STADI 42
Diba Idia Abia
KAMONAI taudia ese emu hereva amo diba idia abia totona, gau namona ta oi herevalaia sibona be hegeregere lasi. Oi sibona oi nanadaia: ‘Dahaka dainai inai taudia ese inai gauna idia kamonai be namo? Dahaka do lau gwauraia be namo, bona unai amo kamonai taudia idia mamia egu hereva amo heduru idia abia?’
Bema sikuli ai oi abia kahana lalonai ma haida haroro henia dalana do oi haheitalaia, ruma tauna be emu hereva ia kamonai tauna. Eiava, oi be reana kongregesen ibounai do oi hereva henia.
Kamonai Taudia Idia Diba Gaudia. Oi sibona oi nanadaia, ‘Lau herevalaia gauna dekenai kamonai taudia be dahaka idia diba?’ Unai amo emu hereva hamatamaia dalana oi dibaia. Bema oi hereva henia kongregesen lalonai lo Keristani taudia momo idia noho, idia momo idia dibaia vadaeni hereva badadia oi gwauraia lou sibona lasi. Unai hereva momokani badadia edia anina oi hahedinaraia. To, bema kamonai matamata taudia momo idia noho danu, idia iboudiai oi laloa be namo.
Namona be emu hereva ena haraga be kamonai taudia edia diba hegeregerena. Momo idia diba gaudia oi herevalaia haraga sisina. To kamonai taudia momo idia diba lasi gaudia oi herevalaia neganai oi hereva haraga lasi, edia anina idia lalo-pararalaia namonamo totona.
Diba Idia Henia Gaudia. Diba idia abia totona hanaihanai gau matamatadia oi herevalaia be badina lasi. Hereva henia taudia haida ese auka lasi dalanai momo idia diba hereva momokanidia idia gwauraia dainai, kamonai taudia momo be nega ginigunana unai gaudia idia lalo-pararalaia namonamo.
Haroro gaukara lalonai, nega dokona ai ita noho oi hahedinaraia totona niusi ta oi gwauraia sibona be hegeregere lasi. Baibel oi gaukaralaia unai niusi ena anina oi hahedinaraia totona. Unai amo ruma tauna ese diba ia abia. Unai hegeregerena, guba gaudia edia heau dalana idia hakaua taravatu ta eiava tubutubu gaudia eiava animal edia mauri gaudia ta oi herevalaia neganai, unai oi gwauraia lasi ruma tauna dekenai saiens gauna namona ta oi hahedinaraia totona. To, emu ura be Havaraia Tauna ia noho bona ita ia
lalokau henia oi hamomokania, unai dainai Ia havaraia gauna ta bona Baibel ena siri oi herevalaia. Unai ese ruma tauna ia durua dala matamatana ai unai gauna ia laloa.Kamonai taudia ese nega momo idia kamonai vadaeni gauna be idia dekenai oi herevalaia be mai ena hekwarahi. To hadibaia tauna namona ai oi lao totona, unai oi karaia dalana namona oi dibaia be namo. Edena bamona oi karaia diba?
Tahua karana ese oi ia durua. Oi laloatao haraga gaudia sibona be emu hereva lalonai oi gwauraia lasi, to rau 33 ia lao 38 lalonai ai herevalaia vadaeni tahua karana ena tulu idauidau oi gaukaralaia. Tahua gaudia oi hagugurua totona, unuseniai idia gwauraia heduru herevadia oi laloa. Reana tahua karana amo oi davaria haida sibona idia diba histori ena sivarai ta be emu hereva totona ia namo. Eiava vanegai idia halasia niusi ta ese oi ura herevalaia gauna ia haheitalaia namonamo.
