Karoa 31

Sabati Dinana ai Uiti ena Anina Idia Kokia

NEGA sisina murinai Iesu bona ena hahediba taudia be Ierusalem idia rakatania, Galilea idia lou henia totona. Unai be gara lou negana bona uiti ese ena anina ia atoa vadaeni. Hahediba taudia idia hitolo dainai, uiti ena anina idia kokia bona idia ania. To unai be Sabati dinana dainai, haida ese edia kara idia raraia.

Vanegai tomadiho gunalaia taudia Ierusalem dekenai ese dala idia tahua Iesu idia hamasea totona, badina idia gwau ia ese Sabati taravatuna ia utua. Hari Sabati dinanai Farisea taudia ese Iesu idia hamaoroa, idia gwau: “Itaia, oiemu diba tahua taudia be karaia lasi gaukara Sabati dinana dekenai idia karaia.”

Farisea taudia idia gwau, uiti ena anina kokia bena roia (imana dekenai dahua) ania totona, be uiti gogoa bona kwadia gaukarana hegeregerena. Unai edia lalohadai ese taunimanima ia hametaudia, to Dirava ena ura be Sabati do idia moalelaia bona unai dina ai lauma dalanai goada do idia davaria. Unai dainai Iesu ese Baibel ena sivarai haida ia gwauraidia, ia hahedinaraia Iehova Dirava ia ura lasi Farisea taudia edia lalohadai Sabati taravatuna dekenai idia abia.

Iesu ia gwau, David bona ena orea taudia idia hitolo neganai, dubu dekenai idia lao bona paraoa helagana idia ania. Unai paraoa be hahelaga taudia ese Iehova ena vairana amo idia kokia vadaeni bona ena gabunai paraoa matamatana idia atoa vadaeni. Idia sibodia ese idia ania be maoro, to David bona ena orea taudia idia hitolo mase dainai, unai paraoa idia ania neganai ta ese ia gwauraidia dika lasi.

Iesu ese ma haheitalai ta ia gwauraia, ia gwau: “Taravatu dekenai umui duahia lasi, a, Sabati dinana dekenai dubu naria taudia ese Sabati dinana ena taravatu idia makohia, to idia be kerere lasi?” Oibe, Sabati dinana ai, dubu dekenai hahelaga taudia ese animal idia aladia mase bona ma gaukara haida idia karaia idia bouboulaidia totona! Iesu ia gwau: “Umui lau hamaoroa, iniseniai tau ta be Dubu Helaga ia hanaia.”

Iesu ese Farisea taudia ia sisiba henidia, ia gwau: “Inai hereva umui laloa, ‘Lau be bogahisihisi henia kara lau ura, boubou gauna be lau laloa lasi.’ Bema inai hereva ena anina umui diba, umui be kerere lasi taudia do umui gwauraia kerere diba lasi. Badina be Taunimanima ena Natuna be Sabati ena biaguna.” Iesu ese ena maino lohia negana, lagani 1,000 ai Basileia lalonai do ia lohia negana, ia gwauraia unai.

Lagani 6,000 lalodiai taunimanima ese Satana Diabolo ena hesiai gaukarana idia hekwarahilaia noho, bona dagedage bona tuari idia vara noho ema bona hari. To unai hisihisi bona dagedage amo do idia laga-ani, Keriso be Sabati negana badana lalonai do ia lohia neganai. Mataio 12:​1-8; Levitiko 24:​5-9; 1 Samuel 21:​1-6; Numera 28:9; Hosea 6:6.

▪ Dahaka dainai Iesu ena hahediba taudia idia samanidia, bona Iesu be edena bamona ia haere henidia?

▪ Iesu ia gwau Farisea taudia edia lalohadai kererena be dahaka?

▪ Edena dala amo Iesu be “Sabati ena biaguna”?