Karoa 29

Sabati ai Kara Namo Ia Karaia

GUNA, hua haida idia lao vadaeni, Iesu ese Iudea ia rakatania bena Galilea ia lao henia noho neganai, Samaria dekenai ia ese hahine ta ia hereva henia ranu gurina ta dekenai.

Galilea dekenai ia haroro momo, bena lagani 31 C.E. lalonai, Paseka dinana be kahirakahira neganai, Iudea dekenai ia giroa lou, unuseniai dubu lalodiai ia haroro. Ena haroro gaukarana Galilea ai be Baibel ese ia herevalaia momo, to Paseka gunana murinai bona lagani 31 C.E. ai Iudea lalonai ia karaia karadia ia herevalaia momo lasi. Badina be Galilea taudia momo ese ena hereva idia abia dae, to Iudea taudia haida sibodia ese.

Iesu be Iudea ena hanua badana, Ierusalem, dekenai ia lao, lagani 31 C.E. ena Paseka Ariana totona. Unuseniai digu gohuna ta ladana Betesata ia noho. Gorere taudia, matakepulu taudia, aena dika taudia bona imana dika taudia momo be unuseniai idia lao, badina idia laloa gohu ena ranu ia marere neganai bema ranu dekenai idia diho do idia namo lou.

Sabati dinanai, Iesu ese unuseniai tau ta ia itaia, ena gorere laganidia be 38. Iesu ia diba lagani momo lalodiai ia gorere noho, unai dainai ia nanadaia, ia gwau: “Oi be mauri oi ura, a?”

Ia haere, ia gwau: “Lohiabada e, ranu ia marere neganai, ranu dekenai lau ia atoa diho tauna be lasi, gohu dekenai lau diho gwauraia neganai tau ta ia guna vadaeni.”

Iesu ese ia hereva henia, ia gwau: “Oi toreisi, oiemu geda oi lokua, oi raka.” Vadaeni, ena tauanina ia goada haragaharaga, ia tore isi, ena geda ia lokua, ia raka matamaia!

To Iuda taudia ese idia itaia neganai, idia gwau: “Inai be Sabati. Oiemu geda oi abia loaloa be mai taravatu.”

Ia haere henidia, ia gwau: “Lau ia hanamoa tauna ese ia hereva henia lau dekenai, ia gwau, ‘Oiemu geda oi lokua, oi raka.’ ”

Bena idia nanadaia, idia gwau: “Daika ese ia hanamoa oi, ia gwau, ‘Oiemu geda oi lokua, oi raka’?” Iesu be ia raka oho vadaeni, bona unai tau be ena ladana ia diba lasi. To gabeai, Dubu Helaga lalonai Iesu ese ia davaria lou neganai, ia diba daika ese ia hamauria.

Vadaeni unai tau ia lao, Iuda taudia ia hamaorodia ia hamauria tauna be Iesu. Unai idia kamonai neganai, idia lao Iesu dekenai. Idia gwau henia badina be Sabati dinana ai kara namodia ia karaia. Idia dagedage henia matamaia danu! Luka 4:44; Ioane 5:​1-16.

▪ Iesu ese Iudea ia vadivadi henia bena hua hida murinai ma ia vadivadi henia lou?

▪ Dahaka dainai taunimanima momo be Betesata Gohuna dekenai idia lao?

▪ Unuseniai Iesu ese dahaka hoa karana ia karaia, bona unai dainai Iuda taudia be edena bamona idia kara henia?