Karoa 68

Sabati Dinana ai Ma Ia Hadibadia

KALAGA Ariana ena dina ginigabena, dina namba 7 ai, Iesu ia hadibadia noho, dubu ena “moni haboua gabuna” lalonai. Unai gabu idia gwauraia Hahine edia Magu; unuseniai maua idia noho, taunimanima ese edia boubou monina udaia totona.

Aria neganai, hanuaboi iboudiai, unai magu lalonai diari be bada herea. Lamepa badadia 4, idia ta ta mai edia kapusi badadia 4 oela udaia totona, be idia haginidia. Unai lamepa amo ia lasi diarina ese gabu bada herea ia hadiaria. Iesu ena hereva idia kamonai taudia ese unai diari idia laloa reana, Iesu be inai bamona ia hereva neganai, ia gwau: “Lau be tanobada ena diarina. Lauegu murina dekenai do ia raka tauna be dibura lalonai do ia loaloa lasi, to mauri ena diari do ia abia.”

Farisea taudia ese idia gwau henia, idia gwau: “Oi be oi sibona totona oi hereva, oiemu hereva be momokani lasi.”

Iesu ese ia haere henidia, ia gwau: “Lau be lau sibona totona lau hereva, to egu hereva be ia momokani, badina be lau diba edena gabu amo lau mai, bona edeseni do lau lao danu lau diba. Lau mai gabuna bona lau lao gwauraia gabuna be umui diba lasi.” Ma ia gwau: “Lau be lau sibona lau hereva, bona lauegu Tamana, lau ia siaia tauna, ia ese lau totona ia hereva.”

Farisea taudia ese idia nanadaia, idia gwau: “Oiemu Tamana be edeseni?”

Iesu ia gwau: “Umui be diba lasi lau, egu Tamana danu umui diba lasi, bema umui diba lau, be lauegu Tamana danu do umui diba.” Ena be Farisea taudia idia ura ta ese Iesu do ia dogoatao, to ta ese ia dogoatao lasi.

Iesu ma ia gwau: “Lau be idau gabu dekenai do lau lao. . . . Do lau lao gabuna dekenai do umui lao diba lasi.”

Iuda taudia ese ena hereva idia daradaralaia, idia gwau: “Inai tau be sibona do ia hamasea, a? Inai dainai ia gwau, ‘Do lau lao gabuna dekenai be do umui lao diba lasi’, a?”

Iesu ia gwau: “Umui be henunai dekena amo, lau be ataiai dekena amo, umui be tanobada taudia, to lau be tanobada tauna lasi.” Ma ia gwau: “Bema umui abidadama lasi, ‘Lau inai Lau noho’ dekenai, emui kara dika dekenai do umui mase.”

Iesu ese ena mauri guba dekenai bona ena Mesia dagina ia herevalaia unai. Bena mai edia badu ida idia nanadaia, idia gwau: “Oi be daika?”

Iesu ia haere, ia gwau: “Umui lau hamaoroa guna vadaeni lau be daika. . . . Gau tamona, lau ia siaia Tauna be momokani, bona ia dekena amo lau abia herevadia be taunimanima dekenai lau hamaoroa.” Ma ia gwau: “Umui be Taunimanima ena Natuna do umui abia isi neganai unai dekena amo do umui diba, idia gwauraia guna tauna be lau inai. Kara ta danu lau sibona lau karaia lasi, to Tamana ese lau dekenai ia hadibaia hegeregerena lau hereva. Lau ia siaia Diravana ese lau ia durua, ia be ia rakatania lasi lau, lau sibona lau noho lasi, badina be iena ura be nega ibounai lau karaia.”

Iesu be unai bamona ia hereva neganai, taunimanima momo ese idia abidadama henia. Idia dekenai ia gwau: “Bema lauegu hadibaia hereva umui badinaia neganai umui be lauegu diba tahua taudia momokani. Hereva momokani be do umui diba, bona hereva momokani ese umui do ia ruhaia.”

Idia badu henia taudia idia gwau: “Ai be Aberahamo ena besena, ai be nega ta tau ta ia guia lasi ai, lasi bona lasi momokani. Dahaka dainai oi gwau, ‘Umui do ia ruhaia’?”

Ena be nega momo idau besedia edia siahu henunai idia noho, to idia laloa unai bese be edia biagudia lasi. Idia ura lasi ta ia gwau idia be hesiai taudia. To Iesu ia gwau idia be hesiai taudia, ia gwau: “Momokani, momokani umui lau hamaoroa, kara dika taudia be dika ese ia guia, vadaeni idia be dika ena hesiai gaukara idia karaia.”

Iuda taudia idia ura lasi idia gwau idia be dika ena hesiai taudia, unai dainai dika idia davaria diba. Iesu ia gwau: “Hesiai tauna be ruma dekenai ia noho hanaihanai lasi, to ruma biaguna ena natuna ese ruma dekenai ia noho hanaihanai.” Taravatu ia gwau lasi hesiai tauna ese ahuna do ia abia, unai dainai ena biaguna ese ia hadokoa diba. Natuna korikori eiava natuna ai idia halaoa tauna sibona be ruma dekenai ia “noho hanaihanai,” anina be ela bona ia mase.

Iesu ma ia gwau: “Unai dainai, bema Natuna ese umui do ia ruhaia neganai, umui be do ia ruhaia momokani.” Taunimanima ia ruhaia hereva momokanina be inai: Iesu Keriso ese ena mauri goevadaena, boubou gauna bamona ia henia, taunimanima be mase ia havaraia kara dikana amo ruhaia totona. Ioane 8:​12-36.

▪ Dina namba 7 ai Iesu be edeseniai ia hadibadia? Aria dekenai, hanuaboi ai dahaka ia vara, bona unai ena anina be dahaka Iesu ena hahediba herevana dekenai?

▪ Iesu be ena mai gabuna be edena bamona ia herevalaia, bona unai ese ia hahedinaraia ia be daika?

▪ Edena dala ai Iuda taudia be hesiai taudia, to dahaka hereva momokani ese ia ruhadia nege diba?