Karoa 63

Sisiba Ma Haida

IESU bona ena aposetolo be ruma lalonai Kaperanaum ai idia do noho neganai, aposetolo edia hepapahuahu sibona lasi, to ma gau ta danu idia herevalaia. Reana unai gau ia vara, Kaperanaum dekenai idia lou lao murinai, Iesu be idia ida ia noho lasi neganai. Aposetolo Ioane be Iesu dekenai ia gwau: “Tau ta ai itaia oiemu ladana dekenai lauma dikadia ia lulua, to ia be iseda kahana tauna lasi. Unai dainai iena gaukara ai hadokoa, badina be ia be iseda kahana tauna lasi.”

Ioane ia laloa aposetolo sibodia be mai edia maoro taunimanima idia hanamodia. Unai dainai, ia laloa unai tau be edia orea tauna lasi dainai, siahu karadia ia karaia be maoro lasi.

To, Iesu ese ia sisiba henia, ia gwau: “Hadokoa lasi, badina bema tau ta siahu kara lauegu ladana dekenai ia karaia, be nega sisina murinai hereva dika dekenai lauegu ladana ia hadikaia diba lasi. Daika ia ura lasi hadikaia ita, ia be iseda kahana durua tauna. Daika ranu taina ia henia umui dekenai lau dainai, badina umui be Keriso ena, momokani lau hamaoroa umui, unai tau ese davana namona do ia halusia lasi.”

Ena be unai tau ese Iesu ia bamoa lasi, to ena kahana durua tauna ai ia lao diba. Unai neganai Iesu ese Keristen kongregesen ia do haginia lasi, unai dainai ena be unai tau be edia orea tauna lasi, to ia be orea idauna tauna lasi. Iesu ena ladana ia abidadama henia dainai, lauma dikadia ia luludia diba. Unai dainai Iesu ia gwau iena gaukara ena davana namona do ia halusia lasi.

To bema unai tau be aposetolo edia hereva bona edia kara dainai ia hekwakwanai, unai be dika herea! Iesu ia gwau: “Bema tau ta, lau dekenai abidadama henia mero maragina ta ia hakererea, unai tau ena aiona dekenai nadi badana idia kwatua, bona unai tau idia negea diho davara dekenai be ia namo.”

Iesu ia gwau, ia murinai idia raka taudia edia imana o edia aena o edia matana ese bema ia hahekwakwanaidia, namona be edia mauri amo idia negea. Namo Dirava ena Basileia lalonai idia vareai mai edia gau lasi, dika mai edia gau Gehena ai idia negedia diho. Iesu ena negai, Gehena be momoru gabua gabuna Ierusalem kahirakahira dekenai, mase hanaihanai ia laulaulaia gabuna.

Iesu ma ia gwau: “Umui naria namonamo, inai bamona mero maragi ta do umui ura lasi o lulua garina. Badina be umui lau hamaoroa, guba dekenai inai maragidia idia naria anerudia be hanaihanai lauegu Tamana ena vairana idia itaia noho.” Bena “inai maragidia” edia namo hahedinaraia totona, parabole ta ia gwauraia. Ia gwau, tau ta be mai ena mamoe 100, to ta ia boio. Mamoe 99 ia rakatanidia bena ia boio gauna ia tahua. Ia davaria neganai ia moalelaia bada, 99 ia moalelaidia maragi. Bena Iesu ia gwau: “Unai bamona, emui Tamana guba dekenai ia noho be ia ura lasi inai bamona maragina ta do ia mase.”

Vadaeni, Iesu ese aposetolo ia hamaorodia, ia gwau: “Umui emui lalona dekenai damena umui abia, bona maino dekenai umui noho hebou.” Unai bamona ia hereva edia hepapahuahu ia laloa dainai reana. Damena ese aniani ena mamina ia hanamoa. Unai hegeregerena, bema ta ena hereva be mai ena mamina namona, ia kamonai tauna ese ia abia dae haraga diba, bena edia maino do ia doko lasi.

To taunimanima idia goevadae lasi dainai, nega haida hepapahuahu idia vara, unai dainai Iesu ena sisiba be inai: “Oiemu tadikakana ese kara dikana bema ia karaia oi dekenai, do oi lao ia dekenai, ena kerere do oi hedinaraia, umui ruaosi sibona do umui herevalaia. Bema oiemu hereva ia kamonai henia neganai, oi be oiemu tadikakana ena lalona oi hamaoromaoroa vadaeni. To bema oiemu hereva ia kamonai lasi, tau ta, o tau rua danu do umui lao, vadaeni oiemu samani hereva do oi hamomokania inai taudia edia vairana dekenai.”

Iesu ia gwau, bema unai kara be hegeregere lasi, “ekalesia ena hebou,” kongregesen ena elda taudia, oi hamaorodia bena idia hahemaoro henia diba. Iesu ia gwau, bema kerere tauna ese edia hereva ia kamonai lasi, “oi dekenai idau bese tauna o takisi gogoa tauna hegeregerena do oi halaoa.”

Elda taudia idia hahemaoro neganai, namona be Iehova ena Hereva idia badinaia momokani. Bema idia davaria ta ena kerere dainai matahakani ia abia be namo, unai hahemaoro be Dirava ese ‘guba ai danu ia guia vadaeni.’ To bema ia kerere lasi dainai idia ‘ruhaia,’ ‘guba ai danu ia ruhaia vadaeni.’ (NW) Iesu ese unai bamona hahemaoro karadia ia herevalaidia, ia gwau: “Bema lauegu ladanai tau rua o toi idia hebou gabu ta dekenai, lau danu be idia dekenai lau noho.” Mataio 18:​6-20; Mareko 9:​38-50; Luka 9:​49, 50.

▪ Dahaka dainai, ena be unai siahu karadia ia karaia tauna ese Iesu ia bamoa lasi, to ia kerere lasi?

▪ ‘Memero maragidia’ hahekwakwanaidia karana ena dika ena bada be edena bamona, bona Iesu ese edia namo edena bamona ia parabolelaia?

▪ Reana dahaka dainai Iesu ese ena aposetolo ia hagoadadia, damena be idia lalodiai idia abia totona?

▪ ‘Guia’ bona ‘ruhaia’ ena anina be dahaka?