Karoa 25

Lepra Tauna Ia Bogaia Hisi

IESU mai ena hahediba taudia 4 be Galilea ena hanua idauidau dekenai idia loaloa neganai, ena hoa karadia idia sivaralaia unai provinsi ibounai lalonai. Hanua badana ta dekenai lepra tauna ta ese unai sivarai ia kamonai. Doketa tauna Luka ia gwau, “Ena kopina ibounai be lepera sibona.” Madi, ena tauanina ena toana be ia dika momokani.

Iesu be ia ginidae neganai, lepra tauna be ia dekenai ia lao. Unai neganai Dirava ena taravatu be, lepra tauna ia boiboi, ia gwau, “Miro, miro!” bena taunimanima be ia kahirakahira dekenai idia lao lasi, ena gorere be idia dekenai do ia hanai garina. Vadaeni, lepra tauna ia tui diho, Iesu ia noia, ia gwau: “Lohiabada e, bema oi ura, lau do oi hagoevaia diba.”

Unai tau ese Iesu ia abidadama henia momokani. To madi, ena gorere dainai ena toana ia dika momokani! Iesu ese ia bogaia hisi, ena imana be ia latanai ia atoa, ia gwau: “Lau ura, harihari oi goeva.” Vadaeni, nega tamona lepra tauna ia goeva.

Oi ura unai bamona hebogahisi tauna be oiemu pavapava ai do ia lao, a? Iesu ena kara unai lepra tauna dekenai ese ia hahedinaraia, Basileia ena lohia negana lalonai inai peroveta herevana do ia momokani: “Ia ese manokamanoka taudia bona ogogami taudia do ia hebogahisi henidia.” Oibe, unai neganai Iesu ese ena ura bada gauna ta do ia hagugurua, ia ese hisi ania taudia iboudiai do ia durudia.

Isaia ena peroveta herevana hamomokania totona, Iesu ese unai tau ia oda henia, ia gwau: “Tau ta oi hamaoroa lasi.” Ma ia hamaoroa, ia gwau: “Oi lao, dubu naria tauna ese oi do ia itaia, bona hagoevaia gaudia, Mose ese ia gwauraia hegeregerena, do oi henia, taunimanima dekenai hadibaia totona.”

To hari tau ia moale bada dainai ia lao, ena sivarai ia gwauraia loaloa. Taunimanima momo ese unai sivarai idia kamonai neganai idia ura Iesu idia itaia, unai dainai Iesu be hanua ta ai ia raka vareai diba lasi. Taunimanima lasi gabudia dekenai ia noho, bona gabu idauidau amo taunimanima idia mai ia dekenai, ena hereva kamonai totona bona edia gorere do ia hanamoa totona. Luka 5:​12-16; Mareko 1:​40-45; Mataio 8:​2-4; Levitiko 13:45; 14:​10-13; Salamo 72:13; Isaia 42:​1, 2.

▪ Lepra gorerena ese taunimanima edena bamona ia hadikaia, bona Taravatu hegeregerena, lepra taudia be dahaka idia boiboilaia?

▪ Lepra tauna ta ese Iesu edena bamona ia noia, bona Iesu ena haere bona ena kara dainai dahaka ita diba?

▪ Ia namo lou tauna ese Iesu ena oda edena bamona ia badinaia lasi, bona unai dainai dahaka ia vara?