Karoa 43

Parabole amo Ia Hadibadia

KAPERANAUM dekenai Iesu ese Farisea taudia ia gwau henidia. Gabeai, unai dina lalonai ruma amo ia diho, Galilea Gohuna dekenai ia raka lao, bena hutuma bada ia dekenai idia hebou. Iesu be vanagi ta ai ia gui, kone amo ia lao sisina, bena kone ai idia gini taudia be guba Basileiana ia hadibadia matamaia. Taunimanima idia diba gaudia be parabole o sivarai hegeregeredia amo ia herevalaidia, ia hadibadia totona.

Iesu ese uhe hadoa tauna ta ia sivarailaia guna. Uiti uhedia ia negea lao negea mai neganai, haida be dala isena ai idia moru, bena manu ese idia ania ore. Ma haida be nadi ai idia moru, tano sisina ai. Idia tubu neganai, edia ramudia idia diho momokani diba lasi, bena dina ia daekau neganai idia marai. Ma haida be ava ginigini lalodiai idia moru, bena idia tubu neganai ava ginigini ese idia koudia. To haida be tano namona ai idia moru, anina idia havaraia, haida 100, haida 60, bona haida 30.

Ma parabole ta lalonai Iesu ia gwau, Dirava ena Basileia be biru tauna ta bamona, ena uma ai uiti uhedia ia negea lao negea mai. Dina momo lalodiai, ia mahuta bona ia noga neganai, unai uhe idia tubu, to edia tubu dalana ia diba lasi. Idia sibodia idia tubu bona anina idia havaraia. Anina ia mage neganai, unai tau ese ia utua.

Bena Iesu ese inai parabole ihatoina ia gwauraia: Biru tauna ese uiti uhedia namodia ia hadodia, to “taunimanima idia mahuta neganai,” ena inai tauna ta ia mai bona ava uhedia be uiti bogaraginai ia hadodia. Biru tauna ena hesiai taudia ese idia nanadaia, unai ava idia ragaia be namo, eiava. Ia gwau: ‘Lasi, bema ava dikadia umui ragaia, uiti haida danu do umui ragaia hebou. Namona be idia tubu hebou ela bona uiti utua negana. Bena utua taudia do lau hamaorodia, ava dikadia do idia haboudia bona gabudia guna, bena uiti be aniani rumana ai do idia haboua.’

Iesu ese ma parabole rua be kone ai idia gini taudia ia hamaorolaidia. Ia gwau, “Guba Basileia” be tau ta ese ia hadoa mastadi uhena bamona. Ena be au uhedia iboudiai amo ia mo sibona maragimaragi herea, to ia tubu neganai aniani avadia iboudiai ia hanaia. Au ai ia lao, bena manu be ena rigina ai edia ruma idia karaia.

Hari inai negai, haida idia gwau Iesu ia hereva kerere, badina ena be mastadi uhedia be maragimaragi, to ma uhe haida be maragimaragi herea. To Iesu ese tubutubu gaudia edia toana ia hadibalaidia lasi unai. Unai neganai Galilea taudia idia laloa mastadi uhena ia maragimaragi herea. Unai dainai idia diba Iesu ese ena parabole amo tubutubu badabada karana ia herevalaia.

Unai murinai ia gwau, “Guba Basileia” be hatubua muramurana bamona, hahine ta ese ia abia, paraoa disi toi ida ia buloa, bena muramura ese paraoa ibounai ia hatubua.

Unai parabole ima ia gwauraidia murinai, Iesu ese hutuma ia siaidia oho, bena ruma dekenai ia lou lao. Nega sisina murinai, ena aposetolo 12 bona taunimanima ma haida idia lao ia dekenai.

Hahenamo Idia Abia Iena Parabole Amo

Unai neganai ena hahediba taudia ese ena hadibaia dalana matamatana idia laloa momo. Guna ia haroro neganai idia kamonai parabole haida ia gwauraidia, to unai negai momo ia gwauraidia hebou. Unai dainai idia nanadaia, idia gwau: “Badina be dahaka parabole dekenai oi hadibaia?”

Ia karaia ena badina ta be inai peroveta herevana hagugurua totona: “Lau hadibaia neganai parabole do lau gwauraia. Tanobada matamaia nega amo ia mai bona hari, hunia gaudia do lau gwauraia hedinarai.” To badina ma ta be inai: Parabole ia gwauraidia dainai, taunimanima ese edia lalodia korikori idia hahedinaraia.

