Karoa 62

Manau Karana Ia Hadibaia

KAISAREA Filipi tanona dekenai Iesu ese mai ena lauma dika merona ia hanamoa murinai, ia ura ia lou lao Kaperanaum dekenai. To ia ura ena hahediba taudia sibodia ese do idia bamoa lao, bena do ia hahegaegaedia diba, iena mase totona bona gabeai do idia abia gaukaradia totona. Ia hamaorodia, ia gwau: “Taunimanima ena Natuna be taunimanima ese dohore idia dogoatao, idia alaia mase, bona dina toi murinai do ia toreisi lou.”

Ena be guna Iesu be unai ia herevalaia, bona iena toana ia haidaua neganai aposetolo toi vairadiai ia herevalaia lou, to ena hahediba taudia idia do lalo-pararalaia lasi. Idia ta ia gwau lasi Iesu do ia mase lasi, Petro be guna ia hereva bamona, to idia gari dainai idia nanadailaia lasi.

Vadaeni, Kaperanaum dekenai idia ginidae. Nega momo Iesu ia haroro murinai unai hanua dekenai ia lou lao. Unai be Petro bona aposetolo ma haida edia hanua korikorina. Unuseniai, dubu ena moni gogoa taudia be Petro dekenai idia lao. Reana Iesu idia samania toho totona, Petro idia nanadaia, idia gwau: “Umui emui hadibaia tauna be Dubu Helaga ena moni ia henia o lasi?”

Petro ia haere, ia gwau: “Ia henia.”

Unai murinai Iesu bona Petro be ruma dekenai idia daekau. Iesu ia diba dahaka ia vara, unai dainai Petro ese ia do herevalaia lasi neganai, Iesu ese ia nanadaia, ia gwau: “Simona e, oi be edena bamona oi laloa? Tanobada edia king ese takisi moni edia taunimanima korikori dekena amo do idia abia, o idau taudia dekena amo?”

Petro ia gwau: “Idau taudia dekena amo.”

Iesu ma ia gwau: “Unai dainai, king edia taunimanima korikori be do idia noho kava, takisi idia henia lasi.” Iesu ena Tamana be guba bona tanobada edia King bona dubu ai idia tomadiho henia Diravana, unai dainai, bema Dirava ena Natuna ese dubu ena takisi monina ia henia lasi neganai ia kerere lasi. To Iesu ia gwau: “Gau tamona, edia lalona ita hametaua garina, gohu dekenai oi lao, kimai ta oi negea diho. Kimai ia abia guna gwarumena do oi veria daekau. Ena uduna oi kehoa, lalonai siliva moni ta do oi davaria. Oi abia, vadaeni do oi henia idia dekenai, ita ruaosi totona.”

Vadaeni, hahediba taudia be ruma ta lalonai idia hebou neganai, Iesu idia nanadaia, idia gwau: “Daika be Guba Basileia lalonai do ia bada herea?” Iesu ia diba dahaka dainai unai bamona idia henanadai, badina be dala dekenai ia murinai idia raka neganai edia hereva ia kamonai. Unai dainai ia nanadaidia, ia gwau: “Dala dekenai dahaka umui herevahereva?” Idia hemarai dainai idia haere lasi, badina sibodia idia hepapahuahu daika be herea.

Lagani toi bamona lalodiai Iesu ese ia hadibadia murinai unai idia hepapahuahulaia be oi hoalaia, a? To, unai ese ia hahedinaraia, idia be goevadae lasi bona edia tomadiho dalana gunana idia manadalaia dainai unai bamona idia kara. Guna, idia be Iuda ena tomadiho oreana lalonai idia noho. Unai orea dekenai dagi bona ladana bada be mai anina bada. Danu, reana Petro ia laloa ia ese ma haida ia hereadia, badina Iesu ese ia gwauhamata henia Basileia ena “ki” do ia henia. Reana Iakobo bona Ioane danu be unai bamona idia laloa, badina be Iesu ena toana ia idau neganai unai idia itaia.

Herevana edia kara ena badina be dahaka, edia lalohadai hamaoromaoroa totona Iesu ese haheitalai ia karaia. Mero maragina ta ia boiria, idia bogaragidiai ia haginia, ia rosia, ia gwau: “Bema umui emui lalona umui giroa lasi, bona memero maragi bamona do umui halaoa lasi, umui be Guba Basileia lalonai do umui raka vareai diba lasi. Unai dainai, inai mero maragi bamona do ia manau tauna be Guba Basileia lalonai do ia bada herea. Bona mero maragi inai bamona ta lauegu ladanai do ia abia dae tauna ese lau danu do ia abia dae.”

Dala namo hereana amo ena hahediba taudia edia lalona ia hamaoromaoroa, ani? Iesu ese ia badu henidia lasi, ia gwau lasi idia hekokoroku o idia mataganigani o ladana bada o dagi bada idia tahua. Lasi, to haheitalai amo kara maorona ia hadibadia. Mero maragina ia haheitalaia, badina maragidia momo idia manau, ladana bada idia tahua lasi, bona daika ia bada daika ia maragi be idia laloa lasi. Unai amo Iesu ia hahedinaraia, namona be ena hahediba taudia ese memero maragidia mai edia lalo-manau edia kara idia tohotohoa. Ena hereva dokonai Iesu ia gwau: “Umui emui huana dekenai ia maragi momokani tauna, ia be badana.” Mataio 17:​22-27; 18:​1-5; Mareko 9:​30-37; Luka 9:​43-48.

▪ Iesu be Kaperanaum dekenai ia lou lao neganai, dahaka hadibaia herevana ia gwauraia lou, bona idia kamonai taudia be edena bamona idia laloa?

▪ Dahaka dainai Iesu ese dubu ena takisi monina ia henia be mai ena badina maorona lasi, to dahaka dainai ia henia?

▪ Dahaka dainai hahediba taudia idia hepapahuahu, bona edena dala amo Iesu ese ia sisiba henidia?