahua bona idia laloa idia be mai ladana bada dainai ma haida ese idia hesiai henidia be namo, to unai be lalohadai kererena. Namona be Iesu ena kara idia tohotohoa. Aena huria karana be tomadiho taravatuna hegeregerena idia karaia karana ta lasi. To ia hahedinaraia namona be edia lalona be hegeregere gaukara iboudiai do idia karaia, herevana gaukara ta be hesiai gaukarana o idia moalelaia diba lasi gaukarana. Mataio 26:​20, 21; Mareko 14:​17, 18; Luka 22:​14-18; 7:44; Ioane 13:​1-17.

▪ Paseka Ariana idia karaia neganai, Iesu ia guriguri murinai edena kapusi ia henia ena aposetolo 12 dekenai?

▪ Iesu be tanobada ai ia noho neganai, vaia edia kara taunimanima ese edia vadivadi taudia edena bamona idia kara henidia, bona dahaka dainai Iesu bona ena aposetolo ese Paseka Ariana idia karaia neganai, ta be unai bamona ia kara henidia lasi?

▪ Dahaka dainai Iesu ese ena aposetolo edia aedia ia huria?