Karoa 19

Samaria Hahinena Ia Hadibaia

IESU bona ena hahediba taudia ese Iudea idia rakatania, bena Galilea idia lao henia noho lalonai, Samaria tanona ai idia raka hanai. Edia tauanina idia manoka, laolao dainai, bena dina tubua ai ranu gurina ta badinai idia helai diho, Sukara hanuana kahirakahira dekenai. Lagani handred momo gunanai Iakobo ese unai guri ia geia, bona ia do noho ema bona hari.

Iesu be unuseniai ia laga-ani neganai, ena hahediba taudia idia lao hanua, aniani hoia totona. Samaria hahinena ta be ranu utua totona ia mai neganai, Iesu ese ia noia, ia gwau: “Ranu sisina oi henia lau dekenai.”

Iuda bona Samaria taudia idia hetura heheni lasi, badina idia badu heheni dainai. Unai dainai hahine ia hoa, ia gwau: “Badina be dahaka? Oi be Iuda tauna, lau be Samaria hahine, ma lau dekenai ranu oi noia, a?”

Iesu ese ia haere henia, ia gwau: “Bema oi diba . . . ranu sisina oi dekenai ia noinoi tauna be daika, oi ese do oi noia, vadaeni ia ese mauri ranuna do ia henia oi dekenai.”

Hahine ia gwau: “Tau badana e, oi be mai emu ranu utua gauna lasi, bona guri be ia dobu. Inai mauri ranuna be edeseni amo do oi abia? Oi ese aiemai sene tauna Iakobo oi hanaia, a? Ia ese inai ranu guri ia henia ai dekenai.”

Iesu ma ia haere, ia gwau: “Inai ranu do idia inua taudia ibounai be do idia ranu mase lou. To lau ese do lau henia ranuna do ia inua tauna be do ia ranu mase lasi ia lao bona hanaihanai. Lau ese do lau henia ranuna be inai tau lalonai sinavai bamona do ia aru noho, bona mauri ranuna do ia henia. Ma mauri hanaihanai danu do ia henia.”

Hahine ia gwau: “Tau badana e, mani unai ranu oi henia lau dekenai, vadaeni do lau ranu mase lou lasi, bona ranu utua totona danu iniseniai do lau mai lasi.”

Iesu ia gwau: “Oi lao, oiemu adavana oi boiria, umui ruaosi do umui mai.”

Hahine ia haere, ia gwau: “Lau be mai egu adavana lasi.”

Iesu ia gwau: “Oiemu hereva ia maoro vadaeni, oi gwau, ‘Lau be adavana lasi,’ badina oiemu adavana be 5 oi abia vadaeni, bona harihari oi abia tauna be oiemu adavana lasi.”

Ena hereva dainai hahine ia hoa, bena ia gwau: “Tau badana e, harihari lau diba vadaeni oi be peroveta tauna.” Ma ia gwau Samaria taudia be “inai ororo [ladana Gerisim] dekenai Dirava idia tomadiho henia, to [umui Iuda taudia] umui gwau be tomadiho gabuna momokani be Ierusalema dekenai sibona.” Unai amo ia hahedinaraia tomadiho ia laloa momo.

Iesu ia gwau taunimanima be edena gabu dekenai idia tomadiho be herevana. Ia gwau: “Nega ta do ia mai, . . . tomadiho taudia momokani ese mai Lauma bona mai momokani danu Tamana do idia tomadiho henia, badina be Tamana ese unai bamona idia tomadiho henia taudia ia tahua noho. Dirava be Lauma, bona do idia tomadiho henia taudia ese lauma bona momokani dekena amo do idia tomadiho henia.”

Hahine ese ena hereva ia laloa bada. Ia gwau: “Lau diba Mesia, Keriso idia gwauraia tauna, be do ia mai, bona do ia mai neganai ia ese gau ibounai do ia gwauraia hedinarai.”

Iesu ese ia hamaoroa, ia gwau: “Tauna be lau inai.” Mani inai oi laloa: Hari hahine be dina tubua ai ranu utua totona ia mai, reana badina be hanua hahinedia ese ena kara idia badulaia dainai ia ura lasi idia be ia ida do idia hedavari. To unai neganai Iesu ese ia hamaoroa ia be Mesia, ma taunimanima ta ia do hamaoroa lasi herevana unai.

