Karoa 78

Umui Noho Hegaegae!

IESU ese unai taunimanima hutuma bona ena hahediba taudia be unai bamona ia sisiba henidia murinai, ia gwau: “Orea maragi e, umui gari lasi, badina emui Tamana ese ia hereva vadaeni Basileia do ia henia umui dekenai.” Unai amo ia hahedinaraia taunimanima momo lasi (144,000) be guba ena Basileia lalonai do idia noho. Mauri hanaihanai do idia abia taudia hutuma be Basileia ena siahu henunai do idia noho tanobada dekenai.

“Basileia” be harihari gauna namo hereana! Iesu ese iena hahediba taudia ia hamaorodia, unai harihari gauna idia abia neganai edena bamona idia karaia be namo. Ia gwau: “Emui kohu do umui hoihoilaia, ogogami taudia dekenai do umui henia.” Oibe, namona be edia kohu, edia diba bona edia goada idia gaukaralaia, taunimanima be lauma dalana ai do idia durudia totona, unai amo edia “kohu guba dekenai [idia] haboua noho.”

Unai murinai ena hahediba taudia ia hamaorodia, namona be idia noho hegaegae do ia giroa mai negana totona. Ia gwau: “Emui rami do umui kwatua, bona emui lamepa do umui gabua, umui noho hegaegae. Edia biaguna dekenai idia naria noho taudia bamona umui noho hegaegae. Edia biaguna be headava aria dekena amo do ia giroa mai, do ia pidipidi, vadaeni iduara do idia kehoa haragaharaga. Bema biaguna do ia mai neganai do ia davaria ena hesiai taudia idia mahuta lasi, unai hesiai taudia do idia moale. Momokani lau hamaoroa umui dekenai, biaguna ese ena rami do ia kwatua, do ia hamaorodia aniani gabuna dekenai do idia helai, vadaeni edia hesiai gaukara ia ese do ia karaia.”

Inai parabole lalonai, hesiai taudia ese edia rami idia kwatudia, bena edia lamepa edia diari amo edia hesiai gaukara idia karaia noho ela bona hanuaboi momokani. Unai amo idia hahedinaraia idia noho hegaegae edia biaguna ia giroa mai neganai. Iesu ia gwau, bema edia biaguna be “hanuaboi ena huanai o daba kahirakahira neganai do ia mai, vadaeni ia davaridia idia noho hegaegae taudia be do idia namo.”

Edia biaguna ese dala idauna ta amo edia davana ia henidia. Ia hamaorodia aniani gabuna dekenai idia helai, bena ia kara henidia hesiai taudia bamona lasi to ena turadia namodia bamona. Edia biaguna idia naria noho negana lalonai hanuaboi ibounai idia gaukara noho dainai, unai davana namona idia abia! Unai murinai Iesu ia gwau: “Umui danu do umui hegaegae, badina be umui diba lasi negana dekenai Taunimanima ena Natuna do ia mai.”

Petro ese ia nanadaia, ia gwau: “Lohiabada e, inai parabole be ai sibona dekenai oi henia, o taunimanima ibounai danu?”

Iesu be ma parabole ta amo ia haere henia, ia gwau: “Kohu naria tauna mai ena kamonai bona mai ena kara maoromaoro, ena biaguna ese ia abia hidi, ena ruma do ia naria, bona aniani neganai ena hesiai taudia edia aniani do ia henia, tauna be daika? Ena biaguna do ia mai do ia davaria unai bamona ia karaia tauna be do ia moale. Momokani lau hamaoroa umui dekenai, ena kohu ibounai dekenai naria tauna biaguna ese do ia halaoa.”

Unai “biaguna” be Iesu Keriso. “Kohu naria tauna” be Iesu ena hahediba taudia ibounai edia “orea maragi,” bona “hesiai taudia” danu be unai taunimanima 144,000 ta ta iboudiai, guba ena Basileia do idia abia taudia unai. Unai “kohu,” kamonai tauna ese ia naria kohuna, be biaguna ena Basileia gaudia tanobada dekenai, Basileia ena siahu henunai tanobada ai do idia noho taudia danu.

Inai parabole lalonai, Iesu ia hahedinaraia unai hesiai oreana taudia haida do idia moru diba; ia gwau: “To bema unai kohu naria tauna ese inai bamona do ia laloa, do ia gwau, ‘Lauegu biaguna be do ia mai haraga lasi.’ Vadaeni hesiai taudia bona hahine do ia botaia, do ia aniani noho, do ia inuinu noho, bona do ia kekero. Unai tau be ia laloa lasi dinanai . . . ena biaguna do ia ginidae. Biaguna ese do ia utua maragimaragi.”

Iesu be ma ia gwau, ia mai dainai heiriheiri be Iuda taudia dekenai ia vara, badina haida ese ena hahediba herevadia idia abia dae bona haida be lasi. Lagani toi bamona gunanai, ranu lalonai ia bapatiso, to hari, mase lalonai ia bapatiso negana ena dokona be ia mai kahirakahira. Ia gwau: “Lauegu lalona do ia laga-ani diba lasi ela bona lau abia momokani.”

Iesu be unai bamona ia hereva ena hahediba taudia dekenai, bena hebou taudia ia hereva henidia lou. Ia lalohisihisi badina be, ena be ia hedinarai goevagoeva ia be Mesia, to unai idia abia dae lasi. Ia hamaorodia, ia gwau: “Umui be dina ia diho ena kahana dekenai ori korema umui itaia, umui gwau medu do ia diho, vadaeni ia diho. O laurabada kahana dekena amo lai ia mai neganai umui gwau dina do ia siahu, vadaeni ia siahu. Koikoi taudia, umui be guba bona tanobada edia toana be umui diba. To edena bamona, hari inai nega ena toana be umui diba lasi, a?” Luka 12:​32-59.

▪ “Orea maragi” taudia be hida, bona dahaka idia abia?

▪ Iesu be edena bamona ia hahedinaraia iena hesiai taudia idia noho hegaegae be gau badana?

▪ Iesu ena parabole lalonai, “biaguna,” “kohu naria tauna,” “hesiai taudia,” bona “kohu” be daidia?