Karoa 73

Samaria Tauna Namona

IESU be Betania kahirakahira dekenai ia noho; unai hanua bona Ierusalem edia padana be kilomita toi bamona. Vadaeni, Mose ena Taravatu ia diba momo tauna be Iesu dekenai ia mai, ia nanadaia, ia gwau: “Hadibaia tauna e, lau be edena bamona do lau karaia mauri hanaihanai abia totona?”

Iesu be mamina ia abia, unai loea ese diba ia tahua lasi, to Iesu ia dibagania. Reana ia ura ena henanadai amo Iesu do ia veria, Iuda taudia edia lalona hahisia herevana ta do ia gwauraia totona. Unai dainai, unai tau ese ena lalohadai do ia gwauraia hedinarai totona, Iesu ese ia nanadaia, ia gwau: “ Taravatu ena buka lalonai edena bamona ia torea? Edena bamona oi duahia?”

Unai tau be mai ena lalo-parara, unai dainai Dirava ena taravatu Deuteronomi 6:5 bona Levitiko 19:18 ai ia gwauraia, ia gwau: “ [Iehova] oiemu Dirava dekenai do oi lalokau henia mai emu lalona ibounai, mai emu lauma ibounai, mai emu goada ibounai, mai emu laloa ibounai. Bona, oiemu badibadinai tauna dekenai oi lalokau henia, oi sibona dekenai oi lalokau henia hegeregerena.”

Iesu ia gwau: “Oiemu haere be ia maoro. Unai bamona do oi karaia be do oi mauri.”

Ia ese Iesu ena hereva ia moalelaia momokani lasi. Ia ura Iesu ese do ia hamaoroa iena lalohadai be maoro bona unai dainai ia be kara maoromaoro tauna. Unai dainai, ia nanadaia, ia gwau: “Lauegu badibadinai tauna be daika?”

Iuda taudia idia gwau Levitiko 19:18 ena hereva hegeregerena, inai hereva “badibadinai tauna” ena anina be sibodia edia bese taudia mo. Gabeai, aposetolo Petro ia gwau: “Umui diba Iuda taudia be idau bese taudia danu idia noho hebou eiava vadivadi hebou be mai taravatu.” Unai dainai, unai tau, bona reana Iesu ena hahediba taudia danu, idia laloa sibodia edia bese taudia mo, Iuda taudia, bema idia kara namo henidia, idia be kara maoromaoro taudia, badina idau bese taudia be edia badibadinai taudia lasi.

Edena bamona Iesu ese idia kamonai taudia edia lalohadai ia hamaoromaoroa diba, to edia lalona ia hahisia lasi? Sivarai ta ia hamaorodia, ia gwau: “ Tau ta Ierusalema dekena amo Ieriko dekenai ia lao neganai henaoa taudia haida ese idia davaria. Vadaeni ena dabua idia dadia, idia botaia, kahirakahira ia mase, vadaeni idia rakatania.”

Iesu ma ia gwau: “Dubu ena naria tauna ta be unai dala dekenai ia raka lao, unai tauna ia itaia, to kahana dekenai ia raka hanaia. Levi ena orea tauna ta danu unai bamona, unai gabu dekenai ia ginidae, ia itaia, to ma kahana dekenai ia raka hanaia. To Samaria tauna unai dala ia raka, unai gabu dekenai ia ginidae, ia itaia. Vadaeni ia bogahisihisi henia.”

Hahelaga taudia bona edia heduru taudia, Levi taudia, be Ieriko ai idia noho, to Ierusalem dekenai dubu lalonai idia gaukara. Unai hanua ruaosi edia padana be kilomita 23, bona dala ia dika badina unai be ororo kahana. Dala dekenai dika ia davaria Iuda tauna ta idia davaria neganai, namona be idia durua. Madi idia durua lasi, to Samaria tauna ese. Iuda taudia ese Samaria taudia idia inai henidia dikadika, unai dainai vanegai Iesu idia gwauraia “Samaria tauna,” idia hadikaia totona.

Samaria tauna ese Iuda tauna edena bamona ia durua? Iesu ia gwau: “Ia dekenai ia lao, dehoro bona uaina dekena amo ena bero ia huria, ia kumia. Vadaeni ena doniki dekenai ia atoa, durua henia rumana dekenai ia abia lao, bona unai gabu dekenai ia naria. Dabai ia toreisi, siliva moni rua ia abia, ruma biaguna dekenai ia henia, ia gwau, ‘Do oi naria namonamo, bema dahaka dahaka do oi henia davana lasi, do lau giroa mai neganai edia davana do lau henia oi dekenai.’ ”

Unai sivarai ia gwauraia murinai, Iesu ese unai loea ia nanadaia, ia gwau: “Oi be dahaka oi gwau? Idia toiosi daika be dadia taudia ese idia haberoa tauna ena badibadinai tauna do ita gwauraia?”

Ia ura lasi Samaria tauna ia gwauraia namo, unai dainai ia haere, ia gwau: “Ia bogahisihisi henia tauna.”

Vadaeni Iesu ia gwau: “Oi lao, oi danu unai bamona do oi karaia.”

Bema Iesu ese unai loea ia hamaoroa idau bese taudia danu be ena badibadinai taudia, unai hereva do ia abia dae lasi, bona idia kamonai taudia ese ena hereva do idia durua reana. Unai sivarai ese ia hahedinaraia goevagoeva, iseda badibadinai taudia be sibona eda bese taudia mo lasi, to idau bese taudia danu. Iesu ena hadibaia dalana be namo herea momokani, ani? Luka 10:​25-37; Kara 10:28; Ioane 4:9; 8:48.

▪ Loea ese Iesu dahaka ia nanadailaia, bona dahaka dainai ia nanadaia?

▪ Iuda taudia idia gwau edia badibadinai taudia be daidia, bona dahaka dainai ita gwau hahediba taudia danu be unai bamona idia laloa?

▪ Edena dala amo Iesu ese lalohadai maorona ia hahedinaraia bena loea ese ia gorea diba lasi?