Samaria Taudia Momo Idia Abidadama Henia

Bena hahediba taudia be Sukara amo idia lou mai neganai, Iesu be ranu gurina dekenai idia davaria, Samaria hahinena ta ia hereva henia noho. Idia ginidae neganai, hahine be ena hodu ia rakatania, hanua dekenai ia lao.

Iesu ena hereva ia laloa bada dainai, hanua tataudia ia hamaorodia, ia gwau: “Umui mai, tau ta umui itaia, egu kara ibounai ia ese ia gwauraia hedinarai.” Bena edia lalona ania totona ia gwau: “Dahaka umui gwau, ia be Keriso o?” Unai henanadai dainai idia lao Iesu idia itaia totona.

Iesu ena hahediba taudia ese idia doria, hanua amo idia mailaia anianina ia ania totona. To ia hamaorodia, ia gwau: “Lau be mai egu aniani, umui diba lasi gauna.”

Idia henanadai heheni, idia gwau: “Tau ta ese ena aniani ia mailaia vadaeni o?” To Iesu ia gwau: “Egu aniani be inai, lau ia siaia Dirava ena ura do lau karaia, iena gaukara do lau karaia haorea momokani. Umui be mai emui hereva ta, ani, umui gwau, ‘Hua 4 do idia ore murinai, uiti utua negana do ia ginidae.’ ” Bena Iesu ese lauma uitina haboua negana ia gwauraia, ia gwau: “Emui matana umui abia isi, uma gabu umui itaia, anina be idia auka bona mage vadaeni, utua nega danu ia hegeregere. Utua tauna ese ena davana ia abia, vadaeni anina ia haboua, mauri hanaihanai gauna. Unai dainai, hadoa tauna bona utua tauna be do idia moale hebou.”

Reana Iesu ia diba vadaeni, Sukara hanua taudia momo ese ia idia abidadama henia, Samaria hahinena ena hereva dainai. Hahine ena hereva dainai hanua tataudia be ranu guri dekenai idia lao bona Iesu idia noia idia dekenai do ia noho; bena dina rua unuseniai ia noho.

Samaria taudia ese Iesu ena hereva idia kamonai henia neganai, idia momo ese idia abidadama henia. Unai murinai unai hahine dekenai idia gwau: “Ai be oiemu hereva dainai ai abidadama lasi ia dekenai, to badina ai sibona ena hereva ai kamonai, bona hari ai diba ia be momokani tanobada ena Hamauria Tauna.” Unai Samaria hahinena ia karaia hegeregerena, namona be taunimanima edia lalona ita ania, Keriso ena sivarai idia tahua totona!

Unai be November eiava December lalonai ia vara bena hua 4 idia ore murinai bali utua negana ia ginidae, Palestine ena gara lou negana lalonai. Unai dainai ita diba, lagani 30 C.E. ena Paseka Ariana murinai, hua 8 bamona lalodiai, Iesu bona ena hahediba taudia be hadibaia bona bapatiso karadia idia karaia Iudea dekenai. Bena unai murinai edia provinsi korikorina, Galilea, dekenai idia lou lao. Ioane 4:​3-43.

▪ Dahaka dainai Samaria hahinena ia hoa, Iesu ese ia hereva henia neganai?

▪ Iesu ese mauri ranuna bona tomadiho gabudia edena bamona ia hadibalaia?

▪ Edena dala amo Iesu ese ia hadibaia ia be Keriso, bona dahaka dainai unai be hoa gauna?

▪ Unai Samaria hahinena ese dahaka sivarai ia harorolaia, bona unai dainai dahaka ia vara?

▪ Uiti utua gaukarana bona Iesu ena aniani be edena bamona ita hahegeregeredia diba?

▪ Edena bamona ita diba lagani 30 C.E. ena Paseka Ariana murinai Iesu be hua 8 bamona lalodiai Iudea dekenai ia haroro?