Karoa 87

Mai Aonega ida Nega Vaira Totona Ita Hegaegae

IESU ese boio merona sivaraina ia gwauraia hutuma dekediai​—ena hahediba taudia, takisi gogoa taudia mai koikoidia, ma kara dika taudia haida, taravatu hadibaia taudia, bona Farisea taudia unai. Bena parabole ma ta ena hahediba taudia ia henidia. Ia gwau, kohu momo tauna ta ese haida edia samani herevana ena kohu naria tauna dekenai ia kamonai.

Iesu ia gwau, kohu momo tauna ese ena kohu naria tauna ia boiria bena ia hamaoroa do ia hadokoa. Kohu naria tauna be ena lalona dekenai ia gwau: “Lau be edena bamona do lau karaia? Egu biaguna ese egu dagi do ia kokia. Tano makohia gaukara dekenai be lau goada lasi, noinoi dekenai be lau hemarai. To dala ta lau diba, vadaeni egu dagi do ia kokia neganai, lau be do mai egu turana, idia ese edia ruma dekenai lau do idia abia dae.”

Kohu naria tauna be inai bamona ia karaia: Ena biaguna dekenai idia abitorehai taudia ia boiridia, bena tau ginigunana ia nanadaia, ia gwau: “Emu abitorehai be hida?”

Ia gwau: “Dehoro kavabu 100.”

Kohu naria tauna ese ia hamaoroa, ia gwau: “Emu abitorehai pepana be inai oi abia, oi helai diho, 50 oi torea.”

Ma ta ia nanadaia, ia gwau: “Oiemu abitorehai be hida?”

Ia gwau: “Uiti puse 100.”

Bena ia hamaoroa, ia gwau: “Emu abitorehai pepana be inai oi abia, 80 oi torea.”

Kohu naria tauna ese ena biaguna ena moni ia do naria noho dainai, ia be mai ena maoro unai taudia edia abitorehai davana ia hamaragia. Unai ia karaia dainai ena turadia ai ia halaodia, gabeai ena biaguna ese do ia hadokoa neganai, idia ese ia do idia durua totona.

Ena biaguna ese ena kara ena sivarai ia kamonai neganai ia badu lasi, to “ia hanamoa, badina be iena kara ia karaia be mai ena aonega.” Oibe, Iesu ia gwau: “Kara koikoi dekenai tanobada taudia edia aonega be ia bada, to diari taudia edia aonega be ia maragi.”

Unai parabole amo Iesu ese ena hahediba taudia ia hadibadia, ia gwau: “Kohu dikadia dekena amo taunimanima edia lalona do umui [ania], idia danu do umui turana karaia, vadaeni emui kohu do idia ore neganai be do idia ore lasi rumadia dekenai oi do idia abia dae.”

Iesu ese kohu naria tauna ia hanamoa, ia be nega vaira ia laloa dainai mai ena aonega ida ia karaia dainai; iena kara dika dainai ia hanamoa lasi. “Tanobada taudia” momo ese aonega dalana ai edia moni o dagi amo haida be edia turadia ai idia halaodia, gabeai edia heduru do idia abia totona. Unai hegeregerena, namona be Dirava ena hesiai taudia, “diari taudia,” ese edia kohu bona moni, edia “kohu dikadia,” be mai edia aonega ida idia gaukaralaidia sibodia durudia totona.

To Iesu ia gwau, unai kohu amo ‘idia ore lasi rumadia dekenai do idia abidia dae’ taudia idia tura henidia be namo. Unai ruma, orea maragi taudia edia, be guba ai; “mamoe idaudia” edia be tanobada Paradaisona ai. Iehova Dirava bona ena Natuna sibodia ese unai gabu dekediai taunimanima idia abidia dae diba. Unai dainai, namona be iseda “kohu dikadia” amo Basileia ena gaukara ita durua, idia ruaosi ida ita hetura heheni totona. Bena ita diba, kohu bona moni do idia ore o do idia hegeregere lasi murinai, mauri hanaihanai do ita abia diba.

Bena Iesu ia gwau, unai kohu, o gau maragidia, ia naria namonamo tauna ese gau badadia danu do ia naria namonamo. Ma ia gwau: “Bema kohu dikadia umui naria namonamo lasi, daika ese kohu momokani [lauma gaudia o Basileia gaudia unai] be umui do ia henia? Bona bema ta ena kohu [Basileia gaudia, Dirava ese ena hesiai taudia ia henidia gaudia unai] umui naria namonamo lasi, daika ese umui sibona emui kohu [mauri unai, do idia ore lasi rumadia ai] umui do ia henia?” (NW)

Ita be Dirava ena hesiai taudia ai bona kohu dikadia edia hesiai taudia ai be nega tamona ita lao diba lasi. Ena hereva dokonai, Iesu ia gwau: “Hesiai tauna ta ese ena biaguna rua edia hesiai gaukara ia karaia diba lasi. Badina be ta dekenai do ia badu henia, ta dekenai be do ia lalokau henia, o ta dekenai do ia ura henia, ta dekenai be do ia ura henia lasi. Dirava bona kohu danu nega tamona edia hesiai gaukara do umui karaia diba lasi.” Luka 15:​1, 2; 16:​1-13; Ioane 10:16.

▪ Iesu ena parabole lalonai, edena dala amo kohu naria tauna be gabeai do idia durua diba taudia be ena turadia ai ia halaodia?

▪ “Kohu dikadia” be dahaka, bona edena bamona idia amo haida edia turadia ai ita lao diba?

▪ Daidia ese “idia ore lasi rumadia dekenai” ita idia abia dae diba, bona unai ruma be dahaka?