1. Meamea bona vada karadia ena bada be edena bamona?

 BUKA ta ladana African Traditional Religion ia gwau: “Africa ai meamea o vada taudia idia noho eiava lasi oi henanadai be anina lasi.” Ma ia gwau: “Africa taudia ibounai idia diba meamea bona vada karadia be bada herea.” Sikuli bada taudia bona idia sikuli lasi taudia ese meamea bona vada karadia idia abia dae. Islam bona Kerisendom tomadiho taudia haida ese idia abia dae danu.

2. Taunimanima edia lalohadai be dahaka?

² Taunimanima momo idia abia dae siahu ta ia noho. Dirava ese unai siahu ia biagua. Mase taudia edia lauma ese idia gaukaralaia diba. Bona taunimanima haida ese unai siahu gaukaralaia dalana idia diba, taunimanima idia durua eiava idia hadikaia totona.

3. Meamea karana be dahaka, bona taunimanima be dahaka idia abia dae?

³ Meamea karadia be edia inai taudia dekenai idia gaukaralaia. Idia abia dae idia be mai edia siahu mariboi, manu, lao, eiava animal ma haida idia siaia lao taunimanima idia hadikaia totona. Danu idia ese heai, gorere bona mase idia havaraia diba, eiava hahine be gabani ai idia halaoa.

4. Vada karana dekenai momo be dahaka idia abia dae, bona guna meamea idia karaia taudia haida be dahaka idia gwau?

⁴ Meamea karana be vada karana hegeregerena. Momo idia gwau unai ia karaia tauna ese hanuaboi ai ena tauanina ia rakatania bona ia roho lao, iena meamea turadia ida ia hedavari eiava ena inai tauna ena mauri ia hadikaia totona. Meamea karana idia rakatania taudia idia gwau, meamea tauna ena tauanina be bedi dekenai do ia hekure. Hegeregere, Africa ai magasin ta ese guna meamea o vada idia karaia taudia (momo be kekeni matamata) edia hereva ia torea, idia gwau: “Motuka aksiden amo taunimanima 150 lau hamasea.” “Lau ese natudia 5 edia rara lau inua haorea bona idia mase.” “Lau ese egu boifren toi lau hamasea badina lau idia dadaraia.”

5. White magic be dahaka bona edena bamona unai idia karaia?

⁵ Haida idia gwau meamea karadia haida (white magic) be dika gaudia amo taunimanima idia gimaia. Unai bamona meamea karana idia karaia taudia be imana ai ageva o rini idia atoa. Sibona gimaia muramura ta idia inua o edia kopina ai idia dahua. Idia gimaia totona edia ruma lalonai o tano lalonai gau haida idia hunia. Bona Baibel o Koran ena toretore ia hahedinaraia herahera gauna ta idia trast henia.

6. Idaunegai Satani bona ena demoni be dahaka idia karaia, bona edia siahu be edena bamona do ita laloa be namo?

⁶ Momokani, Satani bona ena demoni ese taunimanima idia inai henia. Idia be mai edia siahu taunimanima edia lalohadai bona mauri idia biagua totona, bona idaunegai idia be taunimanima bona animal lalonai idia vareai danu. (Mataio 12:43-45) Momokani, namo lasi ita laloa edia siahu be maragi, danu namo lasi ita laloa edia siahu be bada herea.

7. Satani ena ura be dahaka, bona paragraf ese edena bamona ia haheitalaia?

⁷ Satani be koikoi karadia ena biaguna. Ia ese taunimanima ia koia unai amo do idia laloa iena siahu be bada. Haheitalai: Vanegai Africa tanona ai heatu ia vara lalonai, soldia taudia be saun gaudia idia gaukaralaia edia inai taudia hagaria totona. Idia do heatu lasi lalonai, soldia taudia ese idia rekodia tuari kohudia bona ipidi ena regena idia habadaia. Idia ura edia inai taudia do idia laloa ami orea ta be tuari kohu badadia ida ia mai idia tuari henia totona. Unai hegeregerena, Satani ia ura taunimanima idia abia dae iena siahu be hetoana lasi. Iena ura badana be taunimanima ia hagaria, unai amo ia do idia badinaia, to Iehova lasi. Satani ia ura taunimanima ese iena koikoi karadia toi do idia abia dae. Mani ita herevalaia.

8. Satani ena koikoi karana ta be dahaka?

⁸ Satani ena koikoi karana ta be inai: Dika gauna ta be ia vara kava lasi; taunimanima ese idia havaraia lasi dika gaudia be siahu idauna ta ese ia havaraia. Hegeregere, malaria gorerena dainai ia mase natuna ta oi laloa. Sinana ia diba nemo ese malaria gorerena ia mailaia. To danu, do ia laloa ta ese babalau karana amo nemo ia siaia natuna ia koria totona.

9. Edena dala ai Baibel ia hahedinaraia, problem ibounai be Satani ese ia havaraia lasi?

⁹ Momokani, Satani be mai ena siahu problem ia havaraia totona, to namo lasi ita laloa ia be mai ena siahu dainai problem ibounai be ia ese ia havaraia noho. Baibel ia gwau: “Heau haraga taudia be hanaihanai heau helulu dekenai idia kwalimu lasi, aonega taudia be hanaihanai aniani idia abia lasi, diba bada taudia be hanaihanai idia taga lasi, bona diba momo taudia be hanaihanai idia kwalimu lasi, badina idia ibounai dekenai dika be nega idauidau ai idia vara kava.” (Hadibaia Tauna 9:11) Ta be heau helulu lalonai ia heau haraga diba to reana do ia kwalimu lasi. “Idia vara kava” gaudia dainai ia lusi diba. Reana ia heau lalonai ia moru, o ia gorere eiava ena masolo dekenai gau ta ia vara. Taunimanima idauidau dekenai unai ia vara diba. Unai gaudia be idia vara kava, Satani eiava meamea karana dainai lasi.

