Karoa 75

Moale ena Badina

GALILEA lalonai ia haroro neganai, Iesu ese hoa karadia ia karaia, bena gabeai Iudea lalonai unai kara ia karaia lou. Lauma dikana be tau ta lalona amo ia lulua; guna unai lauma dainai ia hereva diba lasi. Taunimanima momo idia hoa maragi lasi, to haida idia maumauraia, Galilea ai idia karaia bamona. Idia gwau: “Belesebulo, lauma dikadia edia biaguna, ena siahu dekenai ia ese lauma dikadia ia lulua murimuri dekenai.” Ma haida idia ura ena dagi ia hamomokania, bona idia dibagania toho, idia gwau idia ura toa ta guba amo do ia henidia.

Edia lalohadai ia diba dainai ia haere henidia, Galilea ai idia maumauraia taudia ia haere henidia hegeregerena. Ia gwau, Basileia ta bema ia parara, do ia dika. Bena ia nanadaidia, ia gwau: “Satani sibona bema ia hapararaia, ena basileia be edena bamona do ia gini?” Bena ia hamaorodia, ia gwau: “Bema lau ese Dirava ena Laumana dainai lauma dikadia lau lulua murimuri dekenai, Dirava ena Basileia be umui dekenai ia ginidae vadaeni.”

Namona be Iesu ena hoa karadia idia itaia taudia idia hereva, Moses ena hoa karadia idia itaia taudia idia hereva bamona; idia gwau: “Inai kara be Dirava ena imana kwaki-kwakina korikori ese ia karaia.” “Dirava ena imana kwaki-kwakina” ese danu Taravatu Ten be nadi dekenai ia torea. Danu, “Dirava ena imana kwaki-kwakina”​—ena lauma helaga o ena gaukara siahuna​—amo Iesu ese lauma dikadia ia luludia bona gorere taudia ia hanamodia. Dirava ena Basileia be unai maumau taudia dekenai ia ginidae vadaeni, badina be Iesu be Basileia ena Pavapava bona ia be idia bogaragidiai ia noho dainai.

Unai murinai Iesu ese ma parabole ta amo ia hahedinaraia, lauma dikadia ia luludia diba badina be iena siahu ese Satana ena siahu ia hereaia. Ia gwau unai be goada tauna ta hegeregerena; iena imana mai ena kareva ida ese ruma ia naria, to goada herea tauna ta ia mai bona ia halusia. Bena Galilea dekenai ia gwauraia parabolena, lauma dikana ena, be ia gwauraia lou. Unai lauma dikana ese tau ta ia rakatania, to hari tau ese lauma ia rakatania gabuna dekenai gau namodia ia atoa lasi dainai, unai lauma dikana ese lauma dikadia 7 ia hakaudia mai, bena idia be unai gabu lalonai idia vareai lou. Unai dainai, unai tau be matamana ai ena dika be taina maragi, to dokona ai ena dika be bada herea.

Unai hereva ia gwauraia neganai, hahine ta be hutuma bogaragidia amo Iesu ia hereva henia, ia gwau: “Oi ia havaraia bona oi dekenai rata ia henia hahine be mai moale bada.” Unai bamona ia hereva, badina be Iuda hahinedia iboudiai edia ura be peroveta tauna do idia havaraia, bona idia ura bada Mesia do idia havaraia. Ia laloa Maria ia moale bada badina ia be Iesu ena sinana dainai.

To, Iesu ese moale ena badina korikorina ia gwauraia, ia gwau: “Gau badana momokani be inai, Dirava ena hereva idia kamonaia bona idia badinaia taudia be idia moale bada.” Iesu be nega ta ia gwau lasi, ena sinana, Maria, idia hanamoa bada be maoro. To ia hahedinaraia, Dirava ena hesiai gaukarana be mai kamonai ida idia karaia taudia ese moale korikori idia davaria.

Galilea ai ia karaia bamona, Iesu ese Iuda taudia ia gwau henidia, badina guba amo toa ta idia tahua. Ia hamaorodia toa ta idia dekenai do ia hahedinaraia lasi, Iona ena toa sibona. Iona be toa ta ai ia lao, dina toi gwarume bogana lalonai ia noho neganai, bona mai ena boga-auka ida ia haroro neganai; unai haroro dainai Nineve taudia idia helalo-kerehai. Iesu ia gwau: “Iniseni tau ta ese Iona ia hanaia!” Sieba ena kwini ese Solomon ena aonega ia hoalaia, to Iesu ia gwau: “Iniseni tau ta ese Solomona ia hanaia.”

Unai murinai Iesu ia gwau, tau ta ese lamepa ia araia neganai, hehuni gabuna dekenai o bosea henunai ia atoa lasi, to lamepa ena pata ai ia atoa, taunimanima ese diari idia itaia diba totona. Reana ena hereva ena anina be, kamonai lasi taudia vairadiai hoa karadia ia karaia be hegeregere lamepa ena diari ia hunia bamona. Unai bamona taudia edia matadia idia namo lasi bona idia itaia namonamo diba lasi dainai, ena hoa karadia edia anina korikori idia abia lasi.

Iesu ese lauma dikana be mu tauna ta amo ia lulua dainai unai tau ia hereva diba. Edia matana idia namo taudia ese unai hoa karana dainai Dirava idia hanamoa bona ena sivarai namona idia harorolaia be namo! To, unai maumau taudia be unai bamona idia karaia lasi. Unai dainai Iesu ia gwau: “Do oi naria namonamo, diari oiemu lalona dekenai ia noho be do ia dibura garina. Bema oiemu tauanina ibounai ia diari, dibura sisina be kahana ta dekenai ia noho lasi neganai ibounai be do ia diari momokani, lamepa ena diaridiari ese oi ia hadiaria hegeregerena.” Luka 11:​14-36; Esodo 8:​18, 19; 31:18; Mataio 12:​22, 28.

▪ Iesu ese mu tauna ia hanamoa neganai, taunimanima be edena bamona idia hereva?

▪ “Dirava ena imana kwaki-kwakina” be dahaka, bona Dirava ena Basileia be Iesu ena hereva idia kamonai taudia dekenai ia ginidae vadaeni, ena anina be dahaka?

▪ Moale korikori ena badina be dahaka?

▪ Ta ese matana namona edena bamona ia abia diba?