Karoa 32

Sabati Dinana ai Dahaka be Taravatu Lasi?

SABATI dinana ma ta ai, Iesu be dubu ta dekenai ia lao, Galilea Gohuna badibadinai. Tau ta unuseniai ena imana be ia dika. Taravatu hadibaia taudia bona Farisea taudia ese Iesu idia raraia, unai tau do ia hanamoa eiava. Bena idia nanadaia, idia gwau: “Sabati dinana dekenai gorere hanamoa be ia maoro?”

Iuda tomadiho gunalaia taudia idia laloa, gorere tauna bema ia mase gwauraia neganai sibona, ta ese Sabati dinana ai ia hamauria be taravatu lasi. Unai hegeregerena idia gwau, ta ena turia ta bema ia kwaidu, Sabati dinana ai idia kwatua be taravatu. Unai dainai taravatu hadibaia taudia bona Farisea taudia ese Iesu idia henanadai henia, badina dala idia tahua do idia samania totona.

To Iesu be edia lalohadai ia diba. Danu, ia diba edia lalohadai be Baibel ena taravatu hegeregerena lasi. Vadaeni, edia kerere hahedinaraia totona, Iesu ese imana dika tauna ia hamaoroa, ia gwau: “Oi toreisi, edia huanai oi gini.”

Bena taravatu hadibaia taudia bona Farisea taudia ia hereva henidia, ia gwau: “Umui daika ena mamoe bema tamona sibona, vadaeni bema Sabati dinana dekenai guri lalonai ia moru diho, do umui veria daekau lasi, a?” Mamoe amo bisinesi idia karaia, unai dainai bema guri lalonai ta ia moru, unuseniai do idia rakatania lasi ela bona dabai, do ia gorere bena ena davana do ia maragi garina. Danu, Baibel ia gwau: “Kara maoromaoro tauna ese ena animal ia bogaia hisi.”

Vadaeni, Iesu ia gwau: “Be, taunimanima ese mamoe idia hanaia lasi, a? Unai dainai, Sabati dinana dekenai kara namo karaia be ia maoro.” Tomadiho gunalaia taudia ese Iesu ena hebogahisi herevana maorona idia gorea diba lasi dainai, idia haere lasi.

Mai badu bona mai lalohisihisi ida Iesu ese ia itadia badina edia lalona idia auka. Bena imana dika tauna dekenai ia gwau: “Oiemu imana oi atoa maoromaoro.” Ia atoa maoromaoro, vadaeni ena imana ia namo lou.

Unai tau ena imana ia namo lou dainai Farisea taudia idia moale lasi, to maoromaoro idia lao, Herod ena politikol orea taudia ida idia herevahereva hebou, Iesu hamasea dalana tahua totona. Sadukea taudia haida danu be unai orea lalonai idia noho. Unai orea taudia bona Farisea taudia idia inai heheni, to Iesu inai henia karana dekenai idia lalo-tamona. Mataio 12:​9-14; Mareko 3:​1-6; Luka 6:​6-11; Hereva Lada-isidia 12:10; Esodo 20:​8-10.

▪ Dahaka ia vara bena Iesu ese Iuda tomadiho gunalaia taudia edia lalohadai ia hakoikoia taunimanima vairadiai?

▪ Edia lalohadai be dahaka, Sabati dinana ai gorere taudia hanamodia karana dekenai?

▪ Edia lalohadai kererena hakoikoia totona, Iesu ese dahaka ia gwauraia?