Karoa 70

Matakepulu Tauna Ia Hanamoa

IUDA taudia ese Iesu idia hodoa gwauraia neganai, Ierusalem ia rakatania lasi. Gabeai, Sabati dinana ai, ia bona ena hahediba taudia be dala dekenai idia raka neganai, tau ta idia itaia, mai matakepulu danu ia vara. Hahediba taudia ese Iesu idia nanadaia, idia gwau: “Rabi e, daika ena kara dika dainai inai tau mai matakepulu danu ia vara, ia o ena tamana o ena sinana?”

Reana hahediba taudia idia laloa ta be ena sinana ena bogana lalonai ia kara dika diba. To Iesu ia haere, ia gwau: “Lasi, iena kara dika lasi, bona ena tamana o sinana edia kara dika lasi, to Dirava ena siahu ia dekena amo do ia hedinarai totona.” Adam ena kara dika dainai taunimanima iboudiai idia goevadae lasi, unai dainai idia haida idia vara mai edia kerere ida. Hari tau ia matakepulu dainai, Iesu be mai ena dala Dirava ena kara do ia hahedinaraia.

Iesu ia hahedinaraia unai kara ia karaia haraga be gau badana. Ia gwau: “Lau ia siaia Diravana ena kara be dina lalonai do ita karaia. Badina be hanuaboi do ia mai neganai tau ta do ia gaukara diba lasi. Tanobada dekenai lau noho neganai lau be tanobada ena diari.” Gabeai sisina, Iesu do ia mase bona guri ena dibura ai do ia noho neganai, do ia gaukara diba lasi. To unai nega ia do ginidae lasi neganai, ia be tanobada ena diari.

Unai hereva ia gwauraia doko, bena tano ai ia kanudi, ena kanudi ai kopukopu sisina ia karaia. Matakepulu tauna ena matana ruaosi dekenai ia dahua, bena ia gwau: “Oi lao, Siloama ena gohu dekenai do oi lao huria.” Unai tau be unai bamona ia karaia neganai ena matana idia kehoa! Ia lou mai neganai ia moale dikadika, unai be nega ginigunana gau ta ia itaia diba dainai!

Ena dekena taudia bona ia idia diba taudia ma haida idia hoa; idia henanadai, idia gwau: “Inai be vanegai ia helai noho, ia noinoi noho, tauna, ani?” Haida idia gwau: “Tauna unai.” Ma haida idia gwau: “Lasi, inai be ia hegeregerena.” Ia sibona ia gwau: “Lau inai.”

Bena taunimanima idia nanadaia, idia gwau: “Oiemu matana be edena bamona idia kehoa?”

Ia haere, ia gwau: “Tau ta, ena ladana be Iesu, ia ese kopukopu ia karaia, egu matana ruaosi dekenai ia dahua, vadaeni ia hamaoroa lau dekenai, ia gwau, ‘Oi lao, Siloama dekenai do oi lao matana huria.’ Lau lao, lau huria, vadaeni egu matana idia kehoa.”

Idia nanadaia, idia gwau: “Inai tau be edeseni?”

Ia gwau: “Lau diba lasi.”

Idia ese ena matana idia kehoa tauna be edia tomadiho gunalaia taudia, Farisea taudia, dekenai idia hakaua lao. Bena idia danu idia nanadaia, edena bamona ena matana idia kehoa. Ia gwau: “Ia ese egu matana ruaosi kopukopu dekena amo ia dahua, lau lao huria, vadaeni egu matana idia kehoa.”

Hari noinoi tauna ena matana idia kehoa dainai, Farisea taudia idia moale be namo, to Iesu idia gwauraia dika. Idia gwau: “Unai tau be Dirava dekena amo ia mai lasi.” Badina be dahaka unai bamona idia hereva? “Badina be Sabati dinana ia badinaia lasi.” To ma Farisea taudia haida idia gwau: “Kara dika tauna ese toa unai bamodia be edena bamona do ia karaia?” Unai amo edia hebou ia parara.

Vadaeni, hari tau idia nanadaia, idia gwau: “Inai tau ese emu matana ruaosi ia kehoa, oi be edena bamona oi gwauraia?”

Ia haere, ia gwau: “Ia be peroveta tauna.”

Farisea taudia ese ena hereva idia abia dae lasi. Idia laloa hari tau bona Iesu idia gwau bou taunimanima do idia koidia. Unai dainai ena tamana sinana idia boiridia, idia nanadaidia totona. Ioane 8:59; 9:​1-18.

▪ Dahaka dainai hari tau ena matana idia kepulu?

▪ Tau ta do ia gaukara diba lasi hanuaboina be dahaka?

▪ Matakepulu tauna ena matana idia kehoa neganai, ia idia diba taudia be edena bamona idia karaia?

▪ Iesu ese hari tau ia hanamoa dainai, edena bamona Farisea taudia idia parara?