Karoa 53

Pavapava ai Idia Halaoa Toho

IESU ese hutuma be hoa dalana amo ia ubudia neganai, idia hoa. Idia gwau: “Momokani, tanobada dekenai do ia mai peroveta tauna be inai.” Idia laloa Iesu be Mose ia hanaia peroveta tauna, bona edia lohia ai ia lao be namo. Unai dainai palani idia karaia, king ai do idia halaoa totona.

To, Iesu be edia palani ia diba. Unai dainai hutuma ia siaidia lao bona ena hahediba taudia ia hamaorodia, vanagi dekenai do idia gui, do idia hanai lao Kaperanaum dekenai. Bena ia lao ororo, ia guriguri totona. Unai hanuaboi ai ia sibona ia noho.

Daba ia rere gwauraia neganai, Iesu ia toreisi, gohu ia itaia, lai ia toa badabada dainai ia hurehure. Paseka Ariana negana ia kahirakahira dainai, hua ia kuborukuboru bona ena diari ai Iesu ese ena hahediba taudia vanagi ai ia itadia, idia bara mai hekwarahi bada ida, badina lai be edia vairana kahana amo ia mai.

Vadaeni, Iesu be ororo amo ia diho bena ia lao henidia, gohu kopina latanai ia raka lao. Kilomita 5 o 6 bamona idia heau vadaeni bena Iesu ia ginidae. To ia karaia be hegeregere, vanagi do ia rakaia hanai bamona. Bena hahediba taudia ese idia itaia neganai, idia boiboi, idia gwau: “Unai be lauma ta.”

Iesu ia haere henidia, ia gwau: “Umui goada abia, inai be lau, umui gari lasi.”

Petro ese ia haere henia, ia gwau: “Lohiabada e, bema inai be oi momokani, oi hereva lau dekenai, vadaeni davara ena kopina dekenai do lau mai.”

Iesu ia gwau: “Oi mai.”

Petro be vanagi amo ia diho, gohu kopina ai ia raka matamaia, Iesu dekenai ia lao gwauraia. To lai ia itaia, bena ia gari, ia maloa matamaia, bena ia boiboi, ia gwau: “Lohiabada e, oi hamauria lau.”

Iesu ese nega tamona ena imana ia toia roro, Petro ia veria daekau, ia gwau: “Abidadama maragimaragi tauna, dahaka totona oi daradara?”

Petro bona Iesu be vanagi ai idia gui lou, bena lai ia doko. Hahediba taudia idia hoa bada. To idia hoa be mai badina, a? Hora haida idia ore vadaeni Iesu ese hutuma paraoa ima bona gwarume rua amo ia ubudia neganai, bema unai “paraoa hoa kara anina” idia lalo-pararalaia, vadaeni gohu kopina ai ia raka bona lai ia koua neganai unai idia hoalaia lasi be namo. To idia ese Iesu idia igo diho henia, idia gwau: “Momokani, oi be Dirava ena Natuna.”

Nega sisina murinai Genesaret ena kone ai idia kamokau. Genesaret be taora mai hairaina Kaperanaum kahirakahira dekenai, huahua audia momo idia tubu gabuna. Vanagi amo idia diho neganai, taunimanima ese Iesu idia itaia, idia diba ia, bena idia lao, gorere taudia idia tahudia. Edia mahuta patadia ai idia mailaidia neganai, Iesu ena dabua idia dogoatao sibona, bena idia namo.

Iesu be hoa dalana amo ia ubudia taudia hutuma ese ia idia tahua. Unai gabu ia rakatania vadaeni, unai dainai vanagi haida Tiberia amo idia kamokau neganai, idia dekenai idia gui bena Kaperanaum dekenai idia lao, Iesu tahua totona. Idia davaria neganai, idia nanadaia, idia gwau: “Rabi e, edena negai oi mai?” Iesu ese ia gwau henidia. Murinai sivarai ese unai ia herevalaia. Ioane 6⁠:​14-25; Mataio 14⁠:​22-36; Mareko 6⁠:​45-56.

▪ Iesu ese hutuma hoa dalana amo ia ubudia murinai, idia ura dahaka idia karaia ia dekenai?

▪ Ororo amo Iesu ese dahaka ia itaia, bena dahaka ia karaia?

▪ Dahaka dainai hahediba taudia ese unai gaudia idia hoalaia be badina lasi?

▪ Kone ai idia kamokau murinai dahaka ia vara?