Karoa 90

Toreisi Lou Helarona

LASARO ia mase bona idia guria, bena dina momo lasi murinai Iesu be Betania dekenai ia ginidae; unai hanua bona Ierusalem edia padana be kilomita toi bamona. Lasaro ena taihudia ruaosi, Maria bona Mareta, idia do lalohisihisi bada, bona taunimanima momo be edia ruma dekenai idia lao edia lalona hanamoa totona.

Ta ese Mareta ia hamaoroa Iesu ia mai noho. Ena tadina ia hadibaia lasi, to maoromaoro ia lao Iesu hedavari henia totona. Ia davaria neganai ia hamaoroa, ia gwau: “Lohiabada e, bema oi noho iniseni be lauegu taihuna ia mase lasi.” Lasaro ia mase murinai Mareta bona ena tadina be unai idia herevalaia loulou vadaeni.

Mareta ena helaro be Iesu ese kara ta ena taihuna totona do ia karaia, unai dainai ia gwau: “Lau diba vadaeni inai harihari Dirava dekenai oi noinoi gauna be Dirava ese do ia henia oi dekenai.”

Iesu ia gwau: “Oiemu taihuna be do ia toreisi lou.”

Mareta ia laloa Iesu ese gabeai tanobada ai do ia vara toreisi-louna ia herevalaia, Abraham bona Dirava ena hesiai taudia momo ese idia naria gauna unai. Unai dainai ia gwau: “Lau diba dina gabeai, toreisi lou dinana neganai, do ia toreisi lou.”

To Iesu ese ia vara gwauraia gauna ia herevalaia. Ia gwau: “Toreisi lou be lau inai, mauri danu be lau.” Ia be mai ena siahu mase do ia hadarerea, unai dainai Mareta ia hamaoroa, ia gwau: “Lau dekenai ia abidadama henia tauna, ia be do ia mase, to do ia mauri lou. Idia mauri noho bona idia abidadama henia lau dekenai taudia ibounai be do idia mase lasi.”

Iesu ena hereva Mareta dekenai ena anina be inai lasi: Unai neganai idia noho kamonai taudia be do idia mase lasi. Lasi, to ena hereva ena anina be inai: Iesu idia abidadama henia taudia be mai edia dala mauri hanaihanai do idia abia. Unai mauri do idia abia taudia momo be “dina gabeai” mase amo do idia toreisi lou neganai do idia abia. To ma kamonai taudia haida be Iesu ena hereva hegeregerena do idia mase lasi, badina inai tanobada oromana ena dokona amo do idia roho mauri. Unai hoa herevana ia gwauraia murinai, Iesu ese Mareta ia nanadaia, ia gwau: “Inai hereva oi abia dae, a?”

Ia haere, ia gwau: “Lohiabada e, oibe. Lau abia dae momokani vadaeni, oi be Keriso, Dirava ena Natuna, guna idia gwauraia tanobada dekenai do ia mai tauna.”

Bena ia lao haraga, ena tadina ia boiria hehuni, ia gwau: “Hadibaia tauna be ia mai vadaeni, ia boiria oi dekenai.” Maria ia toreisi haragaharaga, ia raka lasi. Ruma lalonai idia noho taudia idia laloa gara gabuna dekenai ia lao, unai dainai idia gavaia.

Maria be Iesu dekenai ia ginidae neganai, ena aena badinai ia goru diho. Mai ena taitai ida ia gwau: “Lohiabada e, iniseni bema oi noho be egu taihuna ia mase lasi.” Maria bona ia ida idia raka hebou taudia idia tai be Iesu ese ia itaia neganai, ena lalona ia hisihisi bada. Bena ia nanadaidia, ia gwau: “Edeseni umui atoa?”

Idia haere, idia gwau: “Lohiabada e, oi mai, oi itaia.”

Iesu danu ia tai, bena Iuda taudia idia gwau: “Umui itaia, ia ese ia lalokau henia bada.”

Haida idia laloatao, hua haida idia ore vadaeni, Dubu Hahelagaia Ariana neganai, Iesu ese tau matamatana ta, matakepulu ai ia vara tauna, ia hamauria. Unai dainai idia gwau: “Inai matakepulu ena matana ia kehoa tauna be unai tau ena mase koua dalana be ia diba lasi, a?” Ioane 5:21; 6:40; 9:​1-7; 11:​17-37.

▪ Iesu be edena negai Betania ai ia ginidae, bona dahaka be unuseniai ia vara vadaeni?

▪ Dahaka dainai Mareta ia diba mase taudia do idia toreisi lou?

▪ Lasaro ia mase dainai, Iesu ena lalona ena mamina be edena bamona?