Karoa 92

Lepra Taudia 10 Ia Hamauridia

SANHEDRIN taudia ese Iesu hamasea dalana idia davaria lasi, badina be Ierusalem ia rakatania ia lao kilomita 24 bamona Efraim dekenai, Ierusalem ena mirigini kahanai. Unuseniai ia noho mai ena hahediba taudia ida.

Vadaeni, lagani 33 C.E. ena Paseka Ariana be kahirakahira dainai, Iesu be unuseniai ia noho daudau lasi. Samaria tanona ia rakaia hanai, ia lao Galilea tanona. Unai be ena laolao ginigabena unai gabu dekenai, ia do mase lasi neganai. Galilea dekenai, ia bona ena hahediba taudia ese Paseka Ariana totona Ierusalem dekenai idia raka lao taudia haida idia bamodia. Perea tanona ia hanaia dalana dekenai idia raka, Ioridane Sinavaina ena mairiveina kahanai.

Idia raka daudau lasi, bena Iesu be hanua maragina ta dekenai ia ginidae neganai, lepra taudia 10 be ia ida idia hedavari. Unai hanua be reana Samaria dekenai o Galilea dekenai. Lepra be gorere dikana​—lepra taudia edia ima kwakikwakidia, o edia ae kwakikwakidia, o edia taiadia, o edia udu baubaudia, o edia udu bibinadia ia haorea. Unai gorere be lepra tauna amo ma ta dekenai do ia hanai garina, Dirava ena Taravatu be inai: “Lepra tauna be . . . ena atai bibinana be dabua amo do ia koua, do ia boiboi, do ia gwau, ‘Miro, miro!’ Ena gorere dinadia iboudiai do ia miro. . . . Ia sibona do ia noho.”

Hari lepra taudia 10 ese unai Taravatu idia badinaia dainai, daudau dekenai idia gini. To idia boiboi badabada, idia gwau: “Iesu, aiemai biaguna e, oi bogahisihisi ai dekenai.”

Iesu ese ia raraidia, bena ia hereva henidia, ia gwau: “Dubu naria taudia dekenai umui lao, do idia itaia umui.” Iesu be unai bamona ia hereva, badina Dirava ena Taravatu hegeregerena, hahelaga taudia be mai edia siahu, lepra gorerena amo idia namo lou taudia do idia gwauraidia namo. Unai dala amo gwaumaoro idia henidia, gorere lasi taudia ida do idia noho hebou lou totona.

Lepra taudia 10 idia diba Iesu be mai ena siahu idauna. Unai dainai, ena be idia do namo lou lasi, to hahelaga taudia dekediai idia lao haraga. Iesu idia abidadama henia dainai, dala amo idia lao neganai davana namona idia abia. Idia itaia edia kopidia idia goeva, idia namo lou!

Idia 9 idia raka lao noho, to idia ta, Samaria tauna, ia giroa, Iesu ia tahua. Dahaka dainai? Badina be Iesu ese ia durua karana ia moalelaia bada dainai ia ura ia tanikiu henia. Mai gado badana ida Dirava ia hanamoa, bona Iesu ia davaria neganai, ena aena badinai ia goru diho, ia tanikiu henia.

Bena Iesu ia gwau: “Ibounai 10 idia namo, ani? Taudia 9 be edeseni? Haida be idia giroa lou lasi, Dirava dekenai hanamoa totona, inai idau bese tauna sibona, a? ”

Bena Samaria tauna ia hamaoroa, ia gwau: “Oi toreisi, vadaeni oi lao, oiemu abidadama ese oi ia hanamoa vadaeni.”

Inai sivarai ita duahia neganai, namona be sibona eda kara ita laloa. Iesu ia henanadai, ia gwau: “Taudia 9 be edeseni?” Idia kerere, badina Iesu idia tanikiu henia lasi. Samaria tauna bamona, do ita hahedinaraia Dirava ena amo ita abia gaudia dainai ita tanikiu henia, a? Unai gaudia ta be ena gwauhamata, mauri hanaihanai gwauhamatana unai. Ioane 11:​54, 55; Luka 17:​11-19; Levitiko 13:​16, 17, 45, 46; Apokalupo 21:​3, 4.

▪ Iesu ese ia idia hamasea toho taudia edia palani edena bamona ia koua?

▪ Bena Iesu be edeseniai ia laolao, bona edena gabu ia lao henia gwauraia?

▪ Dahaka dainai lepra taudia be daudau dekenai idia gini, bona dahaka dainai Iesu ia hamaorodia hahelaga taudia dekediai do idia lao?

▪ Unai sivarai ese ita dahaka ia hadibaia?