Karoa 97

Vain Umana ai Idia Gaukara Taudia

IESU ia gwau: “Idia guna taudia momo be do idia gabeai, bona idia gabeai taudia momo be do idia guna.” Bena unai ia parabolelaia, ia gwau: “Guba Basileia be ruma biaguna ta bamona, dabai ia raka lao, gaukara taudia ia tahua, iena vain uma gabu dekenai idia gaukara totona.”

Ma ia gwau: “Biaguna be . . . idia dekenai ia gwauhamata, edia davana be dina ta kina tamona do ia henidia ia gwau. Vadaeni ena vain uma gabu dekenai idia ia siaia lao. . . . Dina tubua kahana bona adorahi kahana ma ia raka murimuri dekenai, haida ma ia davaria, ia siaidia. Adorahi kahana ma 5 okoloka bamona ia raka murimuri dekenai, ma haida idia gini kava neganai, ia itadia. Vadaeni ia nanadaia idia dekenai, ia gwau, ‘Badina be dahaka iniseni umui gini kava ia mai bona dina be kahirakahira ia diho?’ Idia haere, idia gwau, ‘Badina be tau ta ese ia boiria lasi ai dekenai.’ Vadaeni ia hamaorodia, ia gwau, ‘Umui danu lauegu vain uma gabu dekenai umui lao.’ ”

Ruma biaguna, uma biaguna unai, be Iehova Dirava, bona vain umana be Israel besena. Ia lalonai idia gaukara taudia be Taravatu ena kontraka lalonai idia vareai taudia, aposetolo edia negai idia noho Iuda taudia unai. Biaguna ese dina ibounai lalonai do idia gaukara taudia ia hamaorodia kina tamona do ia henidia, edia gaukara davana. To idia murinai idia gaukara matamaia taudia be dina ibounai idia gaukara lasi; haida be hora 9, haida hora 6, haida hora toi, haida hora tamona.

Dina ibounai, hora 12 unai, idia gaukara taudia ese Iuda gunalaia taudia idia laulaulaidia, nega ibounai tomadiho gaukaradia idia karaia. Iesu ena hahediba taudia be idau; edia mauri laganidia momo lalodiai haoda gaukarana eiava gaukara idauna ta idia karaia ela bona lagani 29 C.E. ai, “ruma biaguna” ese Iesu Keriso ia siaia do ia gogodia iena hahediba taudia ai do idia lao totona. Idia be 5 okoloka adorahi ai vain umana gaukarana hamatamaia taudia, “gabeai taudia,” bamona.

Unai gaukara dinana ia doko Iesu ia mase neganai; gaukara taudia ese edia moni idia abia negana unai. Gabe taudia ese edia moni idia abia guna. Iesu ia gwau: “Dina ia diho, vadaeni uma gabu ena biaguna ese ena gaukara naria tauna dekenai ia hamaoroa, ia gwau, ‘Gaukara taudia dekenai oi boiboi, gabeai taudia edia davana oi henia guna, to guna taudia be gabeai.’ Vadaeni adorahi 5 okoloka ia siaidia taudia idia daekau guna, kina ta ta idia abia. Vadaeni gaukara idia hamatamaia guna taudia idia daekau, idia laloa be idia edia davana do ia habadaia, to idia danu kina ta ta idia abia. Edia davana idia abia neganai, idia ese uma gabu ena biaguna dekenai idia badu, idia gwau, ‘Gabeai taudia be inai, aoa tamona sibona idia gaukara, to ai be dina ena siahu lalonai ai hekwarahi bada. Edena bamona idia edia davana bona aiemai davana be tamona?’ To ia ese idia ta dekenai ia haere, ia gwau, ‘Turagu e, lau be lau hadikaia lasi oi. Ita ruaosi ita hereva oiemu davana be kina ta do oi abia, ani? Oiemu davana oi abia, vadaeni oi lao. Lau ura be inai gabeai tauna do lau henia, oi dekenai lau henia hegeregerena. Be, lauegu gau, vadaeni lauegu ura hegeregere do lau karaia lasi, a? Lau be mai hariharibada tauna, inai dainai oi badu, a?’ Ma Iesu ia gwau, ‘Inai dainai, gabeai taudia be do idia guna, to guna taudia be do idia gabeai.’ ”

Unai kina idia abia, Iesu ia mase neganai lasi, to Pentekoste 33 C.E. neganai, “uma gabu ena biaguna,” Keriso, ese lauma helaga be ena hahediba taudia latadiai ia bubua diho neganai. Iesu ena hahediba taudia be 5 okoloka ai gaukara idia hamatamaia taudia, “gabeai taudia” bamona. Unai kina ese ia laulaulaia gauna be tanobada ai idia gaukaralaia diba gauna, mauri hanaihanai do idia abia totona ia durudia gauna. Gauna be inai: Edia dagi namona lauma Israel lalonai; unai dagi dainai Iesu ese ia horodia Dirava ena Basileia ena sivarai idia harorolaia totona.

Nega sisina murinai, uma gaukara idia hamatamaia guna taudia ese idia itaia, Iesu ena hahediba taudia ese edia davana idia abia vadaeni bona idia gaukaralaia danu. To unai gaukara taudia idia ura ma gau haida danu idia abia, lauma helaga bona Basileia ena hahenamo sibodia lasi. Idia badu dainai, Keriso ena hahediba taudia, vain umana ai idia gaukara taudia ‘gabedia,’ idia dagedage henidia.

Iesu ena parabole herevana ena anina be aposetolo edia negai ia vara, bona iseda negai danu. Hari inai negai, Kerisendom ena haroro taudia be edia dagi bona gaukara dainai, Dirava ena vain umana ai idia gaukara matamaia “guna.” Idia gwau Watch Tower Bible and Tract Society ena haroro taudia be Dirava ena hesiai taudia ‘gabedia.’ To, ena be Kerisendom ena haroro taudia ese idia lalo-dika henidia, to unai taudia ese “kina” idia abia​—Dirava ena guba Basileiana ena gwaukau taudia dagina unai. Mataio 19:30–20:16.

▪ Vain umana ese dahaka ia laulaulaia? Uma biaguna, hora 12 lalodiai idia gaukara taudia, bona hora tamona ai idia gaukara taudia, ese daidia idia laulaulaidia?

▪ Unai gaukara dinana ese ia laulaulaia negana be edena negai ia doko, bona edena negai davana idia abia?

▪ Gaukara davana, kina ta, ese dahaka ia laulaulaia?