Karoa 80

Mamoe edia Magu bona edia Naria Tauna

IESU be Ierusalem dekenai ia lao Dubu Hahelagaia Ariana, o Hanukkah, totona. Guna, lagani 168 B.C.E. ai, Antiokasi Namba Foa Epifani ese Ierusalem hanuana ia abia bona dubu mai ena boubou patana ida ia hadikadia. To, lagani toi murinai, Iuda taudia ese hanua idia abia lou murinai, dubu idia hahelagaia lou. Unai murinai, lagani ta ta iboudiai dubu hahelagaia lou ariana idia karaia.

Dubu Hahelagaia Ariana idia karaia dinana be Chislev 25, Iuda taudia edia kalenda hegeregerena, iseda kalenda dekenai unai hua be November ena dokona bona December ena matamana. Unai dainai dina 100 bamona sibodia idia do noho ela bona lagani 33 C.E. ai Paseka do idia karaia. Aposetolo Ioane ia gwau, “Unai be keru ena nega.”

Unai neganai Iesu ese parabole ta ia gwauraia; mamoe edia magu toi bona sibona ena gaukara, Mamoe Naria Tauna Namona ena gaukara hegeregerena, ia herevalaidia. Magu ginigunana be mai anina Mose ena Taravatu ena gwauhamata dekenai. Unai Taravatu be magu bamona, Iuda taudia ia koudia, murimuri taudia edia kara dikadia ese do idia hakereredia diba lasi totona. Iesu ia gwau: “Momokani, momokani umui lau hamaoroa, mamoe edia magu ena iduara dekenai ia raka vareai lasi, to magu ena iduara ia noho lasi gabuna dekenai ia hanaia kava tauna be henaoa bona dadia tauna. To iduara dekena amo ia raka vareai tauna be mamoe naria tauna.”

Guna, taunimanima haida idia mai bona idia gwau idia be Mesia, o Keriso, to idia be mamoe naria tauna korikorina lasi. Iesu ese unai tau be inai bamona ia gwauraia, ia gwau: “Iduara naria tauna ese iduara ia kehoa unai tau ena, vadaeni mamoe ese iena gadona idia kamonai. Ia ese ena mamoe momokani edia ladana ia hatoa, vadaeni ia hakaudia murimuri dekenai. . . . To idau tauna ena murina dekenai do idia raka lasi, lasi momokani. Ia dekena amo do idia heau siri, badina be idau taudia edia gadona idia diba lasi.”

Magu ginigunana ena “iduara naria tauna” be Ioane Bapatiso. Ia ese unai magu lalonai idia noho mamoe bamona taudia, Iesu ese murimuri ai do ia hakaudia lao aniani totona taudia, ia hamaorodia Iesu be daika. Unai amo iduara ia kehoa Iesu ena. Unai mamoe, Iesu ese edia ladana ia hatoa bona murimuri ai ia hakaudia mamoedia, be gabeai magu idauna ta lalonai ia hakaudia vareai. Iesu ia gwau: “Momokani, momokani umui lau hamaoroa, lau be mamoe edia iduara,” mamoe edia magu matamatana ena iduara unai. Iesu ese gwauhamata matamatana ena hahediba taudia dekenai ia karaia bona Pentekoste dinanai lauma helaga be guba amo ia bubua diho neganai, magu matamatana lalonai idia vareai.

Iesu ese ena gaukara ma ia gwauraia, ia gwau: “Iduara be lau inai. Lau dekena amo do ia raka vareai tauna be do ia mauri, ia be do ia raka vareai, do ia raka murimuri dekenai, aniani do ia davaria. . . . Lau mai vadaeni mauri do idia abia, mauri mai anina danu do idia abia totona. . . . Lau be mamoe naria tauna namona. Lauegu mamoe be lau diba. Lauegu mamoe danu idia diba lau. Inai bamona danu, lauegu Tamana ia diba lau, bona lau diba ia. Egu mauri danu lau atoa diho, mamoe totona.”

Vanegai, Iesu ese ia murinai idia raka taudia edia lalona hagoadaia totona, ia gwau: “Orea maragi e, umui gari lasi, badina emui Tamana ese ia hereva vadaeni Basileia do ia henia umui dekenai.” Unai orea maragi, edia namba ibounai be 144,000, be magu matamatana o iharuana lalonai idia vareai. To Iesu ma ia gwau: “Lau be mai egu mamoe idaudia haida danu idia noho. Idia be inai magu lalonai idia noho lasi. Idia danu do lau hakaudia mai, vadaeni egu gadona do idia kamonai, vadaeni orea do ia tamona, naria tauna danu do ia tamona.”

“Mamoe idaudia” be “inai magu lalonai idia noho lasi” dainai, idia be ma magu ta, ihatoina, lalonai idia noho. Magu iharuana bona magu ihatoina lalodiai idia noho mamoedia be gabu idauidau ai do idia noho. Magu iharuana ena “orea maragi” be guba dekenai Keriso ida do idia lohia, bona magu ihatoina ena “mamoe idaudia” be tanobada ena Paradaiso lalonai do idia noho. Ena be edia magu be idauidau, to idia mama lasi, bona idia laloa lasi idia parara bamona, badina Iesu ia gwau “orea do ia tamona” ‘naria tauna tamona’ henunai.

Mamoe Naria Tauna Namona, Iesu Keriso, ese ena mauri ia henia, unai magu ruaosi edia mamoe totona. Ia gwau: “Tau ta ese lauegu mauri ia kokia lasi, lau sibona lau atoa diho. Lau be mai siahu do lau atoa diho, mai egu siahu do lau abia lou. Inai bamona siahu be egu Tamana dekena amo lau abia vadaeni.” Iesu be unai bamona ia hereva neganai, Iuda taudia idia parara.

Hutuma idia gwau: “Ia be mai ena lauma dikana danu, ia kavakava. Dahaka dainai umui kamonai henia ia dekenai?” To ma haida idia gwau: “Unai hereva be lauma dika ese ia abia tauna ena hereva lasi.” Bena matakepulu ai ia vara tauna ia hanamoa karana idia herevalaia, idia gwau: “Lauma dika ese matakepulu taudia edia matana ia kehoa diba, a?” Ioane 10:​1-22; 9:​1-7; Luka 12:32; Apokalupo 14:​1, 3; 21:​3, 4; Salamo 37:29.

▪ Dubu Hahelagaia Ariana be dahaka, bona edena dina ai idia karaia?

▪ Mamoe edia magu ginigunana be dahaka, bona ena iduara naria tauna be daika?

▪ Iduara naria tauna ese iduara ia kehoa Mamoe Naria Tauna dekenai, ena anina be dahaka, bona unai murinai mamoe be edeseniai idia vareai?

▪ Mamoe Naria Tauna Namona ena magu iharuana bona ihatoina lalodiai idia noho taudia be daidia, bona orea hida ai idia lao?