Karoa 17

Nikodemo Ia Hadibaia

LAGANI 30 C.E. ai, Paseka Ariana dekenai Iesu ese hoa karadia haida ia karaia. Unai dainai taunimanima momo ese idia abidadama henia. Iuda taudia edia kota badana tauna ta ladana Nikodemo ese Iesu ena kara ia hoalaia bona ia ura diba ma haida do ia abia, unai dainai Iesu dekenai ia lao. Hanuaboi ai ia lao, Iuda ena lohia ma haida ese ia do idia itaia bena do idia dadaraia garina.

Iesu ia hereva henia, ia gwau: “Rabi e, ai diba oi be hadibaia tauna, Dirava dekena amo oi mai vadaeni, badina oi karaia toadia be tau ta ia karaia diba lasi bema Dirava ese ia durua lasi neganai.” Bena Iesu ese ia hamaoroa, bema ta ia ura Dirava ena Basileia lalonai do ia noho, namona be “ia vara lou.”

Nikodemo ese ia nanadaia, ia gwau: “Ena sinana bogana dekenai do ia vareai lou diba, vadaeni do ia vara lou, a?”

Lasi; unai be vara lou ena anina lasi. Iesu ia gwau: “Taunimanima be ranu dekena amo bona Lauma Helaga dekena amo bema ia vara lasi, ia be Dirava ena Basileia lalonai do ia vareai diba lasi.” Iesu be bapatiso ia abia neganai lauma helaga be ia dekenai ia diho mai, unai amo ia be “ranu dekena amo bona Lauma Helaga dekena amo” ia vara. Unai neganai guba amo Dirava ia boiboi ia gwau: “Inai be lauegu Natuna, egu lalokau, lau moale bada ia dekenai.” Unai hereva amo ia hahedinaraia ena lauma natuna ta ia havaraia, guba Basileia lalonai do ia vareai diba tauna unai. Gabeai, Pentekoste 33 C.E. ai, bapatiso taudia ma haida ese lauma helaga idia abia; unai amo idia vara lou bona Dirava ena lauma natudia ai idia lao.

To Dirava ena Natuna hereadaena be mai ena dagi badana. Iesu ese Nikodemo ia hamaoroa, ia gwau: “Mose ese taunimanima idia noho lasi tano dekenai gaigai ia abia isi bamona, Taunimanima ena Natuna danu unai bamona do idia abia isi. Vadaeni do idia abidadama henia taudia ibounai ese mauri hanaihanai do idia abia.” Oibe, gaigai ese idia koridia Israel taudia iboudiai idia mauri totona, namona be unai gaigai laulauna idia raraia tao. Unai hegeregerena, namona be taunimanima iboudiai ese Dirava ena Natuna idia abidadama henia, mase amo ia hamauridia totona.

Iesu ese Iehova ena lalokau karana Nikodemo ia hamaorolaia, ia gwau: “Dirava ese inai tanobada ia lalokau henia bada dainai, iena Natuna tamona sibona ia vara, ia henia vadaeni ita dekenai, do idia abidadama henia taudia ibounai be do idia mase lasi, to mauri hanaihanai do idia abia.” Unai hereva amo ia hahedinaraia goevagoeva, iena amo Iehova Dirava ese taunimanima ia hamauridia.

Bena Iesu ese Nikodemo ia hamaoroa, ia gwau: “Badina be Dirava ese ena Natuna tanobada dekenai ia siaia mai be tanobada ia kota henia totona ia mai lasi,” anina be, ia siaia lasi taunimanima gwauraidia dika bona hamasedia herevana gwauraia totona. To Iesu ena hereva hegeregerena, ia siaia “tanobada be ia dainai mauri do ia abia” totona.

Nikodemo be mai ena gari ida dibura ai Iesu dekenai ia mai vadaeni. Unai dainai Iesu ena hereva dokona be mai anina; ia gwau: “Kota henia ena badina be inai, diari [Iesu ese ena mauri bona ena hereva amo ia hahedinaraia diarina] be tanobada dekenai ia mai vadaeni, to taunimanima ese dibura idia ura henia bada, diari be idia ura henia maragi, badina edia kara be ia dika. Badina be kara dika taudia ibounai ese diari idia ura henia lasi, diari dekenai idia lao henia lasi, edia kara do idia hedinarai garina. To kara momokani idia badinaia taudia ese diari dekenai idia lao henia, vadaeni diari ese ia hedinaraia idia be kara namodia idia karaia, Dirava idia kamonai henia dainai.” Ioane 2:23–3:21; Mataio 3:​16, 17; Kara 2:​1-4; Numera 21:9.

▪ Dahaka dainai Nikodemo be Iesu dekenai ia lao, bona dahaka dainai hanuaboi neganai ia lao?

▪ “Vara lou” ena anina be dahaka?

▪ Iesu ese ena hahemauri karana be dahaka ida ia hahegeregerea?

▪ Iesu be tanobada kota henia totona ia mai lasi, anina be dahaka?