Karoa 36

Tuari Biaguna ta ena Abidadama Bada

IESU be ororo ai ia haroro neganai, lagani ta bona hua 9 sibodia idia do noho ela bona ena gaukara tanobada ai do ia hagugurua.

Ororo ai ia haroro murinai, Kaperanaum hanuana ia lou henia. Unuseniai Iuda ena tau badadia be Iesu dekenai idia lao, idia noinoi henia, badina be Roma tuari biaguna ta, idau bese tauna, ese ia siaidia dainai.

Ia lalokau henia hesiai tauna be gorere dikana dainai ia mase gwauraia, bona ia ura Iesu ese do ia hamauria. Iuda taudia be tuari biaguna dainai idia noinoi lalo-dika; idia gwau: “Ia be tau namona, unai bamona bema oi karaia be ia namo, badina be ia ese iseda bese dekenai ia ura henia, bona aiemai dubu ia sibona ese ia haginia.”

Kara haraga Iesu be idia ida idia lao. To, ruma dekenai idia raka kahirakahira neganai, tuari biaguna ese ena turadia haida ia siaidia, Iesu vairanai idia lao, idia gwau: “Lohiabada e, oi hekwarahi lasi, lau be namo lasi egu ruma dekenai do oi daekau, unai dainai do lau mai lasi oi dekenai be ia namo.”

Hari tuari biaguna ese tuari taudia ia oda henidia hanaihanai, to manau herevadia ia gwauraidia unai, ani? Ia be idau bese tauna dainai reana ia ura lasi Iesu do ia hahekwarahia, badina Iuda taudia ese idau bese taudia idia bamodia be taravatu. Nega ta Petro ia gwau: “Umui diba Iuda taudia be idau bese taudia danu idia noho hebou eiava vadivadi hebou be mai taravatu.”

Reana tuari biaguna ia ura lasi Iesu ese unai taravatu ia utua dainai dika do ia davaria, unai dainai ena turadia ia hamaorodia Iesu dekenai do idia gwau: “Mani oi hereva sibona, vadaeni egu hesiai tauna be do ia mauri. Badina lau danu be haida edia henuna dekenai, bona tuari taudia be lauegu henuna dekenai. Ta do lau hamaoroa, ‘Oi lao,’ vadaeni ia lao. Ma ta do lau hamaoroa, ‘Oi mai,’ vadaeni ia mai. Ma lauegu hesiai tauna do lau hamaoroa, ‘Inai oi karaia,’ vadaeni do ia karaia.”

Iesu ese ena hereva ia hoalaia, ia gwau: “Abidadama inai bamona Israela dekenai lau davaria lasi, lasi bona lasi momokani.” Iesu ese tuari biaguna ena hesiai tauna ia hamauria murinai, ia gwau, abidadama lasi Iuda taudia ese idia dadaraia hahenamodia be idau bese taudia mai edia abidadama ese do idia abidia.

Iesu ia gwau: “Taunimanima momo be dina daekau kahana amo bona dina diho kahana amo do idia mai, Aberahamo bona Isako bona Iakobo danu aniani totona do idia helai diho, Guba Basileia lalonai. To Basileia ena taudia korikori be do idia negea lao murimuri dekenai mai dibura masemase danu, unuseniai do idia tai, edia isena do idia koria auka masemase.”

“Basileia ena taudia korikori,” murimuri ena dibura ai idia negea taudia, be Iuda besena taudia korikoridia, Keriso ida do idia lohia hebou dagina idia dadaraia taudia. Abraham, Isako, bona Iakobo ese Dirava ena Basileia idia laulaulaia. Iesu ese ia hahedinaraia Dirava ese idau bese taudia be “Guba Basileia lalonai” do ia abidia dae. Luka 7:​1-10; Mataio 8:​5-13; Kara 10:28.

▪ Dahaka dainai Iuda taudia be idau bese tuari biaguna dainai idia noinoi?

▪ Dahaka dainai tuari biaguna ia ura lasi Iesu be ena ruma lalonai do ia vareai?

▪ Iesu ena hereva Mataio 8:​11, 12 ai edia anina be dahaka?