Karoa 61

Mai Lauma Dika Merona Ia Hanamoa

IESU, Petro, Iakobo, bona Ioane be Heremon Ororona dekenai idia noho neganai, hahediba taudia oredia ese hekwakwanai ta idia davaria. Iesu be idia dekenai ia giroa lao neganai, ia diba kerere ta ia vara. Hutuma bogaragidiai idia gini, taravatu hadibaia taudia be idia ida idia hepapahuahu. Iesu ia ginidae neganai, hutuma idia hoa, bona idia heau henia idia hanamoa totona. Iesu ese ia nanadaidia, ia gwau: “Umui dahaka dekenai herevahereva noho idia danu? ”

Hutuma bogaragidia amo tau ta ia raka lasi, Iesu vairanai ia tui diho bena ia gwau: “Hadibaia tauna e, oi dekenai lauegu natuna lau mailaia, ia be hereva diba lasi lauma ese ia abia. Ia dogoatao gabuna dekenai ia negea diho, uduna ranu kurokuro ia diho mai, isena sibona ia koria dikadika, bona ena kopina ia maragi vadaeni. Oiemu diba tahua taudia lau noia lauma dika idia lulua, to idia hegeregere lasi.”

Hahediba taudia ese unai mero idia hanamoa diba lasi dainai, taravatu hadibaia taudia ese idia gwauraidia dika. Iesu ia ginidae neganai, ia gwau: “O, abidadama lasi taudia, dina hida umui dekenai dohore lau noho? Dina hida lau gaukara umui danu?”

Iesu ese taunimanima iboudiai ia hereva henidia unai, to ena hereva be mai anina bada taravatu hadibaia taudia dekediai, badina be idia ese hahediba taudia idia hahekwarahidia dainai. Unai murinai Iesu ese mero ia gwauraia, ia gwau: “Mailaia lau dekenai.” To mero be Iesu dekenai ia lao neganai, ia abia laumana ese ia hamorua diho tano dekenai, tano ia botaia, uduna ranu kurokuro ia diho lao.

Iesu ia henanadai, ia gwau: “Edena negai inai gorere ia davaria? ”

Ena tamana ia haere, ia gwau: “Ia maragina neganai. Nega momo ia negea lahi lalonai, ranu lalonai danu hadikaia totona.” Bena ia ese Iesu ia noia, ia gwau: “Bema oi karaia diba, mani oi bogahisihisi ai dekenai bona oi durua ai.”

Reana lagani momo lalodiai unai tau ese heduru ia tahua. Iesu ena hahediba taudia danu idia durua diba lasi, unai dainai ia dara doko. Iesu ese unai tau ena lalohisihisi ena mamina ia abia neganai, ia gwau: “Dahaka dainai oi gwau, ‘Bema oi karaia diba?’ Abidadama tauna gau ibounai ia karaia diba.”

Mero ena tamana ia boiboi, ia gwau: “Lau abidadama henia,” bena Iesu ia noia, ia gwau: “Lauegu abidadama maragimaragi mani oi durua.”

Iesu ese hutuma ia itadia, idia heau mai ia dekenai, bena ia ese lauma dikana ia gwau henia, ia gwau: “Oi hereva diba lasi bona taia koua lauma, oi lao murimuri, ia lalonai oi vareai lou lasi.” Lauma be mero amo ia raka lasi neganai ia hadikaia lou, unai dainai mero ia boiboi bona ia mareremarere dikadika. Bena mero be tano ai ia hekure ia marere lasi, unai dainai taunimanima idia gwau: “Ia mase momokani.” To Iesu ese ena imana ia dogoatao, ia abia isi, bena ia gini tore.

Guna, Iesu ese hahediba taudia haroro totona ia siaidia lao neganai, lauma dikadia idia luludia. Unai dainai, ruma lalonai idia vareai neganai, Iesu idia nanadaia, idia gwau: “Badina dahaka aiemai lulua siahu be hegeregere lasi?”

Iesu ia gwau edia abidadama be maragimaragi dainai idia lulua diba lasi. Ma ia hamaorodia, ia gwau: “Inai bamona gauna lulua dala ta be lasi, guriguri sibona mo be hegeregere.” Unai siahu bada laumana lulua totona, namona be edia abidadama ia goada bona Dirava idia noia do ia durudia.

Bena Iesu ia gwau: “Umui lau hamaoroa momokani, bema umui emui abidadama ena bada be mastadi uhena sibona bamona, inai ororo bema umui hereva henia, bema umui gwau, ‘Iniseni amo oi lao unuseniai,’ be do ia lao. Kara ibounai danu do umui karaia diba.” Abidadama be mai ena siahu bada!

Reana ita laloa Iehova ena hesiai gaukarana dekenai ita goada ita lao dalana idia koua gaudia be bada herea, ororo bamona, bona kokidia o hanaidia dalana be lasi. To, Iesu ia hahedinaraia bema iseda abidadama ita habadaia, unai abidadama ese ita do ia durua, unai koua gaudia o hekwakwanai gaudia hanaidia totona. Mareko 9:​14-29; Mataio 17:​19, 20; Luka 9:​37-43.

▪ Iesu be Heremon Ororona amo ia giroa mai neganai, dahaka ia davaria?

▪ Mai lauma dika merona ena tamana be Iesu ese ena lalona edena bamona ia hagoadaia?

▪ Dahaka dainai hahediba taudia ese unai lauma dikana idia lulua diba lasi?

▪ Iesu ia gwau abidadama ena siahu be edena bamona?