10. Satani ena koikoi hereva be dahaka meamea taudia totona, bona edena bamona ita diba unai be koikoi?

¹⁰ Satani ena koikoi karana iharuana be inai: Hanuaboi ai, meamea taudia be edia tauanina idia rakatania bona idia lao meamea taudia ma haida ida idia hedavari, eiava idia hamasea tauna ena mauri idia ania totona. To sibona oi nanadaia: ‘Bema meamea taudia be unai idia karaia diba, dahaka gauna ese edia tauanina ia rakatania?’ Ita itaia bamona, mauri be tauanina amo ia raka-lasi diba lasi gauna. Danu mauri siahuna ese tauanina dekenai goada ia henia, to ia be tauanina ena kahana ta lasi dainai gau ta ia karaia diba lasi.

11. Dahaka dainai ita diba meamea taudia be edia tauanina idia rakatania diba lasi? Bona unai oi abia dae, a?

¹¹ Mauri bona mauri siahuna be tauanina do ia rakatania lasi, namo eiava dika havaraia totona. Unai dainai, meamea taudia be edia tauanina idia rakatania diba lasi. Idia laloa o idia gwauraia gaudia be idia ese idia karaia lasi.

12. Satani ese edena dala ai taunimanima ia koia?

¹² Meamea idia karaia taudia ese idia gwauraia hedinarai gaudia be edena dala ai ita herevalaia diba? Satani ia karaia gaudia ese taunimanima dekenai daradara ia havaraia diba. Hegeregere, Satani ese matahanai ia gaukaralaia, unai amo idia laloa idia be gau ta idia itaia, kamonai, eiava idia karaia diba lasi gauna ta idia karaia. Unai dala amo, Satani ia ura taunimanima be Iehova amo ia abia oho bona do idia laloa Baibel ena hereva be kerere.

13. (a) White magic be namo, a? (b) Baibel ese meamea bona vada karadia be edena bamona ia herevalaia?

¹³ Koikoi ihatoina be inai: Taunimanima idia laloa White magic be namo, to unai danu be dika. Baibel ese black magic bona white magic edia idau ia herevalaia lasi. Unai ibounai ia taravatua. Iehova ese Israela besena dekenai ia henia taravatu mani oi laloa:

•   “Namo lasi . . . meamea karadia umui karaia.”​—Levitiko 19:26.

•   “Bema tau ta eiava hahine ta be mase taudia edia lauma ia hereva henia eiava vaira negana ia gwauraia, namona be idia umui hamasea.”​—Levitiko 20:27.

•   “Namo lasi emui huanai ta ese . . . meamea karadia ia karaia, toa idauidau edia anina ia tahua, vada karadia ia karaia, ma haida dekenai puripuri ia karaia, mase taudia edia lauma ia hereva henia.”​—Deuteronomi 18:10-​14.

14. Dahaka dainai Iehova ese meamea karana ia taravatua?

¹⁴ Unai bamona taravatu ese ia hahedinaraia Dirava ia ura lasi iena taunimanima ese meamea karadia idia karaia. Iehova ese ena taunimanima dekenai unai taravatu ia henia badina idia ia lalokau henia bona ia ura lasi gari bona babalau karadia ese idia ia biagua. Ia ura lasi demoni ese idia hahisidia.

15. Edena dala ai Baibel ia hahedinaraia Iehova ena siahu ese Satani ena siahu ia hereaia?

¹⁵ Ena be Baibel ese demoni idia karaia diba bona idia karaia diba lasi gaudia ia herevalaia lasi, to ia hahedinaraia Iehova Dirava ena siahu be bada herea. Satani bona demoni edia siahu ia hereaia. Iehova ese guba amo Satani ia negea diho. (Apokalupo 12:9) Laloatao, Satani ese Iobu ia tohoa totona Dirava amo gwaumaoro ia abia, to Dirava ese ia hamaoroa Iobu do ia hamasea lasi bona unai ia badinaia.​—Iobu 2:​4-6.

16. Daika ese ita ia gimaia be namo?

¹⁶ Aonega herevadia 18:10 ia gwau: “Iehova ena ladana be kohoro goadana. Kara maoromaoro tauna ia heau vareai bona ia mauri.” Unai dainai Iehova ita tabekau henia be namo. Dirava ena hesiai taudia ese Satani bona demoni edia kara dikadia amo sibona idia gimaia totona, meamea gaudia o muramura idia tahua lasi, eiava vada karadia dekenai idia gari lasi. Dirava ena hesiai taudia ese Baibel ena hereva idia abia dae, ia gwau: “Iehova ena matana be tanobada ibounai ia itaia noho, ia idia badinaia momokani taudia dekenai ena goada ia hahedinaraia totona.”​—2 Sivarai 16:9.

17. Iamesi 4:7 ena hereva hegeregerena, dahaka ita karaia be namo?

¹⁷ Bema Iehova oi hesiai henia, oi danu be inai hereva do oi abia dae. Iamesi 4:7 ia gwau: “Dirava henunai umui noho. To Diabolo umui inai henia, bona umui amo do ia heau siri.” Bema Dirava momokani oi hesiai henia, bona Ia henunai oi noho, oi abia dae Iehova ese oi do ia gimaia.