Oi davaria gaudia oi laloa neganai, sibona emu laloa karana oi durua totona oi sibona oi nanadaia dahaka? dahaka dainai? edena negai? edeseniai? daika? bona edena dala ai? Hegeregere: Dahaka dainai inai be momokani? Edena dala ai lau hamomokania diba? Momo ese dahaka hereva idia abia dae dainai inai Baibel ena hereva momokanina idia abia dae be auka? Dahaka dainai inai be mai anina bada? Edena dala ai inai ese ta ena mauri ia haidaua be namo? Dahaka haheitalai ese ia hahedinaraia ta ese inai ia badinaia neganai namo ia abia? Inai Baibel ena hereva momokani ese Iehova ena kara be edena bamona ia hahedinaraia? Oi herevalaia gauna hegeregerena reana oi henanadai: Edena negai inai ia vara? Edena dala namona ai inai be hari ita badinaia diba? Reana hereva oi henia lalonai emu hereva ia mauri totona unai bamona henanadai haida oi gwauraia diba.
Reana emu hereva lalonai kamonai taudia idia diba siridia oi gaukaralaia be mai badina. Dahaka oi karaia be namo oi herevalaidia dalana amo diba idia abia totona? Oi duahia sibona lasi; edia anina oi gwauraia hedinarai.
Idia diba sirina amo diba ma haida idia abia bema ena kahana idauidau oi herevalaia, anina be sinado idia herevalaia herevadia oi gwauraia hedinarai. Karaia dalana oi diba totona Mika 6:8 mani oi laloa. “Kara maoromaoro” be dahaka? Daika ena lalohadai kara maoromaoro dekenai ia herevalaia? Edena dala ai “kara maoromaoro do ita karaia” ena anina oi haheitalaia diba? Eiava edena dala ai “ibounai do ita lalokau henia” ena anina do oi haheitalaia? Manau karana be dahaka? Tau burukana ta dekenai be edena bamona unai oi hahedinaraia diba? To momokani, dahaka do oi herevalaia be oiemu sinado, emu tahua gauna, kamonai taudia, bona nega amo do oi diba.
Nega momo auka lasi herevadia amo hereva ta ena anina oi gwauraia be namo. Taunimanima haida be Mataio 6:10 ese ia herevalaia “Basileia” ena anina idia dibaia neganai, idia hoa bada. Hereva ta ena anina oi gwauraia neganai, reana nega daudau Keristani tauna ena lalo-parara unai siri ena anina dekenai ia habadaia diba danu. Unai ia vara diba bema 2 Petero 1:5-8 ita duahia bena unai siri idia gwauraia kara idauidau edia anina ita gwauraia: abidadama, kara namo, diba, tauanina ena ura biagua karana, haheauka, Dirava badinaia karana, tadikaka hebogahisi henia karana, bona lalokau. Bema hereva haida idia hegeregere sisina, edia anina oi gwauraia neganai edia idau ia hedinarai. Unai bamona herevadia haida be Aonega Herevadia 2:1-6 ai idia gaukaralaia, hegeregere aonega, diba, bona laloa kehoa.
Kamonai taudia ese diba idia abia diba bema siri ta oi herevalaia namonamo. Taunimanima momo idia hoa bada bema nega ginigunana idia itaia Baibel haida ai Genese 2:7 ia gwau Adamu be ia mauri soulina ta bona Esekiela 18:4 ia gwau souli ia mase. Nega ta, Sadukea taudia idia hoa badina Iesu ese idia abia dae sirina Esodo 3:6 ia herevalaia bona ia hahedinaraia unai siri ese toreisi lou herevana ia hamomokania.—Luka 20:37, 38.
