STADI 18
Baibel amo Haere Dalana
ITA abia dae gaudia, eda mauri dalana, idia vara gaudia dekenai iseda lalohadai, bona eda helaro idia henanadailaia neganai, ita ura Baibel amo ita haere. Dahaka dainai? Badina ia be Dirava ena Hereva. Ita abia dae herevadia be Baibel amo. Iseda mauri dalana be Baibel amo. Iseda lalohadai idia vara gaudia dekenai be Baibel ena hereva hegeregerena. Bona iseda helaro ena badina be Dirava ena lauma amo idia vara gwauhamata, Baibel lalonai idia noho.—2 Tim. 3:16, 17.
Iseda ladana dainai ita abia maduna ita laloa bada. Ita be Iehova ena Witnes taudia. (Isa. 43:12) Unai dainai henanadai be taunimanima edia aonega herevadia amo lasi, to Iehova ena Hereva helagana amo ita haerelaidia. Momokani, eda lalohadai be idauidau, to ita laloa dalana be Dirava ena Hereva hegeregerena, badina ita diba unai be hereva momokani. To, Baibel ese dala ia kehoa gau momo be sibona eda ura hegeregerena ita abia hidi totona. Bona ma haida ita doria lasi ita ura gaudia do idia abia dae, to ita ura kamonai taudia dekenai Baibel lalonai idia noho hakaua herevadia ita hadibaia, unai amo ita moalelaia ura kwalimu idia abia danu. Aposetolo Paulo bamona, ita ura taunimanima be Dirava “do idia abidadama henia bona kamonai henia.”—Roma 16:26.
Apokalupo 3:14 ese Iesu Keriso ia gwauraia “Dirava ena hereva ia gwauraia maoromaoro tauna.” Edena dala ai henanadai ia haerelaia bona ia dekenai idia vara gaudia ia hanaia? Nega haida haheitalai ia gaukaralaia, taunimanima idia laloa totona. Nega ma haida henanadai tauna ia nanadaia ena lalohadai siri ta dekenai be dahaka. Nega momo siri edia hereva ia gwauraia, sibona ena hereva amo ia gwauraia, eiava edia sivarai ia gwauraia. (Mat. 4:3-10; 12:1-8; Luka 10:25-28; 17:32) Aposetolo taudia edia negai, Buka Helaga ena lokua toretoredia be dubu dekenai idia noho. Ia hedinarai lasi Iesu dekenai unai lokua toretoredia edia kopi idia noho, to idia ia diba namonamo bona ma haida ia hadibaia neganai edia hereva ia gwauraia momo. (Luka 24:27, 44-47) Momokani ia gwau diba ia hadibaia herevadia be ia sibona ena amo lasi. Iena Tamana amo ia kamonai herevadia ia gwauraia.—Ioa. 8:26.
Ita ura Iesu ena haheitalai ita tohotohoa. Ita be eda taiana amo Dirava ena hereva ita kamonai lasi, Iesu ia kamonai bamona. To Baibel be Dirava ena Hereva. Ia amo haere ita henia neganai, taunimanima edia lalona ita veria lasi ita idia laloa totona. Ita hahedinaraia, goevadae lasi taudia edia lalohadai ita gwauraia lasi to ita hamomokania Dirava ena hereva be hereva momokani.—Ioa. 7:18; Roma 3:4.
Momokani, Baibel ita gaukaralaia kava lasi, to ita ura kamonai tauna ia durua dalanai ita gaukaralaia. Ita ura hereva ibounai do ia kamonai guna. Ruma tauna ena lalohadai hegeregerena, Baibel ena hereva oi hahedinaraia totona reana oi gwau diba: “Oi danu oi abia dae Dirava ena lalohadai be mai anina bada, ani?” Eiava reana oi gwau: “Oi diba Baibel ese unai henanadai ia herevalaia, a?” Bema Baibel ia matauraia lasi tauna oi hereva henia, reana hereva ma ta oi gwauraia. Reana oi gwau: “Mani oi dekenai inai idaunegai peroveta herevana lau hahedinaraia.” Eiava reana oi gwau: “Taunimanima momo ese idia abia buka badana ia gwau . . . ”
Reana nega haida oi ura siri ta be sibona emu hereva amo oi gwauraia. To, bema dala ia noho, namona be Baibel oi kehoa bona ena hereva oi duahia. Bema mai dalana, ruma tauna ena Baibel amo ia dekenai unai siri oi hahedinaraia. Nega momo unai dala ai Baibel oi gaukaralaia be mai ena siahu.—Heb. 4:12.
Keristani elda taudia ese henanadai idia haerelaia neganai, edia maduna badana be Baibel amo idia haere. Elda taudia edia taravatu ta be “hereva momokani, ita abidadama henia bona ita hadibaia gauna, do ia badinaia momokani.” (Tito 1:9) Kongregesen tauna ta be elda ese sisiba ia henia murinai, mai anina bada gauna ia abia hidi diba. Unai sisiba be Baibel amo be mai anina bada! Elda ese unai bamona haheitalai ia henia neganai, ma haida ese edia hadibaia gaukarana idia hanamoa diba.