Karoa 93

Taunimanima ena Natuna Do Ia Hedinarai Dinana

IESU be mirigini kahanai (Samaria dekenai o Galilea dekenai) ia noho neganai, Farisea taudia ese idia nanadaia, Dirava ena Basileia be edena nega ai do ia mai. Idia laloa ia be mai ena hairai bada ida do ia mai, to Iesu ia gwau: “Dirava ena Basileia do ia mai lasi, taunimanima ese edia matana amo idia itaia gauna bamona. Bona ta do ia gwau lasi, ‘Itaia, gauna inai,’ o, ‘Gauna unai,’ badina Dirava ena Basileia be umui bogaraginai ia noho.” (NW)

Baibel haida lalodiai Iesu ena hereva be inai bamona idia torea: “emui lalona dekenai.” Unai dainai haida idia laloa Dirava ena Basileia be ena hesiai taudia edia kudoudia lalodiai ia lohia. To, Dirava ena Basileia be Iesu ese ia hereva henidia taudia edia kudoudia lalodiai ia noho lasi, kamonai lasi Farisea taudia unai. To, ia be idia bogaragidiai ia noho, badina be Dirava ena Basileia ena King, Dirava ese ia abia hidi tauna, Iesu Keriso, be idia bogaragidiai ia noho.

Farisea taudia idia raka oho murinai, Iesu be Basileia ena mai ia herevalaia ena hahediba taudia dekenai. Ia be Basileia ena siahu do ia abia negana ia laloa, bena ia gwau: “Haida be do idia gwau, ‘Tauna inai,’ o ‘Tauna unai.’ To umui be do umui lao lasi, [Mesia koikoidia] edia murinai do umui raka lasi. Badina be kevaru guba ena kahana dekenai ia abia isi ia lao bona guba ena kahana dekenai bamona, Taunimanima ena Natuna ese ena mai neganai be unai bamona do ia karaia.” Unai amo Iesu ese ia hahedinaraia, kevaru ia kevaru isi neganai gabu momo ai idia noho taudia idia itaia diba hegeregerena, Iesu be Basileia ena siahu ida do ia ginidae neganai, unai idia ura itaia taudia iboudiai ese ena toana do idia itaia goevagoeva.

Bena Iesu ese idaunegai idia vara gaudia edia sivarai ia gwauraidia, unai amo ia hahedinaraia do ia lou mai neganai, taunimanima edia lalohadai be edena bamona. Ia gwau: “Noa ena nega bamona, Taunimanima ena Natuna ena nega be unai bamona do ia karaia. . . . Lota ena nega dekenai danu unai bamona sibona ia karaia. Idia aniani, idia inuinu, idia hoihoi, idia hadohado, ruma idia karaia. To Lota be Sodoma dekena amo ia raka siri dinanai lahi bona nadi siahu guba dekena amo idia moru, ibounai ia alaia ore. Taunimanima ena Natuna do ia hedinarai dinanai danu unai bamona kara do ia vara.”

Iesu ia gwau lasi, Noa ena negai bona Lot ena negai idia noho taudia idia mase, badina be vaia taunimanima edia kara hegeregeredia idia aniani, idia inuinu, idia hoihoi, idia hadohado, bona ruma idia karaia dainai. Lasi. Noa bona Lot bona edia ruma bese taudia danu be unai bamona idia karaia. To unai taudia idia mase badina Dirava ena ura idia laloa lasi. Unai badina dainai, taunimanima do idia mase, Keriso be hisihisi badana neganai do ia hedinarai dinanai danu.

Iesu ia hahedinaraia, Basileia siahuna ia abia vadaeni toana do ia hedinarai neganai, namona be taunimanima idia kara haraga; ia gwau: “Unai dinanai, bema tau ta ruma ena atai dekenai ia noho, ia be ruma ena lalona dekenai do ia raka vareai lasi, ena kohu abia totona. Bona tau ta bema uma dekenai, ia be hanua dekenai do ia giroa lou lasi. Lota ena adavana umui laloa.”

Unai toa do ia hedinarai neganai, namo lasi taunimanima ese edia kohu idia laloa bada dainai idia kara haraga lasi. Sodom ia rakatania neganai, Lot ena adavana ese ia rakatania gaudia ia lalodia dainai ena vairana ia giroa, bena damena nadina ai ia lao.

Iesu do ia lou mai neganai do idia vara gaudia ma haida be ia ese ia herevalaidia, ia gwau: “Unai hanuaboi dekenai tatau rua geda tamona dekenai do idia hekure. Ta do ia abia siri, ta be do ia noho. Hahine rua ese uiti makohia maragimaragi nadina do idia giroa be ta do ia abia siri, ta be do ia noho.”

“Ta do ia abia siri” be Noa bona ena ruma bese be lagatoi lalonai idia vareai hegeregerena, bona aneru ese Lot bona ena ruma bese be Sodoma amo ia hakaudia lasi hegeregerena. Anina be, hahemauri do ia davaria. To ia abidia siri lasi taudia be do idia mase ore.

Bena hahediba taudia ese idia nanadaia, idia gwau: “Lohiabada e, inai be edeseni do ia vara?”

Iesu ia haere, ia gwau: “Mase tauanina ia noho gabuna dekenai galo manudia do idia haboua.” Hahemauri do idia abia totona do ia “abia siri” taudia be gabu daudauna amo idia itaia diba manudia bamona, “mase tauanina” dekenai idia hebou. Unai “tauanina” ese ia laulaulaia gaudia be inai: Keriso korikorina, Basileia ena siahu ida ia lou mai vadaeni neganai, bona Iehova ese ia karaia lauma ariana. Luka 17:​20-37; Genese 19:26.

▪ Basileia be Farisea taudia bogaragidiai ia noho ena anina be dahaka?

▪ Edena dala amo Keriso ena mai be kevaru bamona?

▪ Badina be dahaka taunimanima do idia mase, Keriso ena lou mai neganai idia karaia karadia dainai?

▪ “Ta do ia abia siri” bona “ta be do ia noho,” anina be dahaka?