Karoa 74

Mareta Ia Sisiba Henia, bona Guriguri Dalana Ia Gwauraia

IESU be Iudea tanona lalonai ia haroro neganai, Betania hanuana dekenai ia ginidae. Mareta, Maria, bona edia taihuna Lasaro be unai hanua lalonai idia noho. Reana guna ena haroro gaukarana lalonai Iesu ese ia hedavari henidia dainai, ia be edia turana namona ai ia lao vadaeni. Vadaeni, Mareta ese ia abia dae ena ruma ai.

Mareta ia ura bada heabidae karadia namodia ia karaia Iesu totona. Mesia be ena ruma dekenai ia vadivadi be hahenamo badana ia dekenai! Unai dainai Mareta ese aniani namo hereana ia hegaegaelaia bona gau ma haida ia hekwarahilaidia, Iesu ese ena vadivadi negana do ia moalelaia totona.

To Mareta ena tadina, Maria, be Iesu ena aena badinai ia helai, ena hereva ia kamonai. Nega sisina murinai Mareta be Iesu dekenai ia lao, ia gwau: “Lohiabada e, oi be laloa lasi, egu tadina ese lau ia rakatania, vadaeni lau sibona hekwarahi, a? Mani oi hamaoroa, do ia durua lau.”

To Iesu ese Maria ia hamaoroa lasi. Lalokau dalana amo Mareta ia sisiba henia, badina tauanina gaudia ia laloa momo dainai. Ia gwau: “Mareta e, Mareta e, gau momo totona oi laloa momo bona oi hekwarahi, to gau tamona sibona be ia bada herea.” Iesu ese aniani idauidau hekwarahilaia karana ia herevalaia unai.

Mareta ena ura be namo; ia ura heabidae karadia ia karaia. To, tauanina gaudia ia hekwarahilaia dainai, Dirava ena Natuna ena hahediba herevadia ia kamonai lasi! Unai dainai Iesu ia gwau: “Maria ese inai gau namona ia abia hidi, bona ia dekena amo do ita kokia lasi.”

Gabeai, ma nega ta ai, hahediba tauna ta ese Iesu ia nanadaia, ia gwau: “Lohiabada e, guriguri oi hadibaia ai dekenai.” Lagani ta mai kahana gunanai, Iesu be ororo dekenai ia haroro bona guriguri dalana ia gwauraia neganai, unai tau ia noho lasi reana. Unai dainai Iesu ese guriguri dalana ia gwauraia lou bena parabole ta ia henia, guriguri loulou ena namo hahedinaraia totona.

Iesu ia gwau: “Umui ta hanuaboi huanai momokani dekenai bema oi lao, oiemu turana dekenai bema oi noinoi, do oi gwau, ‘Egu turana e, aniani gaudia toi mani oi henia, lau abitore, badina be egu turana ta ena laolao ia mai vadaeni, to lau dekenai ia lau ubua gauna ta ia noho lasi.’ Do ia be ruma lalona dekena amo do ia haere, do ia gwau, ‘Oi hekwarahi henia lasi lau, iduara lau koua vadaeni, bona lau be egu natuna danu ai hekure. Lau be do lau toreisi lasi, do lau henia lasi oi dekenai.’ Lau hamaoroa umui dekenai, . . . bema oi noia lou, noia lou neganai ia be do ia toreisi, vadaeni oiemu ura gaudia ibounai do ia henia.”

Iesu ia gwau lasi, ia gwauraia tauna ena turana bamona, Iehova Dirava ia ura lasi noinoi ia kamonai. Lasi, to unai parabole amo ia hahedinaraia, ia noia loulou neganai ia noia gauna ia henia; unai hegeregerena, iseda lalokau Tamana guba dekenai ese ita noinoilaia loulou gaudia do ia henia ita dekenai! Unai dainai Iesu ma ia gwau: “Lau hamaoroa umui dekenai, do umui noinoi, do ia henia umui dekenai. Do umui tahua, do umui davaria. Do umui pidipidi, iduara do ia kehoa umui emui. Badina be idia noinoi taudia ibounai idia abia, idia tahua taudia ese idia davaria, pidipidi tauna dekenai iduara do idia kehoa.”

Unai murinai Iesu ese taunimanima edia goevadae lasi tamadia tanobada dekenai be ia gwauraidia, ia gwau: “Umui daika emu natuna aniani bema ia noia neganai, nadi do oi henia? O gwarume do ia noia neganai, gaigai do oi henia? O gatoi do ia noia neganai doadoa do oi henia? Umui laloa, umui be dika taudia, gau namodia emui natuna dekenai henia be umui diba, to emui Tamana guba dekenai ia noho ese Lauma Helaga idia noinoi taudia dekenai do ia henidia lasi, a?” Unai hereva amo Iesu ese taunimanima ia hagoadadia idia guriguri loulou totona. Luka 10:38–11:13.

▪ Dahaka dainai Mareta ese gau idauidau ia hegaegaelaia Iesu totona?

▪ Maria ese dahaka ia karaia, bona dahaka dainai Iesu ese ia hanamoa to Mareta ia hanamoa lasi?

▪ Dahaka dainai Iesu ese guriguri dalana ia gwauraia lou?

▪ Edena bamona Iesu ese guriguri loulou karana ena namo ia hahedinaraia?