Karoa 27

Mataio Ia Boiria

IESU ese unai gorere tauna ia hamauria murinai, Kaperanaum hanuana amo ia diho kone dekenai. Unuseniai danu hutuma be ia dekenai idia lao, bena ia hadibadia matamaia. Ia raka lao neganai, Mataio, ena ladana ta be Levi, ia itaia, takisi rumana dekenai ia helai noho. Vadaeni Iesu ese ia boiria, ia gwau: “Lauegu murinai oi raka.”

Guna Iesu ese Petro, Andrea, Iakobo, bona Ioane ia boiridia neganai iena hahediba herevadia idia diba vadaeni, bona reana Mataio danu be unai bamona. Bona idia hegeregeredia, Mataio ese Iesu ia kamonai henia. Ia toreisi, ena takisi gogoa gaukarana ia rakatania, bona Iesu murinai ia raka.

Gabeai, Mataio ese ena ruma dekenai aria badana ta ia karaia. Iesu bona ena hahediba taudia sibodia lasi, to Mataio ena bamona gunadia haida danu unuseniai idia hebou. Iuda taudia momo ese unai taudia idia dadaraidia, badina be Roma ena gavamani totona takisi moni idia gogoa, bona idia momo ese taunimanima idia koidia, takisi moni momo be idia edia amo idia abia totona.

Farisea taudia idia itaia Iesu be idia ida idia aniani hebou, unai dainai ena hahediba taudia idia nanadaia, idia gwau: “Umui emui hadibaia tauna be dahaka dainai takisi gogoa taudia bona dika taudia danu gabu tamona dekenai idia aniani hebou?” Iesu ese edia hereva ia kamonai, bena ia haere henidia, ia gwau: “Goada taudia be dogeta do idia tahua lasi, to gorere taudia sibona. Umui lao, inai Buka Helaga hereva ena anina do umui laloa, inai bamona ia torea, ‘Lau be bogahisihisi lau ura, to boubou gauna be lau ura lasi.’ Badina be kara maoromaoro taudia boiria totona lau mai lasi, to kara dika taudia boiria totona lau mai.”

Mataio ese unai takisi gogoa taudia ia boiridia vadaeni, Iesu ena hereva idia kamonai bona lauma dalanai ia hanamodia totona. Iesu be idia ida ia helai hebou, badina ia ura do ia durudia Iehova ida do idia turana karaia totona. Sibodia idia gwauraia maoro Farisea taudia ese idia lalo-dika henidia, to Iesu be unai bamona ia karaia lasi. Ia bogahisi henidia bona lauma dalanai ia hanamodia, doketa ese gorere tauna ia hanamoa bamona.

Iesu ese kara dika taudia edia kara dika ia gwauraia maoro lasi, to ia bogahisi henidia, gorere taudia ia bogahisi henidia hegeregerena. Guna ia be mai ena hebogahisi ida lepra tauna ia daua toho neganai, ia gwau: “Lau ura, hari oi goeva.” Unai hegeregerena, namona be ita danu ese dabu taudia ita bogahisi henidia, bona tauanina dalanai bona lauma dalanai ita durudia be namo. Mataio 8:3; 9:​9-13; Mareko 2:​13-17; Luka 5:​27-32.

▪ Iesu ese Mataio be edeseniai ia itaia?

▪ Mataio ena gaukara be dahaka, bona dahaka dainai Iuda taudia ese takisi gogoa taudia idia lalo-dika henidia?

▪ Dahaka dainai Iesu idia gwauraia dika, bona edena bamona ia haere?

▪ Dahaka dainai Iesu be kara dika taudia ida idia hebou?