Nega haida diba bada idia abia bema siri ta ena badina siridia, unai siri idia torea neganai idia vara gaudia, bona ia hereva tauna eiava ia kamonai tauna oi hahedinaraia. Farisea taudia be Salamo 110 idia diba namonamo. To, Iesu ese edia lalona ia veria, siri ginigunana ai ia hedinarai lalohadai badana idia laloa totona. Ia henanadai: ““‘Umui ese Keriso be edena bamona umui laloa, ia be daika ena natuna?’ Idia gwau, ‘Davida ena natuna.’ Ma Iesu ia gwau, ‘Edena bamona Davida be Lauma ese ia abia neganai, “Lohiabada” ia gwauraia, badina Davida ia gwau, “Lohiabada ese egu Lohiabada dekenai ia hamaoroa, ia gwau: ‘Lauegu imana idiba kahana dekenai do oi helai, ela bona oi dekenai idia tuari henia taudia ibounai, be oiemu aena henunai gaudia dekenai do lau halaoa.’” To bema Davida ese Keriso ia gwauraia “Lohiabada,” edena bamona Keriso be Davida ena natuna sibona?’” (Mat. 22:41-45) Bema Iesu bamona Baibel oi herevalaia, taunimanima do oi durua Dirava ena Hereva idia duahia namonamo totona.
Bema hereva henia tauna ese Baibel buka ta idia torea negana eiava gau ta ia vara negana ia gwauraia, namona be unai nega ena toana ia herevalaia danu. Unai dala ai, kamonai taudia ese idia itaia namonamo unai buka eiava ia vara gauna be mai anina bada.
Gau haida oi hahegeregerea neganai kamonai taudia ese diba idia abia. Reana taunimanima edia lalohadai bona Baibel ena lalohadai gau ta dekenai oi hahegeregerea. Eiava gau tamona idia herevalaia Baibel sivarai rua oi hahegeregerea. Gau haida idia idau sisina, a? Dahaka dainai? Idia amo dahaka diba ita abia? Unai oi karaia neganai, kamonai taudia ese oi herevalaia gauna dekenai lalohadai matamatana idia abia.
Bema emu hereva ai Keristani haroro gaukara ena kahana ta oi herevalaia, reana emu hereva hanamoa totona unai kahana oi herevalaia sisina guna. Oi hahedinaraia dahaka ita karaia be namo, dahaka dainai unai be mai anina bada, bona ita be Iehova ena Witnes taudia dainai eda tahua gaudia be edena bamona unai ida ita hakapua. Bena oi hahedinaraia edeseniai, edena negai, bona edena dala ai unai ita karaia.
Dahaka do oi karaia bema emu hereva lalonai “Dirava ena laloa dobu gaudia” haida oi herevalaia be namo? (1 Kor. 2:10) Bema lalohadai badadia unai gauna dekenai oi gwauraia bona hahedinaraia guna, ena kahana maragidia do idia lalo-pararalaia namonamo. Bona bema hereva dokonai oi herevalaia gauna ibounai be hereva haida amo oi gwauraia lou, kamonai taudia do idia moale badina gau namona ta idia dibaia.
Heduru Sisiba Keristani Mauri Dekenai. Kamonai taudia ese heduru bada idia abia bema oi herevalaia gauna ena anina edia mauri dekenai oi hahedinaraia. Do oi herevalaia gauna lalonai idia noho siridia oi laloa neganai, oi sibona oi nanadaia, ‘Dahaka dainai inai sivarai be Baibel dekenai ia noho ema bona hari?’ (Roma 15:4; 1 Kor. 10:11) Kamonai taudia edia mauri lalonai idia vara gaudia oi laloa. Unai gaudia be Baibel ena sisiba bona hakaua herevadia ida oi laloa hebou. Emu hereva lalonai oi hahedinaraia edena dala ai Baibel siri ese ta idia durua diba, mai aonega ida unai gaudia ia laloa totona. Sisiba badana ta oi henia sibona lasi. Lalohadai bona kara ta eiava haida oi herevalaia namonamo.
Namona be hari oi hegaegaelaia herevana lalonai unai hadibaia herevadia ta eiava rua oi badinaia. Emu diba ia bada ia lao neganai, idia ma haida oi gaukaralaia. Gabeai do oi itaia kamonai taudia idia ura bada emu hereva idia kamonai, badina idia diba momokani idia do ia durua gauna namona idia kamonai.