Karoa 51

Vara Dina Moalena Dainai Tau ta Idia Hamasea

IESU ese ena aposetolo ia hadibadia, bena rua rua amo ia siaidia lao. Reana Petro be Andrea ida idia lao hebou, Iakobo be Ioane ida, Filipo be Batolomeo ida, Toma be Mataio ida, Iakobo be Tadeo ida, bona Simona be Iuda ida idia lao hebou, Basileia ena sivarai namona harorolaia totona bona hoa dalana amo gorere taudia hamauridia totona.

Unai neganai Ioane Bapatiso be dibura rumana ai ia noho. Reana oi diba vadaeni, taunimanima vairadiai Ioane ia gwau Herod Antipa ia kara kerere badina be ena kakana ena adavana Herodia ia abia iena. Herod Antipa ia gwau Mose ena Taravatu ia badinaia, unai dainai Ioane ese ena heudahanai karana ia gwauraia hedinarai be maoro. Reana Herodia ena hereva dainai, Herod ese Ioane dibura rumana ai ia koua.

Herod Antipa ia diba Ioane be kara maoromaoro tauna, bona ena hereva ia kamonai henia mai ena moale ida. Unai dainai ia diba lasi dahaka do ia karaia ia dekenai. To Herodia ese Ioane ia badu henia dainai, ena mase dalana ia tahua noho. Bena dala ia davaria ena ura hagugurua totona.

Lagani 32 C.E. ena Paseka Ariana be kahirakahira neganai, Herod ese sibona ena vara dinana laloa lou totona, aria ta ia karaia. Unai aria dekenai ia boiridia taudia be hanua lohiadia, tuari biagudia, bona Galilea ena tau badadia. Aria dekenai, Salome, Herodia be ena adavana gunana ena amo ia abia natuna kekenina, be hebou taudia vairadiai ia mavaru. Tatau iboudiai ese ena mavaru idia moalelaia bada.

Herod ese Salome ia moalelaia bada dainai, ia hamaoroa, ia gwau: “Oiemu ura oi gwauraia, dohore lau henia oi dekenai.” Bena mai gwauhamata hereva metauna ida ia hereva henia, ia gwau: “Dahaka gau oi noinoi lau dekenai dohore lau henia oi dekenai. Bema lauegu basileia kahana oi noia danu do lau henia oi dekenai.”

Salome ia do haere lasi neganai, ia raka lasi bona ena sinana ia nanadaia, ia gwau: “Dahaka lau noinoi? ”

Herodia ena ura hagugurua negana ia ginidae inai! Maoromaoro ia gwau: “Ioane Bapatiso ena kwarana.”

Salome be ia heau vareai bona Herod ia hamaoroa, ia gwau: “Lauegu ura be harihari Ioane Bapatiso ena kwarana oi henia lau dekenai mereki latanai.”

Herod ia lalohisihisi bada. To ena vadivadi taudia ese ena gwauhamata idia kamonai dainai, idia vairadiai ia hemarai garina haneulato ena noinoi ia koua diba lasi; kerere lasi tauna do ia mase be herevana. Ena tuari tauna ta ia siaia, ia hagania, Ioane ena kwarana do ia utua oho. Nega sisina murinai, tuari tauna ia lou mai, Ioane ena kwarana be mereki ai ia mailaia, bena Salome ia henia. Ia laohaia, ena sinana ia henia. Ioane ena hahediba taudia unai sivarai idia kamonai neganai, idia lao ena tauanina idia abia, idia guria, bena Iesu idia hadibaia.

Gabeai, Herod be Iesu ese gorere taudia ia hamauridia bona lauma dikadia ia luludia sivaraidia ia kamonai neganai, ia gari bada, ia laloa Iesu be Ioane, mase amo ia toreisi. Unai dainai ia ura dikadika Iesu ia itaia, ena haroro herevana kamonai totona lasi, to ia ura diba ia laloa gauna be ia maoro o lasi. Mataio 10⁠:​1-5; 11⁠:1; 14⁠:​1-12; Mareko 6⁠:​14-29; Luka 9⁠:​7-9.

▪ Dahaka dainai Ioane be dibura rumana ai ia noho, bona dahaka dainai Herod ia ura lasi ia hamasea?

▪ Ioane hamasea dalana be Herodia ese edena bamona ia davaria?

▪ Ioane ia mase murinai, dahaka dainai Herod ia ura Iesu ia itaia?