Taunimanima momo ese Iesu idia ura henia, ena sivarai gwauraia dalana namona bona ena hoa karadia dainai, to idia ura lasi edia Lohiabada bamona idia hesiai henia bona ia murinai idia raka. Idia ura lasi ena sivarai ese edia lalohadai eiava edia kara ia haidaua.

Unai dainai Iesu ia gwau: “Inai dainai parabole dekena amo lau hereva idia dekenai, vadaeni edia matana idia negea, to do idia itaia diba lasi. Bona idia kamonai gwauraia, to do idia kamonai diba lasi bona edia lalona be do ia kehoa diba lasi. Idia dekenai Isaia ena peroveta hereva ia momokani vadaeni, ia gwau, ‘. . . Badina be inai bese taudia edia lalona idia dibura.’ ”

Iesu ma ia gwau: “To umui be emui matana idia namo vadaeni, badina umui itaia diba. Emui taiana danu idia namo, badina be umui kamonai diba. Umui lau hamaoroa momokani, peroveta taudia bona kara maoromaoro taudia momo idia ura be umui itaia gaudia do idia itaia, to idia itaia diba lasi, bona umui kamonai herevadia idia ura kamonai, to idia kamonai diba lasi.”

Oibe, aposetolo 12 bona edia bamodia edia lalodia idia namo, bona idia ura diba idia abia. Unai dainai Iesu ia gwau: “Guba Basileia ena hunia herevana umui dekenai be idia hedinarai, to idia dekenai be lasi.” Ena hahediba taudia ese diba idia tahua dainai, uhe hadoa tauna parabolena ena anina ia hamaorolaidia.

Iesu ia gwau: “Uhe be Dirava ena hereva.” Tano be taunimanima edia lalona. Dala isena ai idia moru uhedia be inai bamona ia gwauraidia: “Satani be ia mai, edia lalona dekena amo hereva be ia abia siri, do idia abia dae bona do idia mauri garina.”

Tano mai nadi momo dekenai idia moru uhedia be taunimanima ese hereva idia kamonai bona idia abia dae mai moale ida, to idia be mai edia ramudia lasi. Unai dainai hereva be edia lalodia ai ia vareai momokani lasi, bena hedibagani o dagedage idia davaria neganai idia hekwakwanai.

Iesu be ma ia gwau, ava ginigini dekenai idia moru uhedia be taunimanima ese hereva idia kamonai, to tanobada ena lalo-hekwarahi bona ena taga bona ena moale ese idia koudia, unai dainai edia huahua be lasi.

To tano namona ai idia moru uhedia be taunimanima ese hereva idia kamonai mai edia lalodia maoromaoro bona goevagoeva ida, bona idia laloatao; idia hesiku lasi ela bona edia huahua idia havaraia.

Unai hahediba taudia ese hahenamo idia davaria, badina Iesu idia tahua ena hahediba herevadia edia anina idia dibaia totona! Iesu ia ura ena parabole edia anina idia diba, hereva momokani idia diba totona. Iesu ia gwau: “Lamepa ita abia neganai ita atoa uro lalonai, o mahuta patana henunai? Lasi, lamepa ena gini gabuna dekenai ita atoa.” Ma ia gwau: “Umui emui kamonai umui naria namonamo.”

Hahediba Herevadia Namodia ma Haida

Iesu ese uhe hadoa tauna ena parabole ena anina ia gwauraia murinai, ena hahediba taudia idia ura ma diba haida idia abia. Unai dainai idia noia, idia gwau: “Ava dikadia uma lalonai edia parabole ena anina mani oi hadibaia ai dekenai.”

Iena hahediba taudia edia ura be idau bona kone ai idia gini taudia oredia edia ura be ma idau! Hutuma idia ura lasi unai parabole edia anina idia tahua, idia kamonai vadaeni herevadia be hegeregere idia dekenai. Ena hahediba taudia be unai bamona idia idau dainai, idia dekenai ia gwau:

“Umui kamonai gaudia umui laloa namonamo. Umui henia hegeregere, dohore unai bamona idia henia lou umui dekenai, bona gau haida danu.” Hahediba taudia ese Iesu ena hereva idia kamonai mai edia ura bada ida, unai dainai ia hanamodia bona hereva ma haida ia hadibadia. Edia noinoi hegeregerena ia hamaorodia, ia gwau:

“Uiti uhena namodia ia negea lao negea mai tauna be Taunimanima ena Natuna. Uma be tanobada. Uhe namodia be Basileia ena taunimanima. Ava dikadia be Satani ena taunimanima. Badu tauna, ava uhena ia negea lao negea mai be Satani. Uiti utua negana be tanobada ena dokona. Utua taudia be aneru.”

