Karoa 58

Paraoa bona Hatubua Muramurana

TAUNIMANIMA hutuma be Iesu dekenai idia mai Hanua Gwauta tanona dekenai. Idia momo be gabu daudau dekena amo idia mai, Iesu ena hereva kamonai totona bona edia gorere ia hanamoa totona. Vaia, idau bese edia gabu dekenai idia loaloa neganai, edia aniani idia abia loaloa bosea badadia lalodiai.

Unai neganai Iesu ese ena hahediba taudia ia boiridia, ia gwau: “Lau bogahisihisi hutuma dekenai badina dina toi lau dekenai idia noho, idia be aniani lasi. Bema idia lau siaia lao, idia lao mai hitolo danu, sedira dala dekenai idia moru, hitolo dainai, badina haida be daudau gabuna dekena amo idia mai.”

Hahediba taudia idia henanadai, idia gwau: “Inai be aniani lasi gabuna, bona hoihoi lasi gabuna, edena bamona aniani ita henia idia dekenai?”

Iesu ia nanadaidia, ia gwau: “Umui emui aniani gaudia be hida?”

Idia gwau: “Paraoa 7.” Danu, “edia gwarume maragidia haida idia noho.”

Bena ia ese hutuma ia hamaorodia, tano dekenai idia helai diho. Paraoa bona gwarume ia abia, Dirava ia guriguri henia, bena ena hahediba taudia ia henidia idia dabaraia totona. Taunimanima idia ania, idia boga kunu. Ena be tatau 4,000 bona hahine bona natudia danu idia aniani, to unai murinai aniani orena amo bosea 7 idia hahonua!

Iesu ese hebou taudia ia siaidia lao, bena ia mai ena hahediba taudia ida be vanagi ai idia gui, idia heau hanai Galilea Gohuna ena dina diho kahana dekenai. Unuseniai, Farisea taudia bona Sadukea taudia ese Iesu idia dibagania toho. Idia noia toa ta be guba amo ia hahedinaraia.

Edia kara ia diba dainai, Iesu ia gwau: “Adorahi neganai umui gwau, ‘Kerukeru be nega do ia namo, badina be guba ia kakakaka vadaeni.’ Ma dabai umui gwau, ‘Hari dina be medu do ia diho, badina be guba be kakakaka bona ia korema danu.’ Be, guba ena toana umui diba, to hari nega ena toana be umui diba lasi, a?”

Bena Iesu ia hamaorodia idia be uru dikana mai ena heudahanai, bona Farisea taudia ia hamaorodia guna bamona, ia hamaorodia toa ta do ia henidia lasi, Iona, peroveta tauna ena toa sibona. Vadaeni, Iesu mai ena hahediba taudia ida be vanagi ai idia gui, Betesaida, Galilea Gohuna unai kahana dekenai idia lao. Hahediba taudia ese paraoa idia laloaboio dainai, tamona mo vanagi ai ia noho.

Iesu ese Farisea taudia bona Herod ena orea taudia, Sadukea taudia unai, edia hedibagani ia laloa, ena hahediba taudia ia sisiba henidia, ia gwau: “Umui naria namonamo, Farisea taudia bona Heroda edia paraoa hatubua gauna umui abia garina.” Idia laloa, paraoa idia laloaboio dainai Iesu be unai bamona ia hereva, unai dainai paraoa idia herevalaia heheni. Iesu ia diba idia lalo-parara lasi, unai dainai ia gwau: “Badina dahaka umui herevahereva aniani lasi dainai?”

Vanegai Iesu be hoa dalana amo paraoa ia henia taunimanima tausen haida dekenai. Unai dainai namona be idia diba ia be paraoa korikori ia herevalaia lasi. Ia hamaorodia, ia gwau: “Umui laloatao lasi, a? Paraoa 5 lau makohia bona 5000 dekenai lau henia neganai, ania lasi gaudia dekenai bosea hida umui hahonua?”

Idia haere, idia gwau: “12.”

Iesu ia gwau: “Paraoa 7 lau makohia bona 4000 dekenai lau henia neganai, ania lasi gaudia dekenai bosea hida umui hahonua?”

Idia gwau: “7.”

Iesu ma ia gwau: “Edena bamona emui lalona be idia kehoa lasi? Lau be aniani totona umui dekenai lau hereva lasi, to lau hereva be inai Farisea taudia bona Sadukea taudia edia hatubua muramura do umui naria namonamo.”

Vadaeni, edia lalona idia parara, Iesu be parabole ta ia gwauraia unai. Paraoa hatubua muramurana ese hakererea karana ia laulaulaia. Unai parabole amo ia hamaorodia, namona be idia naria namonamo, “Farisea taudia bona Sadukea taudia edia hadibaia dala” ese do ia hakereredia garina. Mareko 8:​1-21; Mataio 15:32–16:12.

▪ Dahaka dainai taunimanima ese bosea badadia idia abia loaloa?

▪ Hanua Gwauta tanona ia rakatania murinai, vanagi dekena amo Iesu be edena gabu idauidau dekenai ia lao?

▪ Iesu be hatubua muramurana ia herevalaia neganai, hahediba taudia be dahaka idia laloa kerere?

▪ Iesu be “Farisea taudia bona Sadukea taudia edia hatubua muramura” ia gwauraia neganai, ena hereva ena anina be dahaka?