Ena parabole ena kahana ta ta ia herevalaia murinai, Iesu ia gwau, hari tanobada oromana dokona ai, uiti utua taudia, aneru unai, ese ava dikadia bamona Keristen taudia koikoidia bona “Basileia ena taunimanima” do idia hapararadia. Bena “Satani ena taunimanima” ese maka do idia abia idia mase totona, to Dirava ena Basileia ena taunimanima, “kara maoromaoro taudia” unai, ese edia Tamana ena Basileia lalonai hairai do idia abia.

Bena Iesu ese ena hahediba taudia hanamodia totona, ma parabole toi ia henidia. Ginigunana be inai: “Guba Basileia be kohu namona ta, tano dekenai ia hunia noho bamona. Tau ta ese ia davaria, vadaeni tano dekena amo ia koua, ia lao, mai moale danu ena gau ibounai ia hoia lao, vadaeni unai tano ia hoia.”

Iharuana be inai: “Guba Basileia be hoihoi tauna ta bamona, davana bada nadi namodia ia tahua. Nadi namo herea ta ia davaria, vadaeni ia lao, ena gau ibounai ia hoia lao, unai nadi namo herea ia hoia.”

Iesu be kohu namona hehunina ia davaria tauna bamona bona davana bada nadina ia davaria hoihoi tauna bamona. Iesu ia kara hegeregere ena kohu ibounai ia hoia bamona, ena dagi badana guba dekenai ia rakatania, tanobada tauna ai ia lao totona. Bena tanobada ai, taunimanima ese idia gwauraia dika bona mai edia badu ida idia dagedage henia, to ena haheauka amo ia hahedinaraia ia be hegeregere Dirava ena Basileia ena Pavapava ai ia lao.

Namona be Iesu murinai idia raka taudia danu ese edia kohu ibounai idia hoia, Keriso ida do idia lohia hebou totona eiava Basileia ena taunimanima tanobada ai do idia lao totona. Ita laloa iseda ahuna Dirava ena Basileia lalonai be davana namona a, dava bada kohuna o dava bada nadina, gau iboudiai ia hanaia gauna bamona, a?

Ena parabole ihatoina ai Iesu ia gwau “Guba Basileia” be reke bamona, davara dekenai idia atoa bena gwarume idauidau momo idia vareai. Gwarume idia hididia neganai, dikadia idia negedia to namodia be bosea ai idia haboudia. Unai hegeregerena, Iesu ia gwau, tanobada dokona ai, aneru ese kara dika taudia bona kara maoromaoro taudia do idia hididia; kara dika taudia do idia atoa siri do idia hamasedia totona.

Iesu ese unai haoda gaukarana ia hamatamaia; ena hahediba taudia ginigunadia ia boiridia “taunimanima haoda henia totona.” Unai nega amo aneru ese unai haoda gaukarana idia naria noho ela bona nega ia ginidae “reke” veria mai totona. Unai “reke” ese sibodia idia gwauraia Keristen oreadia ia laulaulaidia.

Ena be gwarume dikadia idia negedia idia mase totona, to ita moale diba, badina dala ia noho, “gwarume namodia” bamona ita do idia haboua. Iesu ena hahediba taudia edia kara hegeregerena, bema ita hahedinaraia ita ura bada diba bona lalo-parara ita abia, Dirava ena amo hahenamo do ita abia; hahediba herevadia ma haida do ita abia bona mauri hanaihanai danu. Mataio 13:​1-52; Mareko 4:​1-34; Luka 8:​4-18; Salamo 78:2; Isaia 6:​9, 10.

▪ Edena negai bona edeseniai Iesu ese parabole be hutuma ia henidia?

▪ Iesu ese ia henidia paraboledia ima be dahaka dahaka?

▪ Dahaka dainai Iesu ia gwau mastadi uhena be au uhedia iboudiai amo ia mo sibona maragimaragi herea?

▪ Dahaka dainai Iesu ese parabole ia herevalaidia?

▪ Edena dala amo Iesu ena hahediba taudia idia hahedinaraia idia be idau, hutuma hegeregeredia lasi?

▪ Iesu ia gwau uhe hadoa tauna parabolena ena anina be dahaka?

▪ Edena dala ai Iesu ena hahediba taudia be idau, kone ai idia gini taudia hutuma hegeregeredia lasi?

▪ Uhe hadoa tauna, uma, uhe namodia, badu tauna, uiti utua negana, bona uiti utua taudia, ese daidia o dahaka idia laulaulaia?

▪ Iesu ese edena parabole ma toi ia gwauraidia, bona idia amo dahaka ita diba?